‘ನಾವೀಗ ಸಮಾಜದಲ್ಲಿ ಬಿತ್ತುತ್ತಿರುವುದು ಜನವಿರೋಧಿ, ಸ್ತ್ರೀ ವಿರೋಧ ಮೌಲ್ಯಗಳನ್ನು. ಅದರ ಬದಲು ಮನುಷ್ಯಪರ, ಸ್ತ್ರೀ ಪರ ಮೌಲ್ಯಗಳನ್ನು ಬಿತ್ತಬೇಕಿತ್ತು. ಇಂದು ಹೀಗಾಗುತ್ತಿಲ್ಲ. ಹೆಣ್ಣು ಬೇಡ ಎನ್ನುವುದಕ್ಕೆ ಹಲವು ಸ್ಥರದ ಕಾರಣಗಳಿವೆ. ‘ಬೇಟಿ ಬಚಾವೊ ಬೇಟಿ ಪಡಾವೊ’ ಎಂದು ಹೇಳಿದರೆ ಸಾಲದು. ಅದರ ಜಾರಿ ಯಾವ ರೀತಿಯಲ್ಲಿದೆ ಎನ್ನುವುದೂ ಮುಖ್ಯವಾಗುತ್ತದೆ. ಎರಡನೆಯದು, ಸಮಾಜದ ಆಳದಲ್ಲಿ ಬೇರೂರಿರುವ ಪುರುಷ ಪ್ರಧಾನ ಮನಃಸ್ಥಿತಿ. ಮೂರನೆಯದು, ಮೋಕ್ಷ ಪ್ರಾಪ್ತಿ ಎನ್ನುವ ಪರಿಕಲ್ಪನೆ ಎಲ್ಲಾ ಧರ್ಮದಲ್ಲೂ, ಎಲ್ಲಾ ಸಮುದಾಯದಲ್ಲೂ ಇದೆ. ಶಿಕ್ಷಿತರಿದ್ದರೂ ಅಷ್ಟೇ, ಶಿಕ್ಷಣ ವಂಚಿತರಲ್ಲೂ ಅಷ್ಟೇ, ಈ ಮನಃಸ್ಥಿತಿ ಬೇರೂರಿ ಬೆಳೆದಿದೆ. ಇತ್ತೀಚಿನ ವರ್ಷಗಳಂತೂ ವಿಜ್ಞಾನವನ್ನು ಬೆಳೆಸುವ, ಪ್ರಚಾರ ಮಾಡುವ ಬದಲು, ಮೌಢ್ಯವನ್ನೇ ಬಿತ್ತುತ್ತಿದ್ದೇವೆ’ ಎನ್ನುವುದು ಸಾಮಾಜಿಕ ಕಾರ್ಯಕರ್ತೆ ಕೆ.ಎಸ್‌. ವಿಮಲಾ ಅವರು ಅಭಿಪ್ರಾಯ.