ಬೆಂಗಳೂರು: ಬೆಂಗಳೂರು ಮಹಾನಗರ ಸಾರಿಗೆ ಸಂಸ್ಥೆ (ಬಿಎಂಟಿಸಿ) ₹363.82 ಕೋಟಿ ವೆಚ್ಚದಲ್ಲಿ 840 ಬಸ್ಸುಗಳನ್ನು ಖರೀದಿಸಲು ಸಂಪುಟ ಸಭೆ ಆಡಳಿತಾತ್ಮಕ ಅನುಮೋದನೆ ನೀಡಿದೆ.
ಸಭೆಯ ಬಳಿಕ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಕಾನೂನು ಸಚಿವ ಎಚ್.ಕೆ.ಪಾಟೀಲ, ‘ಪ್ರತಿ ಬಸ್ಸಿಗೆ ₹43.35 ಲಕ್ಷದಂತೆ 820 ಬಸ್ಸುಗಳನ್ನು ಖರೀದಿಸಲಾಗುವುದು’ ಎಂದರು.
ಇಂದಿರಾ ಕ್ಯಾಂಟೀನ್ಗೆ ಅಡುಗೆ ಉಪಕರಣ
ಇಂದಿರಾ ಕ್ಯಾಂಟೀನ್ಗಳಿಗೆ ಹೊಸ ಅಡುಗೆ ಉಪಕರಣಗಳು ಮತ್ತು ಪೀಠೋಪಕರಣ ಖರೀದಿಸಲು ₹84.58 ಕೋಟಿ ಬಿಡುಗಡೆಗೆ ಸಂಪುಟ ಸಭೆ ಒಪ್ಪಿಗೆ ನೀಡಿದೆ.
‘ಬೆಂಗಳೂರು ಮತ್ತು ಇತರ ನಗರಗಳಲ್ಲಿರುವ ಮೊದಲನೇ ಹಂತದ 138 ಇಂದಿರಾ ಕ್ಯಾಂಟೀನ್ಗಳಿಗೆ ಹಾಗೂ ಎರಡನೇ ಹಂತದ 186 ಇಂದಿರಾ ಕ್ಯಾಂಟೀನ್ಗಳಿಗೆ ಪ್ರಾದೇಶಿಕ ಪದ್ಧತಿಗೆ ಅನುಗುಣವಾಗಿ ಅಡುಗೆ ಸಲಕರಣೆ ಸಾಮಗ್ರಿಗಳನ್ನು ಟೆಂಡರ್ ಮೂಲಕ ಖರೀದಿಸಲು ಒಪ್ಪಿಗೆ ನೀಡಲಾಗಿದೆ’ ಪಾಟೀಲ ತಿಳಿಸಿದರು.