ಪ್ರವಾಹ ಸಂತ್ರಸ್ತರ ಪರದಾಟ: ‘ಬಾಡಿಗಿ ಮನ್ಯಾಗ ಮಗಳ ಬಾಣಂತನ ಮಾಡಬೇಕಾಗೇತ್ರಿ’

‘ಪೂರ್ಣಪ್ರಮಾಣದಲ್ಲಿ ಮನೆ ಬಿದ್ದವರಿಗೆ ಐದು ಹಂತಗಳಲ್ಲಿ ₹5 ಲಕ್ಷ ಪರಿಹಾರ ಕೊಡಲಾಗುತ್ತಿದೆ. ಪ್ರತಿ ಹಂತದ ಕಾಮಗಾರಿ ಮುಗಿದ ತಕ್ಷಣ ಒಂದು ಕಂತಿನ ಹಣ ಬಿಡುಗಡೆಯಾಗುತ್ತದೆ. ಈಗ ಜಿಪಿಎಸ್ ಮಾಡಿರುವ ವಿವಿಧ ಹಂತಗಳ ಮನೆಗಳಿಗೆ ರಾಜೀವ್ ಗಾಂಧಿ ಗ್ರಾಮೀಣ ವಸತಿ ನಿಗಮದಿಂದ ₹59 ಕೋಟಿ ಪರಿಹಾರ ಬರಬೇಕಿದೆ. ಅದು ಶೀಘ್ರ ಬಿಡುಗಡೆಯಾಗಲಿದೆ’ ಎಂದು ಜಿಲ್ಲಾಧಿಕಾರಿ ನಿತೇಶ್ ಪಾಟೀಲ ‘ಪ್ರಜಾವಾಣಿ’ಗೆ ಪ್ರತಿಕ್ರಿಯಿಸಿದರು. ‘ಶಿವಪೇಟೆಯ ತಗಡಿನ ಶೆಡ್‍ಗಳಲ್ಲಿ ತಾತ್ಕಾಲಿಕವಾಗಿ ಆಶ್ರಯ ಪಡೆದವರಿಗೆ ಮೂಲಸೌಕರ್ಯ ಒದಗಿಸಲಾಗುವುದು’ ಎಂದರು.

ಮಳೆಗಾಲ ಆರಂಭವಾದರೆ ನರಗುಂದ ಹಾಗೂ ರೋಣ ತಾಲ್ಲೂಕಿನ ಕೆಲವು ಹಳ್ಳಿಗಳಲ್ಲಿ ವಾಸಿರುವ ಜನರ ಎದೆಯಲ್ಲಿ ನಡುಕ ಶುರುವಾಗುತ್ತದೆ. ಬೆಳಗಾವಿ ಭಾಗದಲ್ಲಿ ಹೆಚ್ಚು ಮಳೆ ಸುರಿದರೆ ನರಗುಂದ ತಾಲ್ಲೂಕಿನ ಲಖಮಾಪುರ ವಾಸನ ಕೊಣ್ಣೂರ ಸೇರಿದಂತೆ ಸುತ್ತಮುತ್ತಲಿನ ಕೆಲವು ಹಳ್ಳಿಗಳ ಮನೆಗಳಿಗೆ ಮಲಪ್ರಭೆ ನೀರು ನುಗ್ಗುತ್ತದೆ. ಜಮೀನುಗಳು ಜಲಾವೃತಗೊಳ್ಳುತ್ತವೆ. ಅತಿಯಾದ ಮಳೆಯಾದರಂತೂ ಲಖಮಾಪುರ ಹೊರ ಜಗತ್ತಿನ ಸಂಪರ್ಕವನ್ನೇ ಕಳೆದುಕೊಳ್ಳುತ್ತದೆ. ಪ್ರವಾಹ ಸಂದರ್ಭದಲ್ಲಿ ಈ ಊರಿನ ಜನಗಳಿಗೆ ಜಿಲ್ಲಾಡಳಿತ ತಾತ್ಕಾಲಿಕವಾಗಿ ಕಾಳಜಿ ಕೇಂದ್ರಗಳನ್ನು ತೆರೆಯುತ್ತದೆ. ಊಟ ಔಷಧೋಪಚಾರ ನೀಡುತ್ತದೆ. ಜನ ಜಾನುವಾರುಗಳೊಂದಿಗೆ ಕಾಳಜಿ ಕೇಂದ್ರ ತಾತ್ಕಾಲಿಕ ಶೆಡ್‌ಗಳಲ್ಲಿ ವಾಸಿಸುವ ಜನರು ನೆರೆ ಇಳಿದ ನಂತರ ಮತ್ತೇ ಊರಿಗೆ ಮರಳುತ್ತಾರೆ. ಆದರೆ ಆ ವೇಳೆಗಾಗಲೇ ಬದುಕು ಮೂರಾಬಟ್ಟೆಯಾಗಿರುತ್ತದೆ. ಕೈ ಸೇರಬೇಕಿದ್ದ ಬೆಳೆಗಳನ್ನೆಲ್ಲಾ ನೀರು ಆಪೋಶನ ಪಡೆದಿರುವುದರಿಂದ ರೈತರು ದಿಕ್ಕತೋಚದ ಸ್ಥಿತಿ ತಲುಪಿರುತ್ತಾರೆ. ಸರ್ಕಾರ ಪುಡಿಗಾಸು ಪರಿಹಾರ ನೀಡಿ ಕಣ್ಣೀರು ಒರೆಸುತ್ತದೆ. ಪ್ರತಿವರ್ಷ ಪ್ರವಾಹ ಬಂದಾಗಲೂ ಇದೇ ಚಿತ್ರಣ ಇಲ್ಲಿ ಪುನರಾವರ್ತನೆಯಾಗುತ್ತದೆಯೇ ಹೊರತು ಈವರೆಗೆ ಶಾಶ್ವತ ಪರಿಹಾರ ಸಿಕ್ಕಿಲ್ಲ. ಲಖಮಾಪುರ ಗ್ರಾಮಸ್ಥರು ಇಡೀ ಗ್ರಾಮವನ್ನೇ ಸ್ಥಳಾಂತರಿಸುವ ಮೂಲಕ ನಮಗೆ ಶಾಶ್ವತ ಪರಿಹಾರ ಒದಗಿಸಬೇಕು ಎಂದು 2020 ಪ್ರವಾಹ ಸಂದರ್ಭದಲ್ಲಿ ಪಟ್ಟು ಹಿಡಿದಿದ್ದರು. ಅದಕ್ಕೆ ಒಪ್ಪಿದ್ದ ಅಂದಿನ ಜಿಲ್ಲಾಧಿಕಾರಿ ಎಂ.ಸುಂದರೇಶ್‌ ಬಾಬು ಅವರು ಜಾಗ ಗುರುತಿಸುವಂತೆ ಅಧಿಕಾರಿಗಳಿಗೆ ಸೂಚಿಸಿದ್ದರು. ಆದರೆ ಲಖಮಾಪುರ ಗ್ರಾಮಸ್ಥರು ಬೆಳಗಾವಿ ಜಿಲ್ಲೆಯ ರಾಮದುರ್ಗ ತಾಲ್ಲೂಕಿನ ಜಮೀನು ತೋರಿಸಿದ್ದರು. ಒಂದು ಜಿಲ್ಲೆಯ ಊರನ್ನು ಮತ್ತೊಂದು ಜಿಲ್ಲೆಗೆ ಸೇರಿಸುವುದು ಆಡಳಿತಾತ್ಮಕವಾಗಿ ಕಠಿಣ ಪ್ರಕ್ರಿಯೆಯಾದ್ದರಿಂದ ಸಮಸ್ಯೆ ಇನ್ನೂ ಜೀವಂತವಾಗಿದೆ. ಹಾಗಾಗಿ ಪರಿಸ್ಥಿತಿ ಇಂದಿಗೂ ಬದಲಾಗಿಲ್ಲ. ಲಖಮಾಪುರ ಗ್ರಾಮ ಸಂಪರ್ಕಿಸಲು ನೆರವಾಗುವಂತೆ ಸೇತುವೆ ನಿರ್ಮಾಣಗೊಂಡಿರುವುದು ಅಲ್ಲಿನ ಜನರಲ್ಲಿ ತುಸು ಸಮಾಧಾನ ತರಿಸಿದೆ. ಕೊಣ್ಣೂರಿನ ಹೊಸ ಎಪಿಎಂಸಿ ಅವರಣದಲ್ಲಿ ಪ್ರವಾಹ ‌ಮುಂಜಾಗ್ರತೆಯೋ ಅಥವಾ ಪದೇ ಪದೇ ಹಾಕಲು ಅಸಾಧ್ಯವೋ ಎಂಬ ಕಾರಣಕ್ಕೆ ತಾತ್ಕಾಲಿಕ ಶೆಡ್‌ಗಳು ಇಂದಿಗೂ ಹಾಗೆ ಇವೆ. ಅಲ್ಲಿನ ಕೆಲವೊಂದು ಶೆಡ್‌ಗಳಲ್ಲಿ ಸಂತ್ರಸ್ತರು ನಿರಾಶ್ರಿತರ ‌ಅಪೂರ್ಣ ಮನೆಯಾದವರು ವಾಸಿಸುತ್ತಿದ್ದಾರೆ. ಅದೇರೀತಿ ಕುರ್ಲಗೇರಿ ಸುರಕೋಡ ಯಾವಗಲ್ ಯಾ‌ಸ ಹಡಗಲಿ ಸೇರಿದಂತೆ ರೋಣ ತಾಲ್ಲೂಕಿನ ಕೆಲವು ಹಳ್ಳಿಗಳು ಬೆಣ್ಣೆಹಳ್ಳದ ಪ್ರವಾಹದದಿಂದ ಪ್ರತಿ ವರ್ಷ ಪ್ರವಾಹದ ಸಂಕಷ್ಟ ಎದುರಿಸುತ್ತಿವೆ.