ವರುಣ ದೇವನಲ್ಲಿ ಮೊರೆ

ಇಂದ್ರಲೋಕದಲ್ಲಿ ಭಾರತದ ರಾಯಭಾರಿಯಾಗಿರುವ ಮನು ಅವರಿಗೆ ಗೃಹ ಮಂತ್ರಿ ಶೆಹನ್ ಶಾ ಕರೆ ಮಾಡಿ, ದೇಶದಲ್ಲೆಲ್ಲಾ ಹಬ್ಬಿರುವ ನೆರೆ ಹಾವಳಿಯ ತೀವ್ರತೆಯನ್ನು ವಿವರಿಸಿದರು. ಈ ಕೂಡಲೇ ವರುಣ ದೇವನನ್ನು ಭೇಟಿಯಾಗಿ ತುರ್ತು ಮಾತುಕತೆ ನಡೆಸಿ, ಪರಿಹಾರ ಕಂಡುಕೊಳ್ಳುವಂತೆ ಕೇಳಿಕೊಂಡರು. ಮನು ತಡಮಾಡಲಿಲ್ಲ. ತಕ್ಷಣ ಅಪಾಯಿಂಟ್ಮೆಂಟ್ ಕೂಡಾ ಸಿಕ್ಕಿತು.

. ಮನು ಅವರು ವರುಣ ದೇವನ ಎದುರು ಕುಳಿತುಕೊಂಡಿದ್ದರು. ‘ಹೇಳುವಂತವನಾಗು ಮನು. ಈಚೆಗೆ ಬಹಳ ಅಪರೂಪವಾಗಿದ್ದೀಯಲ್ಲ?’

. ‘ನಿಜ ಪ್ರಭು, ಈಚೆಗಿನ ದಿನಗಳಲ್ಲಿ ಮಳೆಗಾಗಿ ಮನವಿ ಸಲ್ಲಿಸೋಕೆ ತಮ್ಮಲ್ಲಿ ನಾನು ಬರುತ್ತಿಲ್ಲ. ನಮ್ಮ ದೇಶದಲ್ಲಿ ಈಗ ಜನರೇ ಮಹಾಪೂಜೆ, ಯಾಗ ಮಾಡಿ ತಮ್ಮ ಮನವೊಲಿಸುತ್ತಿದ್ದಾರಂತೆ’.

. ‘ಆದರೆ ನಿಮ್ಮ ಜನ ಮಳೆಗಾಗಿ ಕಪ್ಪೆ, ಕತ್ತೆಗಳಿಗೆಲ್ಲಾ ಮದುವೆ ಮಾಡುತ್ತಾರೆ ಎಂದು ಕೇಳಿದೆ. ಇದು ನನಗೆ ಮಾಡುವ ಅವಮಾನವಲ್ಲವೇ? ನಾನು ನಿಮ್ಮ ಜನರ ಮೇಲೆ ಸಿಕ್ಕಾಪಟ್ಟೆ ಕೋಪಗೊಂಡಿದ್ದೇನೆ’.

. ‘ಓಹ್, ಕ್ಷಮಿಸು ದೇವ, ನಾನು ಅದಕ್ಕೇ ಬಂದಿದ್ದು. ದಯವಿಟ್ಟು ತಕ್ಷಣ ಮಳೆಯ ಆರ್ಭಟ ನಿಲ್ಲಿಸಬೇಕೆಂದು ನಮ್ಮ ಗೃಹ ಮಂತ್ರಿಯವರು ಕೋರಿಕೊಂಡಿದ್ದಾರೆ’.

. ‘ಯಾರು... ಆ ಶೆಹನ್ ಶಾ ನಾ? ನನ್ನ ವಿಶೇಷಾಧಿಕಾರದ ಮೇಲೂ ಆ ಮನುಷ್ಯ ಕಣ್ಣಿಟ್ಟಿದ್ದಾನಾ? ಅವನಿಗೆ ಹೇಳು, ವಿಧಿ ಬರೆದಂತೆ ನಾನು ನಡೆದುಕೊಳ್ಳುತ್ತೇನೆ ಅಂತ’.

. ‘ಹಾಗಲ್ಲ ಮಹಾಪ್ರಭೋ! ಮಳೆ ಸುರಿಸುವುದು ತಮ್ಮ ಹಕ್ಕು ಎಂಬುದನ್ನು ಒಪ್ಕೋತೀನಿ... ಆದರೆ ದಿನಕ್ಕೆ ಐದೋ ಏಳೋ ಸೆಂಟಿ ಮೀಟರ್ನಷ್ಟು ಮಾತ್ರ ಮಳೆ ದಯಪಾಲಿಸು ಎಂದು ಕೋರಿಕೆ’.

. ‘ಏನಂದಿ? ನಾನೇನು ಅಳತೆ ಮಾಡಿ ಮಳೆ ಸುರಿಸುತ್ತಿದ್ದೀನಿ ಅಂದ್ಕೊಂಡಿದ್ದೀಯಾ?’

. ‘ಪ್ರಭು, ಅದು ಏನಾಗಿದೆಯೆಂದರೆ... ಅಳತೆ ಮೀರಿ ಮಳೆ ಸುರಿದ ಪರಿಣಾಮವಾಗಿ ದೇಶದ ಹಲವಾರು ಕಡೆಗಳಲ್ಲಿ ಪ್ರವಾಹವೇ ಬಂದ್ಬಿಟ್ಟಿದೆ!’

. ‘ನೋಡಪ್ಪಾ ಮನು, ಮಳೆ ಸುರಿಸುವುದು ಮಾತ್ರ ನನ್ನ ಕೆಲಸ. ಪ್ರವಾಹ ನನ್ನ ಡಿಪಾರ್ಟ್ಮೆಂಟಲ್ಲ’.

. ‘ಅದು ಸರಿ ದೇವಾ, ನಮ್ಮ ನಿವೇದನೆ ಏನೆಂದರೆ, ತಮ್ಮ ಬತ್ತಳಿಕೆಯಿಂದ ಜಡಿಮಳೆಯನ್ನು ಬಿಡಬಾರದೂಂತ ಅಷ್ಟೇ...’

. ‘ಜಡಿಮಳೆಗೆ ಕಾರಣವಿದೆ ಮನು. ಜನ ಕಷ್ಟದಲ್ಲಿದ್ದಾಗ ನಿಮ್ಮ ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳು ಅವರಿಗೆ ಯಾವ ರೀತಿಯಲ್ಲಿ ಸಹಾಯ ಮಾಡುತ್ತವೆ ಎಂದು ತಿಳಿದುಕೊಳ್ಳುವ ಕುತೂಹಲ ನನಗೆ’.

. ‘ಓಹ್! ಅಗ್ನಿಪರೀಕ್ಷೆ ಅಲ್ಲ... ಜಲಪರೀಕ್ಷೆ ಅನ್ನಿ!’

. ‘ಹೌದು, ಹಾಗನ್ನಬಹುದು. ಇಷ್ಟೆಲ್ಲಾ ಅನಾಹುತ ಆಗುತ್ತಿರುವಾಗ ಕರುನಾಟಕ ರಾಜ್ಯದಲ್ಲಿ ಮುಖ್ಯಮಂತ್ರಿ ಯೊಬ್ಬರೇ ಇದ್ದರಲ್ಲವೇ! ಅಲ್ಲಪ್ಪಾ, ಮಂತ್ರಿಗಳೇ ಇಲ್ಲದಿರುವಾಗ ‘ಮುಖ್ಯ’ಮಂತ್ರಿ ಎಂದು ಕರೆಸಿಕೊಳ್ಳಲು ಅವರಿಗೆ ನಾಚಿಕೆಯಾಗಲ್ವೆ?’

. ‘ಒಪ್ಕೋತೀನಿ ಪ್ರಭು... ಆದರೆ...’

. ‘ಏನು ಆದರೆ? ಕೋಟ್ಯಧಿಪತಿ ಶಾಸಕರು ನೆರೆ ಪರಿಹಾರ ನಿಧಿಗೆ ಚಿಕ್ಕಾಸೂ ಹಾಕುತ್ತಿಲ್ಲ ವೆಂದು ಕೇಳಿದ್ದೇನೆ. ಹೋಗಲಿ, ಸಂತ್ರಸ್ತರಿಗೆ ಸಹಾಯ ಮಾಡಲು ಎಷ್ಟು ಶಾಸಕರು ಮುಂದೆ ಬಂದಿದ್ದಾರೆ?’

. ‘ಅದು... ಅದು... ಪ್ರಭು... ಶಾಸಕರಲ್ಲಿ ಕೆಲವರಿಗೆ ನೆಗಡಿ ಆಗಿದೆಯಂತೆ. ಇನ್ನು ಕೆಲವರಿಗೆ ಜ್ವರ ಬಂದಿದೆ. ಈಚೆಗೆ ರೆಸಾರ್ಟ್ನಲ್ಲಿ ಹೊಟ್ಟೆ ಬಿರಿಯುವಷ್ಟು ತಿಂದಿದ್ದರಿಂದ ಕೆಲವರಿಗೆ ಇನ್ನೂ ಭೇದಿ ನಿಂತಿಲ್ಲವಂತೆ!’

. ‘ಈ ಎಕ್ಸ್ಕ್ಯೂಸ್ಗಳನ್ನ ಕೇಳೋಕೆ ನನಗಿಷ್ಟವಿಲ್ಲ. ಕನಿಷ್ಠ ಮೊಸಳೆ ಕಣ್ಣೀರನ್ನಾದರೂ ಹರಿಸುವ ರಾಜಕೀಯ ಮುಖಂಡರನ್ನು ನಿರೀಕ್ಷಿಸಿದ್ದೆ. ಆದರೆ ಕಂಡಿದ್ದೇನು? ಮನೆಯೊಂದರ ಮೇಲೆ ಸ್ವತಃ ಮೊಸಳೆಯೇ ಕಣ್ಣೀರು ಹರಿಸುತ್ತಾ ಕುಳಿತುಬಿಟ್ಟಿದೆ!’

. ‘ಇಲ್ಲ ಪ್ರಭೋ, ನಮ್ಮ ರಾಜಕಾರಣಿಗಳಿಗೆ ಏನಾದರೂ ಬುದ್ಧಿ ಬರಲ್ಲ. ಅವರ ಪರವಾಗಿ ನಾನು ಕ್ಷಮೆ ಕೇಳುತ್ತೇನೆ’.

. ‘ಆದರೆ ಕೆಲವರು ಈ ನೆರೆಯಿಂದಾಗಿ ಏಕ್ದಂ ಬದಲಾಗಿದ್ದಾರೆ. ಹಿರಿಯ ರಾಜಕಾರಣಿಯೊಬ್ಬರು ನೆರೆ ನೀರಿಗೆ ರಾಜಕೀಯ ಬೆರೆಸಬಾರದೆಂಬ ಸನ್ನಡತೆಯ ಮಾತನ್ನಾಡಿಲ್ಲವೇ! ಇದ್ದಕ್ಕಿದ್ದಂತೆ ಕನ್ನಡ ಟಿ.ವಿ ಚಾನೆಲ್ನೋರು ಚರ್ಚಾರಚಾಟ ಕಾರ್ಯಕ್ರಮಗಳನ್ನು ನಿಲ್ಲಿಸಿಬಿಟ್ಟಿಲ್ಲವೇ!’

. ‘ಬದಲಾಗಿದ್ದು ಅಷ್ಟೇ ಅಲ್ಲ ಪ್ರಭು... ಸಂತೃಪ್ತರೆಲ್ಲಾ ಈಗ ಸಂತ್ರಸ್ತರಾಗಿಬಿಟ್ಟಿದ್ದಾರೆ... ಅವರೆಲ್ಲಾ ತಮ್ಮ ಪ್ರೀತಿಯ ಮನೆ, ನೆಲ, ಹಸು, ಕರು, ಕುರಿ, ನಾಯಿಗಳನ್ನು ಕಳಕೊಂಡು ತುಂಬಾ ವೇದನೆ ಪಟ್ಟುಕೊಳ್ಳುತ್ತಿದ್ದಾರೆ ಪ್ರಭು’.

. ‘ಸರಿ, ನಿನ್ನ ಮಾತಿಗೆ ಬೆಲೆ ಕೊಟ್ಟು ಇನ್ನು ಮುಂದೆ ನೆರೆ ಬರುವಂತೆ ಮಳೆ ಸುರಿಸುವುದಿಲ್ಲ. ಆದರೆ ಒಂದು ಕಂಡೀಷನ್! ನಿಮ್ಮ ಜನರು ನದಿ ಜೋಡಣೆ, ಅರಣ್ಯ ನಾಶದಂತಹ ಪಾಪದ ಕಾರ್ಯಗಳನ್ನು ನಿಲ್ಲಿಸಬೇಕು!’ ರಾಯಭಾರಿ ಮನು ‘ನೆರೆ ಪರಿಹಾರ’ದೊಂದಿಗೆ ವರುಣ ದೇವನ ಆಸ್ಥಾನದಿಂದ ಹೊರಡುತ್ತಾನೆ.

. ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್ , ಎಕ್ಸ್ , ಫೇಸ್ಬುಕ್ ಮತ್ತು ಇನ್ಸ್ಟಾಗ್ರಾಂ ನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.

ವರುಣ ದೇವನಲ್ಲಿ ಮೊರೆ

ಚಿನಕುರುಳಿ | ಶುಕ್ರವಾರ, ನವೆಂಬರ್ 22 2024

ಚುರುಮುರಿ: ಐಪಿಎಲ್- ಬಿಪಿಎಲ್!

ದಿನ ಭವಿಷ್ಯ: ಈ ರಾಶಿಯವರಿಗೆ ದೇವತಾನುಗ್ರಹ ಸಂಪೂರ್ಣವಾಗಿ ಇರಲಿದೆ

ಮಾಜಿ ಸಚಿವ ಬಿ.ಸಿ. ನಾಗೇಶ್‌ ಮನೆಯಲ್ಲಿ ಬಿಜೆಪಿ ಭಿನ್ನಮತೀಯರು

ಸಿವಿಎಲ್‌ ಶಾಸ್ತ್ರಿ ಸ್ಮಾರಕ ಟಿಟಿ: ಅನರ್ಘ್ಯಾಗೆ ಕಿರೀಟ

ವೆಸ್ಟ್‌ ಇಂಡೀಸ್‌ ಕ್ರಿಕೆಟ್‌ ಆಟಗಾರರ ಭೇಟಿ ಮಾಡಿದ ಮೋದಿ

ಚೀನಾ ಮಾಸ್ಟರ್ಸ್‌ ಬ್ಯಾಡ್ಮಿಂಟನ್‌: ಸಾತ್ವಿಕ್‌–ಚಿರಾಗ್‌ ಜೋಡಿ ಸೆಮಿಗೆ

ಕೂಚ್‌ ಬಿಹಾರ್ ಟ್ರೋಫಿ ಕ್ರಿಕೆಟ್‌: ಫಾಲೊಆನ್‌ಗೆ ಒಳಗಾಗಿದ್ದ ಕರ್ನಾಟಕಕ್ಕೆ ಜಯ

ಒಳನೋಟ | ಪೈರಸಿ ಅಪಾರ, ದೂರು ವಿರಳ

ಒಳನೋಟ: ದಾಂಪತ್ಯ ಸಾಂಗತ್ಯಗಳ ಸುತ್ತ

ಒಳನೋಟ | ಹೆಜ್ಜೆ ಹೆಜ್ಜೆಗೂ ಎಸ್‌ಐಟಿ ತನಿಖೆ

ಒಳನೋಟ | ‘ಅಕ್ರಮ ವಲಸೆ’: ನೆಲೆ ವಿಸ್ತಾರ

ಚಿನಕುರುಳಿ | ಶುಕ್ರವಾರ, ನವೆಂಬರ್ 22 2024

ಚುರುಮುರಿ: ಐಪಿಎಲ್- ಬಿಪಿಎಲ್!

ದಿನ ಭವಿಷ್ಯ: ಈ ರಾಶಿಯವರಿಗೆ ದೇವತಾನುಗ್ರಹ ಸಂಪೂರ್ಣವಾಗಿ ಇರಲಿದೆ

ಮಾಜಿ ಸಚಿವ ಬಿ.ಸಿ. ನಾಗೇಶ್‌ ಮನೆಯಲ್ಲಿ ಬಿಜೆಪಿ ಭಿನ್ನಮತೀಯರು