ಇಂಡಿ ಪ್ರತ್ಯೇಕ ಜಿಲ್ಲೆ ರಚನೆಗೆ ‘ಮುನ್ನುಡಿ’

ವಿಜಯಪುರ: ಸಿಂದಗಿ ಆಲಮೇಲೆ ದೇವರಹಿಪ್ಪರಗಿ ಮತ್ತು ಚಡಚಣ ಭಾಗದ ಜನರು ಮತ್ತು ಜನಪ್ರತಿನಿಧಿಗಳು ಇಂಡಿ ಪ್ರತ್ಯೇಕ ಜಿಲ್ಲೆ ರಚನೆಗೆ ಕೈಜೋಡಿಸಬೇಕು ಎಂದು ಶಾಸಕ ಯಶವಂತರಾಯಗೌಡ ಪಾಟೀಲ ಮನವಿ ಮಾಡಿದ್ದಾರೆ. ‘ಪ್ರಜಾವಾಣಿ’ಯೊಂದಿಗೆ ಮಾತನಾಡಿದ ಅವರು ಜಿಲ್ಲಾ ಕೇಂದ್ರ ರಾಜಧಾನಿಯಿಂದ ದೂರ ಇರುವುದರಿಂದ ಹಾಗೂ ಮಹಾರಾಷ್ಟ್ರದ ಗಡಿಯಲ್ಲಿರುವುದರಿಂದ ಅಭಿವೃದ್ಧಿಯಿಂದ ಬಹಳಷ್ಟು ವಂಚಿತವಾಗಿದ್ದೇವೆ. ಸತತ ಬರ ಪೀಡಿತ ಪ್ರದೇಶವಾಗಿದೆ. ಅಲ್ಲದೇ ಭೀಮಾ ತೀರದಲ್ಲಿ ಅಪರಾಧ ಚಟುವಟಿಕೆಗಳು ಹೆಚ್ಚು. ಇದನೆಲ್ಲ ನಿಯಂತ್ರಿಸಿ ಅಭಿವೃದ್ಧಿಯತ್ತ ನಮ್ಮ ಪ್ರದೇಶ ಕೊಂಡೊಯ್ಯಲು ಪ್ರತ್ಯೇಕ ಜಿಲ್ಲೆ ರಚನೆಯಾಗುವುದು ಸೂಕ್ತ ಎಂದರು.  ಜಿಲ್ಲೆಯಾಗುವ ಎಲ್ಲ ಅರ್ಹತೆ ಇಂಡಿಗೆ ಇದೆ. ತಾಲ್ಲೂಕಿನಲ್ಲಿ 74 ಹಳ್ಳಿ ಇವೆ. ರೈಲ್ವೆ ಬ್ರಾಡ್‌ಗೇಜ್‌ ಇದೆ ಎರಡು ರಾಷ್ಟ್ರೀಯ ಹೆದ್ದಾರಿ ಇವೆ ಮೂಲಸೌಲಭ್ಯಗಳು ಇವೆ ಕೃಷಿ ವಿಜ್ಞಾನ ಕೇಂದ್ರ ಇದೆ ಸಕ್ಕರೆ ಕಾರ್ಖಾನೆ ಇವೆ ಲಿಂಬೆ ಅಭಿವೃದ್ಧಿ ಪ್ರಾಧಿಕಾರ ಇದೆ ಕೈಗಾರಿಕಾ ಪ್ರದೇಶ ಇದೆ. ಮಿನಿ ವಿಧಾನಸೌಧ ತಾಲ್ಲೂಕು ಆಸ್ಪತ್ರೆ ಕ್ರೀಡಾಂಗಣ ಇದೆ. ಜಿಲ್ಲೆಯಾಗಲು ಯಾವುದೇ ಕೊರತೆ ಇಲ್ಲ ಎಂದರು. ಈ ಮೊದಲು ನಮ್ಮ ಜಿಲ್ಲೆಯೂ 371 ಜೆ ಗೆ ಸೇರ್ಪಡೆಯಾಗಿದ್ದರೆ ನಮ್ಮ ಭಾಗಕ್ಕೆ ಅನುಕೂಲವಾಗುತ್ತಿತ್ತು. ಆದರೆ ಸಾಧ್ಯವಾಗಿಲ್ಲ. ಈಗಲಾದರೂ ಸೇರ್ಪಡೆಯಾದರೆ ನಮ್ಮ ಭಾಗದ ಮಕ್ಕಳ ಶೈಕ್ಷಣಿಕ ಔದ್ಯೋಗಿಕ ಅಭಿವೃದ್ಧಿ ಸಾಧ್ಯವಾಗಲಿದೆ ಎಂದು ಹೇಳಿದರು.