ಚಿತ್ರದುರ್ಗ | ಪೆಟ್ರೋಲ್‌ ಬಂಕ್‌: ಆದಾಯಕ್ಕೆ ಮಾತ್ರ ಆದ್ಯತೆ, ಸೌಲಭ್ಯ ಮರೀಚಿಕೆ

ಚಳ್ಳಕೆರೆ: ಬಹುತೇಕ ಬಂಕ್‌ಗಳಲ್ಲಿ ನೆರಳಿನ ವ್ಯವಸ್ಥೆ ಇಲ್ಲದ ಕಾರಣ ಗ್ರಾಹಕರು ಬಿಸಿಲಿದ್ದಾಗ ಹೈರಾಣಾಗಬೇಕಾದ ಸ್ಥಿತಿ ಇದೆ. ಬೇಸಿಗೆಯಲ್ಲಿ ಬೆಂಕಿ ಅವಘಡದ ಅಪಾಯಇರುವ ಕಾರಣ ಬಂಕ್‌ಗಳಲ್ಲಿ ನೆರಳಿನ ವ್ಯವಸ್ಥೆ ಕಲ್ಪಿಸಬೇಕು ಎಂದು ಸ್ಥಳೀಯರು ಒತ್ತಾಯಿಸಿದ್ದಾರೆ. ಪಟ್ಟಣದ ಬಳ್ಳಾರಿ ಬೆಂಗಳೂರು ಚಿತ್ರದುರ್ಗ ಹಾಗೂ ಪಾವಗಡ ಮಾರ್ಗದ ಮುಖ್ಯ ರಸ್ತೆಯಲ್ಲಿರುವ ಪೆಟ್ರೋಲ್ ಬಂಕ್‌ಗಳಲ್ಲಿ ಕೆಲಸ ಮಾಡುವ ಕಾರ್ಮಿಕರಿಗೆ ಶುದ್ಧ ಕುಡಿಯುವ ನೀರಿನ ವ್ಯವಸ್ಥೆ ಹೊರತುಪಡಿಸಿದರೆ ಗ್ರಾಹಕರು ಮತ್ತು ಕಾರ್ಮಿಕರಿಗೆ ಬಂಕ್‌ಗಳಲ್ಲಿ ಯಾವುದೇ ಮೂಲ ಸೌಕರ್ಯ ಕಲ್ಪಿಸಿಲ್ಲ. ‌ವಾಹನಗಳಿಗೆ ಪೆಟ್ರೋಲ್ ಡೀಸೆಲ್ ಹಾಕಿಸಲು ಗ್ರಾಮೀಣ ಪ್ರದೇಶಗಳ ಚಾಲಕರು ಬಂಕ್‌ ಬಳಿ ಬಂದಾಗ ಮಲ ಮೂತ್ರ ವಿಸರ್ಜನೆಗೆ ಚಡಪಡಿಸುತ್ತಿರುತ್ತಾರೆ. ಬಂಕ್‌ಗಳಲ್ಲಿ ನೆರಳಿನ ವ್ಯವಸ್ಥೆ ಇಲ್ಲದಿರುವುದರಿಂದ ಬಿಸಿಲು ಗಾಳಿ ಮಳೆಯಲ್ಲೇ ನಿಂತು ತೈಲ ಹಾಕಿಸುವ ಅನಿವಾರ್ಯತೆ ಗ್ರಾಹಕರಿಗಿದೆ. ಹೀಗಾಗಿ ಬಂಕ್‌ಗಳಲ್ಲಿ ಶುದ್ಧ ಕುಡಿಯುವ ನೀರು ನೆರಳು ಶೌಚಾಲಯ ವ್ಯವಸ್ಥೆಗೆ ಕೊಡಲೇ ಕ್ರಮ ಕೈಗೊಳ್ಳಬೇಕು ಎಂದು ನಗರದ ಹಿರಿಯ ನಾಗರಿಕರಾದ  ಪಿ.ತಿಪ್ಪೇಸ್ವಾಮಿ ಜಿಲ್ಲಾಧಿಕಾರಿಗೆ ಮನವಿ ಮಾಡಿದ್ದಾರೆ.

ಮೊಳಕಾಲ್ಮುರು: ತಾಲ್ಲೂಕಿನಲ್ಲಿ ಬಿಸಿಲು ಹೆಚ್ಚು. ಅದರಲ್ಲೂ ಬಿರು ಬೇಸಿಗೆಯಲ್ಲಿ ಹೊರಗಡೆ ಕಾಲಿಡಲು ಆಗದಷ್ಟು ಧಗೆ ಇರುತ್ತದೆ. ತೈಲ ಹಾಕಿಸಿಕೊಳ್ಳಲು ಹೋದಾಗ ಕೆಲ ಬಂಕ್‌ಗಳಲ್ಲಿ ಹತ್ತಾರು ನಿಮಿಷ ಕಾಯುವುದು ಅನಿವಾರ್ಯ. ಹೀಗೆ ನೆರಳಿರದ ಕಡೆ ಸರದಿಯಲ್ಲಿ ನಿಲ್ಲುವ ಗ್ರಾಹಕರ ಸ್ಥಿತಿ ಹೇಳತೀರದು. ಕಂಪನಿ ಕಾನೂನಿನ ಪ್ರಕಾರ ಕೆಲ ಬಂಕ್‌ಗಳಿಗೆ ಶೀಟ್‌ ವ್ಯವಸ್ಥೆ ಮಾಡುವಂತಿಲ್ಲ. ಮಧ್ಯಾಹ್ನದ ವೇಳೆ 40 ಡಿಗ್ರಿ  ಮೀರಿ ಬಿಸಿಲು ಇರುತ್ತದೆ. ಇದರಿಂದ ಗನ್‌ಗೆ ಇಂಧನ ಎತ್ತಿಕೊಡುವ ಮೋಟರ್‌ಗಳು ಏರ್‌ ಬ್ಲಾಕ್‌ ಆಗಿ ಸರಿಯಾಗಿ ಕೆಲಸ ಮಾಡುವುದಿಲ್ಲ. ಪದೇಪದೇ ನೀರನ್ನು ಹಾಕಿಕೊಂಡು ತಂಪಾಗಿಸಿ ಇಂಧನ ಹಾಕಲಾಗುತ್ತದೆ. ಕೆಲ ಸಲ ಅರ್ಧ ಗಂಟೆಯಾದರೂ ಮೋಟರ್‌ಗಳು ಸ್ಟಾರ್ಟ್‌ ಆಗುವುದಿಲ್ಲ. ಒಂದೇ ಬಂಕ್‌ ಇರುವ ಕಡೆ ಇದು ಗ್ರಾಹಕರಿಗೆ ಹೆಚ್ಚಿನ ಸಮಸ್ಯೆಯಾಗಿದೆ. ನೆರಳಿನ ವ್ಯವಸ್ಥೆ ಮಾಡಿಸಲು ಮಾಲೀಕರು ಸಿದ್ಧರಿದ್ದರೂ ಕಂಪನಿ ಮಾನದಂಡಗಳು ಅಡ್ಡವಾಗಿವೆ. ಇಂತಹ ಬಂಕ್‌ಗಳಿಗೆ ಕೆಲಸ ಮಾಡಲು ಸಿಬ್ಬಂದಿಯೂ ಬರುತ್ತಿಲ್ಲ ಎನ್ನಲಾಗಿದೆ. ಸರ್ಕಾರಿ ಸ್ವಾಮ್ಯದ ಬಂಕ್‌ಗಳಲ್ಲಿ ಈ ಸಮಸ್ಯೆ ಇಲ್ಲ. ಬಂಕ್‌ಗಳ ಮೇಲೆ ಶೀಟ್‌ ಹಾಕದಿರುವುದು ತಾಲ್ಲೂಕಿನ ಹವಾಮಾನಕ್ಕೆ ಮಾರಕವಾಗಿದ್ದು ಧಗೆ ಹೆಚ್ಚಿ ಅಗ್ನಿ ಅವಘಡ ಸಂಭವಿಸುವ ಸಾಧ್ಯತೆಯನ್ನು ತಳ್ಳಿಹಾಕುವಂತಿಲ್ಲ. ಸಂಬಂಧಪಟ್ಟವರು ಗಮನಹರಿಸಿ ನೆರಳಿನ ವ್ಯವಸ್ಥೆ ಕಲ್ಪಿಸಲು ಕ್ರಮ ಕೈಗೊಳ್ಳುವ ಅಗತ್ಯವಿದೆ ಎನ್ನುತ್ತಾರೆ ಗ್ರಾಹಕರು. ಇನ್ನು ಬಂಕ್‌ಗಳಲ್ಲಿ ಗ್ರಾಹಕರಿಗೆ ಶುದ್ಧ ಕುಡಿಯುವ ನೀರು ಶೌಚಾಲಯ ವಾಹನಗಳ ಚಕ್ರಗಳಿಗೆ ಗಾಳಿ ಹಾಕುವ ಯಂತ್ರ ಎಲ್ಲಿಯೂ ಕಾರ್ಯನಿರ್ವಹಿಸುತ್ತಿಲ್ಲ. ಬಂಕ್‌ಗಳ ಪರವಾನಗಿ ನವೀಕರಿಸುವ ಸಮಯದಲ್ಲಿ ಎಲ್ಲ ಸೌಲಭ್ಯಗಳನ್ನು ಹೊಂದಿವೆ ಎಂದೇ ಪ್ರಮಾಣ ಪತ್ರ ನೀಡಲಾಗುತ್ತಿದೆ. ಇದರಲ್ಲಿ ಅಧಿಕಾರಿಗಳ ಶಾಮೀಲಾಗಿರುವ ಅನುಮಾನವಿದೆ ಎಂಬ ಆರೋಪವಿದೆ.