ಸಾಂಸ್ಕೃತಿಕ ಪರಂಪರೆಯ ವಸ್ತುಸಂಗ್ರಹಾಲಯ ಅನಾವರಣ

ಧಾರವಾಡ: ‘ಸಾಹಿತ್ಯ, ಕಲೆ ಹಾಗೂ ಸಾಂಸ್ಕೃತಿಕ ಲೋಕದ ಕೇಂದ್ರ ಬಿಂದುವಾಗಿರುವ ಧಾರವಾಡದಲ್ಲಿ ಸಾಂಸ್ಕೃತಿಕ ಪರಂಪರೆಯ ವಸ್ತು ಸಂಗ್ರಹಾಲಯದ ಕೊರತೆ ಇತ್ತು. ಆ ಕೊರತೆಯನ್ನು ಇಂಟ್ಯಾಕ್‌ ಸಂಸ್ಥೆ ಇದೀಗ ನಿವಾರಣೆ ಮಾಡಿದೆ’ ಎಂದು ಹಿರಿಯ ಪತ್ರಕರ್ತ ಡಾ.ಪಾಟೀಲ ಪುಟ್ಟಪ್ಪ ಹೇಳಿದರು.

ಇಲ್ಲಿನ ಮಹಾನಗರ ಪಾಲಿಕೆ ಆವರಣದಲ್ಲಿ ಶುಕ್ರವಾರ ಸಾಂಸ್ಕೃತಿಕ ಪರಂಪರೆಯ ವಸ್ತು ಸಂಗ್ರಹಾಲಯವನ್ನು ಉದ್ಘಾಟಿಸಿ ಮಾತನಾಡಿದ ಅವರು, ‘ಇಂಟ್ಯಾಕ್ ಸಂಸ್ಥೆಯು ಸಾಂಸ್ಕೃತಿಕ ಪರಂಪರೆಯನ್ನು ಬಿಂಬಿಸುವ ವಸ್ತು ಸಂಗ್ರಹಾಲಯವನ್ನು ಪಾಲಿಕೆ ಆವರಣದಲ್ಲಿ ತೆರೆದಿದ್ದು, ಅದಕ್ಕೆ ಬೇಕಾದ ಅಗತ್ಯ ಸಹಕಾರ, ಸೌಲಭ್ಯವನ್ನು ನೀಡುವ ನಿಟ್ಟಿನಲ್ಲಿ ಪಾಲಿಕೆ ಹಾಗೂ ಸರ್ಕಾರ ಲಕ್ಷ್ಯ ವಹಿಸಬೇಕು’ ಎಂದರು.

ಸಂಗೀತ, ಸಾಹಿತ್ಯ, ಕಲೆ ಹಾಗೂ ಸಾಮಾಜಿಕ ಸೇವೆಯ ಮೂಲಕ ಗಮನ ಸೆಳೆದ ಸಾಧಕರ ವ್ಯಕ್ತಿಗಳ ಚಿತ್ರಣ ಈ ವಸ್ತು ಸಂಗ್ರಹಾಲಯದಲ್ಲಿ ಅನಾವರಣಗೊಂಡಿದೆ. ಒಂದೇ ಸೂರಿನಡಿ ೪೫ ಕ್ಕೂ ಹೆಚ್ಚು ಗಣ್ಯರ ಭಾವಚಿತ್ರಗಳ ಪೋಟೋ ಗ್ಯಾಲರಿ, ಅದರೊಂದಿಗೆ ಆಯಾ ವ್ಯಕ್ತಿಗಳ ಸಾಧನೆ, ಸೇವೆಯ ಮಾಹಿತಿಯೂ ಇಲ್ಲಿದೆ.

ಶ್ರೇಷ್ಠ ಸಾಹಿತಿ, ಕವಿಗಳಿಗೆ ಲಭಿಸಿದ ಪುರಸ್ಕಾರ, ಪ್ರಶಸ್ತಿ ಸೇರಿದಂತೆ ಅವರ ಹಳೆಯ ಜೀವನ ಮೆಲಕು ಹಾಕುವ ಕಪ್ಪುಬಿಳುಪಿನ ಚಿತ್ರಗಳೂ ಪ್ರದರ್ಶನಕ್ಕಿವೆ. ಖ್ಯಾತ ಛಾಯಾಚಿತ್ರಕಾರ ಕುಮಾರ ಕಾಟೇನಹಳ್ಳಿ ಅವರ ಕೈಚಳಕದಲ್ಲಿ ಸಿದ್ಧಗೊಂಡಿರುವ ಸಾಧಕರ ಪೋಟೋ ಗ್ಯಾಲರಿ ಎಲ್ಲರ ಕಣ್ಮನ ಸೆಳೆಯುತ್ತಿದೆ.