ಆಕ್ರಮಣಕಾರಿ ಧೋರಣೆ: ಬೆಂಗಳೂರು ಗಣೇಶ, ಮಣಿಕಂಠನಿಗೆ ಗಡಿಪಾರು ಶಿಕ್ಷೆ !

ಈ ಎರಡೂ ಆನೆಗಳನ್ನು ಕ್ಯಾಂಪಿನಿಂದ ದೂರದಲ್ಲಿ ಕಾಡಿನಲ್ಲಿ ಒಂಟಿಯಾಗಿ ಕಟ್ಟಿ ಹಾಕಲಾಗುತ್ತಿದೆ. ನಿತ್ಯ ಅಲ್ಲಿಗೇ ಆಹಾರ ಒಯ್ದು ಕೊಡಲಾಗುತ್ತಿದೆ. ಬೆಂಗಳೂರು ಗಣೇಶ ಕಳೆದ 10 ವರ್ಷಗಳಿಗೂ ಹೆಚ್ಚು ಅವಧಿಯಿಂದ ಈ ರೀತಿ ಒಂಟಿ ಜೀವನದ ಶಿಕ್ಷೆಗೆ ಒಳಗಾಗಿದ್ದಾನೆ. ಮಣಿಕಂಠ ಎರಡು ತಿಂಗಳಿನಿಂದ ಕಾಡು ಪಾಲಾಗಿದ್ದಾನೆ.

ಬೆಂಗಳೂರಿನ ಬನ್ನೇರುಘಟ್ಟ ರಾಷ್ಟ್ರೀಯ ಉದ್ಯಾನದಲ್ಲಿದ್ದ ಗಣೇಶನನ್ನು (48) ಅಲ್ಲಿ ಪುಂಡಾಟದ ಕಾರಣಕ್ಕೆ 15 ವರ್ಷಗಳ ಹಿಂದೆ ಸಕ್ರೆಬೈಲಿಗೆ ತರಲಾಗಿದೆ. ಬೆಂಗಳೂರು ಗಣೇಶನನ್ನು ಐದನೇ ಮೈಲಿಕಲ್‌ ಬಳಿಯ ಕಾಡಿನಲ್ಲಿ ಉದ್ದನೆಯ ಸರಪಳಿಯಲ್ಲಿ ಬಿಗಿದು ಮರಕ್ಕೆ ಕಟ್ಟಿ ಹಾಕಲಾಗುತ್ತಿದೆ. ಮಾವುತ–ಕಾವಾಡಿ ದೂರದಿಂದಲೇ ಆಹಾರ ಕೊಡುತ್ತಾರೆ. 46 ವರ್ಷದ ಮಣಿಕಂಠನನ್ನು ಚಿಕ್ಕಮಗಳೂರು ಬಳಿಯ ಕಾಡಿನಲ್ಲಿ ಸೆರೆ ಹಿಡಿದು ತರಲಾಗಿದೆ. ಅವನನ್ನು ಅಲ್ಲಿಯೇ ಸಮೀಪದ ಕಾಡಿನಲ್ಲಿ ಕಟ್ಟಿಹಾಕಲಾಗಿದೆ ಎಂದು ಮೂಲಗಳು ತಿಳಿಸಿವೆ.

ತರಬೇತಿ ಸರಿಯಾಗಿ ಆಗಿಲ್ಲ:

ಈ ಎರಡೂ ಆನೆಗಳು ಮಾವುತ, ಕಾವಾಡಿಯ ಮಾತು ಕೇಳುವುದಿಲ್ಲ. ಮಣಿಕಂಠ ಈಚೆಗೆ ಸಕ್ರೆಬೈಲು ಕ್ಯಾಂಪ್‌ ಬಳಿ ಕಾವಾಡಿಯನ್ನೇ ಅಟ್ಟಿಸಿಕೊಂಡು ಹೋಗಿದ್ದ. ಸಕ್ರೆಬೈಲಿನ ತುಂಗಾ ಹಿನ್ನೀರಿನಲ್ಲಿ ಸ್ನಾನ ಮಾಡಿಸುವಾಗ ಮತ್ತೊಂದು ಆನೆಯ ಜೊತೆ ಹೊಡೆದಾಟಕ್ಕಿಳಿದು ಅದನ್ನು ಆಳ ನೀರಿಗೆ ತಳ್ಳಿಕೊಂಡು ಹೋಗಿದ್ದ. ಬೆಂಗಳೂರು ಗಣೇಶ ಕೂಡ ಆಕ್ರಮಣಕಾರಿ ಪ್ರವೃತ್ತಿಯವ. ಖೆಡ್ಡಾದಲ್ಲಿ (ಕ್ರಾಲ್‌) ಸರಿಯಾಗಿ ತರಬೇತಿ ಆಗದ ಕಾರಣ ಅವುಗಳಲ್ಲಿ ಇನ್ನೂ ಕಾಡಿನ ಆಕ್ರಮಣಕಾರಿ ಗುಣ ಹೋಗಿಲ್ಲ. ಕ್ಯಾಂಪಿಗೆ ಪ್ರವಾಸಿಗರು ಬರುವುದರಿಂದ ಅವರ ಮೇಲೆ ದಾಳಿ ಮಾಡಿದರೆ ಸಮಸ್ಯೆ ಆಗಲಿದೆ ಎಂದೂ, ಬೇರೆ ಆನೆಗಳು ಹಾಗೂ ಸಿಬ್ಬಂದಿಯ ಹಿತದೃಷ್ಟಿಯಿಂದ ಅವುಗಳನ್ನು ಕ್ಯಾಂಪ್‌ನಿಂದ ಹೊರಗೆ ಕಾಡಿನಲ್ಲಿ ಇಡಲಾಗಿದೆ ಎಂದು ಸಕ್ರೆಬೈಲು ಆನೆ ಕ್ಯಾಂಪಿನ ಅಧಿಕಾರಿಯೊಬ್ಬರು ಹೇಳುತ್ತಾರೆ.

ಒಂಟಿಯಾಗಿ ಇಡುವುದು ಅಮಾನವೀಯ:

‘ಆನೆಯು ಷಡ್ಯೂಲ್– 1 ಪ್ರಾಣಿ. ಅದು ಸಂಘ ಜೀವಿ. ಪಳಗಿದ ಮೇಲೆ ಹೆಣ್ಣಾನೆ ಸೇರಿದಂತೆ ಬೇರೆ ಆನೆಗಳು ಹಾಗೂ ಜನರ ನಡುವೆಯೇ ಅದು ಇರಬೇಕು. ಕಾಡಿನಲ್ಲಿ ಆ ರೀತಿ ಒಂಟಿಯಾಗಿ ಕಟ್ಟಿ ಹಾಕುವುದು ಕ್ರೌರ್ಯ. ಉದ್ದನೆಯ ಚೈನ್‌ನಿಂದ  ಯಾವುದೋ ಮರಕ್ಕೆ ಕಟ್ಟಿ ಬರಲಾಗುತ್ತಿದೆ. ಅದು ಕೋಪಕ್ಕೆ ಸುತ್ತಲಿನ ಮರಗಳನ್ನು ಕೆಡವುತ್ತದೆ. ಇದರಿಂದ ಅರಣ್ಯಕ್ಕೂ ಹಾನಿ. ಗಾಯಗೊಂಡರೆ ಚಿಕಿತ್ಸೆ ಕೊಡುವುದು ಕಷ್ಟ. ಅದರ ಬದಲಿಗೆ ಅವುಗಳ ವರ್ತನೆ ಸರಿಪಡಿಸುವ ಕೆಲಸ ಆಗಬೇಕು. ಕಾಡಿನಲ್ಲಿ ಒಂಟಿ ಆಗಿ ಕಟ್ಟಿ ಹಾಕಿದ ಸ್ಥಿತಿಯಲ್ಲಿ ಇರುವಾಗ ಬೇರೆ ಕಾಡಾನೆಗಳು ದಾಳಿ ಮಾಡಿದರೆ ಜೀವಕ್ಕೆ ಅಪಾಯ ಆಗಲಿದೆ. ಗಾಯಗೊಂಡರೆ ಚಿಕಿತ್ಸೆ ನೀಡಲು ಕಷ್ಟವಾಗುತ್ತದೆ. ಆ ಎರಡೂ ಆನೆಗಳನ್ನು ಮತ್ತೆ ಸಕ್ರೆಬೈಲು ಕ್ಯಾಂಪಿಗೆ ಕರೆತರಲು ಅರಣ್ಯ ಇಲಾಖೆ ಮುಂದಾಗಲಿ’ ಎಂದು ಶಿವಮೊಗ್ಗ ಪ್ರಾಣಿ ದಯಾ ಸಂಘದ ಪದಾಧಿಕಾರಿಯೊಬ್ಬರು ಒತ್ತಾಯಿಸುತ್ತಾರೆ.

ಈ ಬಾರಿ ಇಲ್ಲ ಆನೆ ಮೇಲೆ ಅಂಬಾರಿ!

‘ಹೆಣ್ಣಾನೆಗಳು ಲಭ್ಯವಿಲ್ಲದ ಕಾರಣ ಈ ಬಾರಿಯ ಶಿವಮೊಗ್ಗ ದಸರಾ ಉತ್ಸವದಲ್ಲಿ  ಆನೆ ಮೇಲೆ ಅಂಬಾರಿ ಮೆರವಣಿಗೆ ಇಲ್ಲ. ಕಳೆದ ವರ್ಷದಂತೆ ಈ ಬಾರಿಯೂ ವಾಹನದಲ್ಲಿ ಚಾಮುಂಡೇಶ್ವರಿ ದೇವಿಯ ಪುತ್ಥಳಿ ಇಟ್ಟು ಮೆರವಣಿಗೆಯಲ್ಲಿ ಕೊಂಡೊಯ್ಯಲಾಗುತ್ತಿದೆ. ಆದರೆ ಸಾಗರ ಸೇರಿದಂತೆ ಮೂರು ಗಂಡಾನೆಗಳು ಮೆರವಣಿಗೆಯಲ್ಲಿ ಹೆಜ್ಜೆ ಹಾಕಲಿವೆ. ಈ ಬಗ್ಗೆ ಮಹಾನಗರ ಪಾಲಿಕೆ ಆಡಳಿತಕ್ಕೂ ಮೌಖಿಕವಾಗಿ ಮಾಹಿತಿ ನೀಡಲಾಗಿದೆ’ ಎಂದು ಅರಣ್ಯ ಇಲಾಖೆ ಮೂಲಗಳು ತಿಳಿಸಿವೆ. ಈ ಬಗ್ಗೆ ಪ್ರತಿಕ್ರಿಯೆ ಪಡೆಯಲು ಆಯುಕ್ತೆ ಡಾ.ಕವಿತಾ ಯೋಗಪ್ಪನವರ್  ಕರೆ ಸ್ವೀಕರಿಸಲಿಲ್ಲ.