ಶಿವಮೊಗ್ಗ | ಅರಮನೆ ಮಾದರಿ ಮತಗಟ್ಟೆ- ರಾಜ ಮನೆತನದವರ ಪೋಷಾಕಿನಲ್ಲಿ ಸಿಬ್ಬಂದಿ

ಸ್ವೀಪ್ ಸಮಿತಿಯು ರೂಪಿಸಿದ್ದ ವಿಶಿಷ್ಟ ವಿನ್ಯಾಸದಡಿ ಮತಗಟ್ಟೆ ಅಣಿಗೊಂಡಿದ್ದು, ಮತಗಟ್ಟೆ ಸಿಬ್ಬಂದಿ ಪೌರಾಣಿಕ ಸಿನೆಮಾದಲ್ಲಿನ ರಾಜ ಮನೆತನದವರಂತೆ ಪೋಷಾಕು ಧರಿಸಿದ್ದರು. ಇಡೀ ದಿನ ಅವರು ಅದೇ ಪೋಷಾಕಿನಲ್ಲಿದ್ದುಕೊಂಡೇ ಕರ್ತವ್ಯ ನಿರ್ವಹಿಸಿದರು.

ಸ್ವತಃ ರಾಣಿ ವೇಷಧಾರಿ ಆಗಿದ್ದ ಬಿಎಲ್‌ಒ ಜಯಲಕ್ಷ್ಮೀ ಮತಗಟ್ಟೆಗೆ ಬಂದ ಮತದಾರರನ್ನು ಸ್ವಾಗತಿಸಿದರು. ಜಿಲ್ಲಾಧಿಕಾರಿ ಗುರುದತ್ತ ಹೆಗಡೆ, ಜಿಲ್ಲಾ ಪಂಚಾಯ್ತಿ ಸಿಇಒ ಸ್ನೇಹಲ್ ಲೋಖಂಡೆ, ಪೊಲೀಸ್‌ ವರಿಷ್ಠಾಧಿಕಾರಿ ಜಿ.ಕೆ.ಮಿಥುನ್‌ಕುಮಾರ್ ಮತಗಟ್ಟೆಗೆ ಭೇಟಿ ನೀಡಿ ಮೆಚ್ಚುಗೆ ವ್ಯಕ್ತಪಡಿಸಿದರು.

ಮತದಾನ ಮಾಡಿದವರಿಗೆ ಸಿಂಹಾಸನದಲ್ಲಿ ಕೂರಿಸಿ, ಕಿರೀಟ ಹಾಕಿ ಫೋಟೊ ಕ್ಲಿಕ್ಕಿಸಿಕೊಳ್ಳಲು ಅವಕಾಶ ಕಲ್ಪಿಸಲಾಗಿತ್ತು. ‘ಪ್ರಜಾಪ್ರಭುತ್ವ ವ್ಯವಸ್ಥೆಯಲ್ಲಿ ಮತದಾರನೇ ಮಹಾರಾಜ’ ಎಂಬ ಆಶಯದಡಿ ಈ ವ್ಯವಸ್ಥೆ ಮಾಡಿದ್ದೇವೆ’ ಎಂದು ಬಿಎಲ್‌ಒ ಜಯಲಕ್ಷ್ಮೀ ಮಾಹಿತಿ ನೀಡಿದರು.