ಬೆಳಗಾವಿ: ಆರಂಭವಾಗದ ಬಿಎಸ್‌ಡಬ್ಲ್ಯು, ಬಿ.ಎಸ್ಸಿ ಕೋರ್ಸ್‌

ಪದವಿ ಶಿಕ್ಷಣ ಪಡೆಯಲು ಮಹಿಳೆಯರಿಗೆ ಅನುಕೂಲವಾಗಲೆಂದು ರಾಜ್ಯ ಸರ್ಕಾರ 2014–15ರಲ್ಲಿ ಬೆಳಗಾವಿಯಲ್ಲಿ ಸರ್ಕಾರಿ ಪ್ರಥಮ ದರ್ಜೆ ಮಹಿಳಾ ಕಾಲೇಜು ಆರಂಭಿಸಿದೆ. ಇದು ವಿಜಯಪುರದ ಅಕ್ಕಮಹಾದೇವಿ ಮಹಿಳಾ ವಿಶ್ವವಿದ್ಯಾಲಯ ವ್ಯಾಪ್ತಿಗೆ ಒಳಪಟ್ಟಿದೆ. ಇದಕ್ಕೆ ಸ್ವಂತ ಕಟ್ಟಡ ಇಲ್ಲದ್ದರಿಂದ ಸರ್ಕಾರಿ ಸರ್ದಾರ್ ಪದವಿಪೂರ್ವ ಕಾಲೇಜಿನ 14 ಕೊಠಡಿಗಳನ್ನೇ ಮಧ್ಯಾಹ್ನದ ಅವಧಿಯಲ್ಲಿ ಪದವಿ ಕಾಲೇಜಿಗೆ ಬಳಸಿಕೊಳ್ಳಲಾಗುತ್ತಿದೆ.

ಆದರೆ, ಪಿಯು ಕಾಲೇಜಿನಲ್ಲಿ ಲಭ್ಯವಿರುವ ಕೊಠಡಿ ಬಿ.ಎ(ಕಲಾ ಪದವಿ) ಮತ್ತು ಬಿ.ಕಾಂ(ವಾಣಿಜ್ಯ ಪದವಿ) ತರಗತಿ ಸಂಘಟಿಸಲಷ್ಟೇ ಸಾಲುತ್ತಿವೆ. ಅಲ್ಲಿ 680 ವಿದ್ಯಾರ್ಥಿನಿಯರು ಓದುತ್ತಿದ್ದಾರೆ. ಹೆಚ್ಚುವರಿ ಕೊಠಡಿ ಇಲ್ಲದ್ದರಿಂದ ಬಿ.ಎಸ್ಸಿ ಮತ್ತು ಬಿಎಸ್‌ಡಬ್ಲ್ಯು ಕೋರ್ಸ್‌ಗಳ ಆರಂಭಕ್ಕೆ ಹಿನ್ನಡೆಯಾಗಿದೆ.

ಬೇಕಿದೆ 10 ಹೆಚ್ಚುವರಿ ಕೊಠಡಿ:

‘ಬಿ.ಎಸ್ಸಿ, ಬಿಎಸ್‌ಡಬ್ಲ್ಯು ಕೋರ್ಸ್‌ ಆರಂಭಿಸಲು ವಿದ್ಯಾರ್ಥಿಗಳಿಂದ ಬೇಡಿಕೆ ಹೆಚ್ಚಿದೆ. ಆದರೆ, ರಸಾಯನ ವಿಜ್ಞಾನ, ಭೌತ ವಿಜ್ಞಾನ, ಕಂಪ್ಯೂಟರ್ ಸೈನ್ಸ್ ವಿಷಯಗಳ ಪ್ರಯೋಗಾಲಯ ನಿರ್ಮಾಣ ಸೇರಿದಂತೆ ಬೋಧನೆಗಾಗಿ ಕನಿಷ್ಠ 10 ಹೆಚ್ಚುವರಿ ಕೊಠಡಿ ಬೇಕಿದೆ’ ಎನ್ನುತ್ತಾರೆ ಉಪನ್ಯಾಸಕರು.

ಮೂರು ಕಡೆ ಬಿಎಸ್‌ಡಬ್ಲ್ಯು ಕೋರ್ಸ್‌

‘ಭೌಗೋಳಿಕವಾಗಿ ದೊಡ್ಡದಾಗಿರುವ ಬೆಳಗಾವಿ ಜಿಲ್ಲಾ ಕೇಂದ್ರದ ಯಾವ ಕಾಲೇಜಿನಲ್ಲೂ ಬಿಎಸ್‌ಡಬ್ಲ್ಯು ಕೋರ್ಸ್‌ ಇಲ್ಲ. ಈ ಕೋರ್ಸ್‌ ಓದಬೇಕಾದರೆ ನಾವು ಮೂಡಲಗಿಯ ಸರ್ಕಾರಿ ತುಕ್ಕಾನಟ್ಟಿ ಮತ್ತು ನಿಪ್ಪಾಣಿ ತಾಲ್ಲೂಕಿನ ನನದಿ ಖಾಸಗಿ ಕಾಲೇಜಿಗೆ ಹೋಗಬೇಕಿದೆ. ಕಲಿಕೆಗಾಗಿ ಬೆಳಗಾವಿಯಿಂದ ನಿತ್ಯ ಅಲ್ಲಿಗೆ ಹೋಗಿಬರುವುದು ಕಷ್ಟ. ಹಾಗಾಗಿ ಈ ಕೋರ್ಸ್‌ ಗೊಡವೆಯೇ ಬೇಡವೆಂದು ಬಿ.ಎ ಮತ್ತು ಬಿ.ಕಾಂ ಕೋರ್ಸ್‌ ಓದುತ್ತಿದ್ದೇವೆ’ ಎಂದು ವಿದ್ಯಾರ್ಥಿನಿಯರು ಅಸಹಾಯಕತೆ ವ್ಯಕ್ತಪಡಿಸಿದರು.

‘ಬೆಳಗಾವಿಯಲ್ಲಿ ಬಿ.ಎಸ್ಸಿ ಅಧ್ಯಯನಕ್ಕಾಗಿ ಮಹಿಳಾ ಕಾಲೇಜು ಬಿಟ್ಟರೆ ಬೇರೆ ಸರ್ಕಾರಿ ಪದವಿ ಕಾಲೇಜು ಇಲ್ಲ. ಖಾಸಗಿ ಕಾಲೇಜಿನಲ್ಲಿ ಪ್ರವೇಶ ಪಡೆಯುವುದೂ ನಮಗೆ ದುಬಾರಿಯಾಗಿದೆ. ಇಲ್ಲಿ ಬಿ.ಎಸ್ಸಿ ಕೋರ್ಸ್‌ ಆರಂಭಿಸಿದರೆ ಅನುಕೂಲವಾಗುತ್ತದೆ’ ಎಂಬುದು ವಿದ್ಯಾರ್ಥಿಗಳ ಆಗ್ರಹ.