ಕ್ರಿಕೆಟ್ ಟೂರ್ನಿ: ಡ್ರಾ ಪಂದ್ಯದಲ್ಲಿ ಕೆಎಸ್‌ಸಿಎ ಕೋಲ್ಟ್ಸ್‌

ಮೈಸೂರು: ಸಂಘಟಿತ ಹೋರಾಟದ ನಡುವೆಯೂ ಇನಿಂಗ್ಸ್ ಹಿನ್ನಡೆ ಅನುಭವಿಸಿದ ಕೆಎಸ್‌ಸಿಎ ಕೋಲ್ಟ್ಸ್ ತಂಡವು ಗುರುವಾರ ಇಲ್ಲಿನ ಎಸ್‌ಜೆಸಿಇ ಮೈದಾನದಲ್ಲಿ ಮುಕ್ತಾಯಗೊಂಡ ಡಾ. ಡಿ.ವೈ. ಪಾಟೀಲ ಕ್ರಿಕೆಟ್‌ ಅಕಾಡೆಮಿ ಎದುರಿನ ಪಂದ್ಯವನ್ನು ಡ್ರಾ ಮಾಡಿಕೊಂಡು ಎದುರಾಳಿ ತಂಡಕ್ಕೆ 3 ಅಂಕ ಬಿಟ್ಟುಕೊಟ್ಟಿತು.

ಕೆ.ತಿಮ್ಮಪ್ಪಯ್ಯ ಸ್ಮಾರಕ ಕ್ರಿಕೆಟ್ ಟೂರ್ನಿ ಪಂದ್ಯದ ಕೊನೆಯ ದಿನವಾದ ಗುರುವಾರ ಇನಿಂಗ್ಸ್ ಮುನ್ನಡೆಯ ಗುರಿಯೊಂದಿಗೆ ಕಣಕ್ಕೆ ಇಳಿದಿದ್ದ ಕೋಲ್ಟ್ಸ್‌ ತಂಡವು 408 ರನ್‌ಗಳಿಗೆ ಆಲೌಟ್ ಆಯಿತು. ಧೀರಜ್‌ ಗೌಡ (88; 111 ಎ, 4X13) ಹೋರಾಟ ಪ್ರದರ್ಶಿಸಿದರಾದರೂ ಉಳಿದ ಬ್ಯಾಟರ್‌ಗಳಿಂದ ನಿರೀಕ್ಷಿತ ಪ್ರದರ್ಶನ ಸಿಗಲಿಲ್ಲ. ಡಿ.ವೈ. ಪಾಟೀಲ ಅಕಾಡೆಮಿಯ ಪಾರ್ಥ್ ಸಹಾನಿ 44 ರನ್‌ಗಳಿಗೆ 4 ವಿಕೆಟ್‌ ಉರುಳಿಸಿದರು. ಎರಡನೇ ಇನಿಂಗ್ಸ್‌ ಆರಂಭಿಸಿದ ಡಿ.ವೈ. ಪಾಟೀಲ ಅಕಾಡೆಮಿ 22 ಓವರ್‌
ಗಳಲ್ಲಿ 110 ರನ್ ಕಲೆಹಾಕಿದ್ದ ವೇಳೆ ಪಂದ್ಯ ಡ್ರಾ ಆಯಿತು. 

ಒಡಿಶಾಗೆ ಮೂರು ಅಂಕ: ಇಲ್ಲಿನ ಎಸ್‌ಡಿಎನ್‌ಆರ್‌ಡಬ್ಲ್ಯು ಕ್ರೀಡಾಂಗಣದಲ್ಲಿ ನಡೆದ ಒಡಿಶಾ ಕ್ರಿಕೆಟ್‌ ಸಂಸ್ಥೆ ಹಾಗೂ ಬರೋಡಾ ಕ್ರಿಕೆಟ್‌ ಸಂಸ್ಥೆ ನಡುವಿನ ಪಂದ್ಯವು ಡ್ರಾ ಆಗಿದ್ದು, ಒಡಿಶಾ ಇನಿಂಗ್ಸ್ ಮುನ್ನಡೆಯೊಂದಿಗೆ 3 ಅಂಕ ಸಂಪಾದಿಸಿತು. ಬರೋಡಾ ಪರ ಸುಕೃತ್‌ ಪಾಂಡೆ (184; 155 ಎ, 4X8) ವಿರೋಚಿತ ಪ್ರದರ್ಶನ ನೀಡಿದರು.

ಸಂಕ್ಷಿಪ್ತ ಸ್ಕೋರ್‌: ಎಸ್‌ಜೆಸಿಇ ಕ್ರೀಡಾಂಗಣ

ಮೊದಲ ಇನಿಂಗ್ಸ್‌: ಡಾ. ಡಿ.ವೈ. ಪಾಟೀಲ ಕ್ರಿಕೆಟ್‌ ಅಕಾಡೆಮಿ: 106.3 ಓವರ್‌ಗಳಲ್ಲಿ 452; ಕೆಎಸ್‌ಸಿಎ ಕೋಲ್ಟ್ಸ್‌: 115.1 ಓವರ್‌ಗಳಲ್ಲಿ 408 (ಧೀರಜ್‌ ಗೌಡ 88, ಪಿ. ಧ್ರುವ್‌ 34. ಪಾರ್ಥ್ ಸಹಾನಿ 44ಕ್ಕೆ 4)

ಎರಡನೇ ಇನಿಂಗ್ಸ್: ಡಾ. ಡಿ.ವೈ. ಪಾಟೀಲ ಕ್ರಿಕೆಟ್‌ ಅಕಾಡೆಮಿ: 22 ಓವರ್‌ಗಳಲ್ಲಿ 2 ವಿಕೆಟ್‌ಗಳಿಗೆ 110 (ಪಾರ್ಥ್‌ ಸಹಾನಿ ಔಟಾಗದೆ 36, ಹರ್ಷಲ್‌ ಜಾಧವ್‌ ಔಟಾಗದೆ 58. ಧನುಷ್ ಗೌಡ 12ಕ್ಕೆ 2)

ಎಸ್‌ಡಿಎನ್‌ಆರ್‌ಡಬ್ಲ್ಯು ಕ್ರೀಡಾಂಗಣ: ಮೊದಲ ಇನಿಂಗ್ಸ್‌: ಒಡಿಶಾ ಕ್ರಿಕೆಟ್ ಸಂಸ್ಥೆ: 129 ಓವರ್‌ಗಳಲ್ಲಿ 468; ಬರೋಡಾ ಕ್ರಿಕೆಟ್‌ ಸಂಸ್ಥೆ: 149.4 ಓವರ್‌ಗಳಲ್ಲಿ 404 ( ಸುಕೃತ್ ಪಾಂಡೆ 184, ಅತೀತ್‌ ಶೇಠ್‌ 63. ಸುಮಿತ್‌ ಶರ್ಮಾ 115ಕ್ಕೆ 4)