ಡಾಕ್ಟ್ರು ಬರೀತಾರೆ ಹಕ್ಕಿಚಿತ್ರ–ಸಂದೇಶ ಪತ್ರ!

ನರಸಿಂಹನ್ ತಮ್ಮದೇ ಹಣ ವ್ಯಯಿಸಿ ತಾವೇ ಚಿತ್ರ ಬರೆದು ಪತ್ರ ಕಳುಹಿಸುತ್ತಿದ್ದಾರೆ. ಇದರ ಮೂಲಕ ಪರಿಸರದ ಬಗ್ಗೆ ಜಾಗೃತಿ ಮೂಡಿಸು ಕೆಲಸ ಮಾಡುತ್ತಿದ್ದಾರೆ. ಶಾಲೆಗಳಿಗೆ ಭೇಟಿ ನೀಡಿ ಮಕ್ಕಳಲ್ಲಿ ಪರಿಸರದ ಬಗ್ಗೆ ಜಾಗೃತಿ ಮೂಡಿಸುತ್ತಿದ್ದಾರೆ. ಕೊಡಗಿನಲ್ಲಿರುವ ಅಪರೂಪದ ಪಕ್ಷಿ ತಜ್ಞರು ಅವರು. ನಾನೂ ಅವರ ಪತ್ರ ಪಡೆದುಕೊಂಡಿದ್ದೇನೆ. ಈ ವರ್ಷ ಪ್ಲಾಸ್ಟಿಕ್‌ ಬಗ್ಗೆ ಜಾಗೃತಿ ಮೂಡಿಸುವ ಬರಹವನ್ನು ಪತ್ರದಲ್ಲಿ ಬರೆದಿದ್ದಾರೆ.

ಎಸ್.ವಿ.ನರಸಿಂಹನ್ ಅವರು ನನಗೆ ಪರಿಚಯವಾಗಿ 30 ವರ್ಷವಾಯಿತು. ಅಂದಿನಿಂದಲೂ ಅವರು ಅಂಚೆಪತ್ರದಲ್ಲಿ ಒಂದು ವನ್ಯಜೀವಿ ಚಿತ್ರ ಬರೆದು ಅದರಲ್ಲಿ ವನ್ಯಜೀವಿ ಸಂರಕ್ಷಣೆ ಕುರಿತ ಸಂದೇಶವನ್ನು ಬರೆದು ಕಳುಹಿಸುತ್ತಿದ್ದಾರೆ. ನನಗೆ ಪ್ರತೀ ವರ್ಷವೂ ಈ ಪತ್ರ ಬರುತ್ತಿದೆ. ಅವರು ಹೆಚ್ಚಿಗೆ ಚಿತ್ರ ಬರೆದಾಗ ಹೊಸಬರ ವಿಳಾಸ ಕೇಳುತ್ತಾರೆ. ಕೊಡಗಿನಲ್ಲಿರುವ ಹಕ್ಕಿಗಳ ಬಗ್ಗೆ ಅತ್ಯಂತ ನಿಖರವಾದ ಪುಸ್ತಕಗಳನ್ನೂ ಬರೆದಿದ್ದಾರೆ. ಈ ಮೂಲಕ ಅವರು ಜನರ ಮನಸ್ಸಿನಲ್ಲಿ ಪರಿಸರಕ್ಕೊಂದು ಜಾಗ ಸೃಷ್ಟಿಸುವ ಕೆಲಸ ಮಾಡುತ್ತಿದ್ದಾರೆ.