ನಮ್ಮೂರಿನ ಬೆಟ್ಟಗಳ ಕಾಡದಿರಲಿ ಕಾಡ್ಗಿಚ್ಚು: ಯುವ ಮನಸ್ಸುಗಳ ಮನದ ಮಾತು

ಸಣ್ಣ ಬೆಂಕಿ ಕಿಡಿ ಇಡೀ ಅರಣ್ಯವನ್ನೇ ನಾಶಪಡಿಸುತ್ತದೆ. ಆದರೆ ಮತ್ತೆ ಅಷ್ಟೇ ಪ್ರಮಾಣದ ಅರಣ್ಯ ಬೆಳಸಲು ವರ್ಷಗಳ ಕಾಲ ಶ್ರಮವಹಿಸಬೇಕಾಗುತ್ತದೆ. ಪ್ರಾಣಿ ಪಕ್ಷಿಗಳು ಕಾಡ್ಗಿಚ್ಚಿಗೆ ಬಲಿಯಾಗಲಿವೆ. ಬೆಂಕಿ ಹಾರಿಸುವ ಕೆಲಸ ಅರಣ್ಯ ಇಲಾಖೆಗೆ ಸೇರಿದ್ದು ಎನ್ನುವ ನಮ್ಮ ಮನೋಭಾವನೆ ಬದಲಾಗಬೇಕಿದೆ. ಅರಣ್ಯ ಇಲಾಖೆಯನ್ನು ದೂರವುದರ ಜೊತೆಗೆ ನಮ್ಮ ಜವಾಬ್ದಾರಿ ಅರಿತು ಪರಿಸರ ರಕ್ಷಣೆಗೆ ಮುಂದಾಗಬೇಕಿದೆ. –ಎಂ.ಮಾನಸ ವಿದ್ಯಾರ್ಥಿನಿ

ತಿ ವರ್ಷವು ಬೇಸಿಗೆಯಲ್ಲಿ ಬೆಟ್ಟೆಗಳಿಗೆ ಬೆಂಕಿ ಬಿಳುವುದು ಸಾಮಾನ್ಯ ಎನ್ನುವಂತಾಗಿದೆ. ಇದರಿಂದ ಪ್ರಾಣಿ ಸಂಕುಲವಷ್ಟೇ ನಾಶವಾಗುತ್ತಿಲ್ಲ ನಮ್ಮ ಕೃಷಿಗೆ ಪೂರಕವಾದ ಕೀಟ ಪ್ರಭೇದಗಳು ಹಾಗೂ ಜೀವ ವೈವಿದ್ಯ ನಾಶವಾಗುತ್ತಿವೆ. ಇತರೆ ಕಾಡು ಬೆಟ್ಟಗಳಿಗೆ ಹೋಲಿಕೆ ಮಾಡಿದರೆ ನಮ್ಮ ತಾಲ್ಲೂಕಿನ ಬೆಟ್ಟಗಳಲ್ಲಿ ಮನುಷ್ಯರ ಕೈವಾಡ ಇಲ್ಲದೆ ಬೆಂಕಿ ಕಾಣಿಸಿಕೊಳ್ಳಲು ಸಾಧ್ಯವೇ ಇಲ್ಲ. ಬೆಟ್ಟ ಹಾಗೂ ಬೆಟ್ಟದ ತಪ್ಪಲಿನಲ್ಲಿ ಬೆಂಕಿ ಹಚ್ಚಲು ಕಾರಣರಾದವರ ಪತ್ತೆ ಮಾಡಿ ಅರಣ್ಯ ಇಲಾಖೆ ದೂರುಗಳನ್ನು ದಾಖಲು ಮಾಡುವ ಬಿಗಿ ಕ್ರಮಗಳು ಅನಿವಾರ್ಯವಾದಾಗ ಮಾತ್ರ ಬೆಂಕಿಯಿಂದ ನಮ್ಮೂರಿನ ಬೆಟ್ಟಗಳನ್ನು ರಕ್ಷಿಸಲು ಸಾಧ್ಯವಾಗಲಿದೆ. –ಎಲ್‌.ಮಹಾಲಕ್ಷ್ಮೀ ವಿದ್ಯಾರ್ಥಿನಿ

ಪರಿಸರ ಸಂರಕ್ಷಣೆ ಕುರಿತಂತೆ ಶಾಲಾ–ಕಾಲೇಜು ಹಂತಗಳಿಂದಲೇ ಜಾಗೃತಿ ಮೂಡಿಸಬೇಕು. ನಮ್ಮ ಸುತ್ತಲಿನ ಅರಣ್ಯವನ್ನು ಬೆಂಕಿಯಿಂದ ರಕ್ಷಿಸುವ ಅನಿವಾರ್ಯತೆ ಇದರಲ್ಲಿ ಸಾರ್ವಜನಿಕರ ಪಾತ್ರದ ಬಗ್ಗೆಯು ಅರಿವು ಮೂಡಿಸುವಂತಹ ವಿಚಾರ ಒಳಗೊಂಡ ಪಾಠಗಳ ಅಗತ್ಯವಿದೆ– ಆರ್‌.ಭರತ್‌  ವಿದ್ಯಾರ್ಥಿ

ಅರಣ್ಯ ನಾಶದಿಂದ ಏನೆಲ್ಲಾ ಅನಾಹುತಗಳು ಸಂಭವಿಸುತ್ತಿವೆ ಎನ್ನುವ ಸತ್ಯ ನಮ್ಮ ಕಣ್ಣ ಮುಂದೆಯೇ ಇದೆ. ಇದಕ್ಕೆ ತಾಜಾ ನಿದರ್ಶನ ದೆಹಲಿ ಸುತ್ತ ಉಂಟಾಗುತ್ತಿರುವ ವಾಯುಮಾಲಿನ್ಯ ಮಳೆ ಪಂಚಾಗದಲ್ಲಿ ಉಂಟಾಗಿರುವ ಬದಲಾವಣೆ. ನಮ್ಮ ಯಾವುದೇ ಪರಿಶ್ರಮ ಇಲ್ಲದೆಯೂ ನೈಸರ್ಗಿಕವಾಗಿ ಅರಣ್ಯ ಬೆಳೆಯುವಂತೆ ನೋಡಿಕೊಳ್ಳಬೇಕು. ಆಕಸ್ಮಿಕ ನೆಪದಲ್ಲಿ ಬೀಳುವ ಬೆಂಕಿಯನ್ನು ತಡೆದರೂ ಸಾಕು ತನಗೆ ತಾನೇ ಅರಣ್ಯ ವೃದ್ಧಿಯಾಗಲಿದೆ. ಇದು ನಮ್ಮ ಪೂರ್ವಜರ ಕಾಲದಲ್ಲಿ ಇದ್ದ ಅರಣ್ಯ ಬೆಳೆಸುವ ಪದ್ದತಿ. ಇದು ಮರುಕಳುಹಿಸುವಂತೆ ನೋಡಿಕೊಂಡರೆ ಸಮೃದ್ಧ ಅರಣ್ಯ ನಮ್ಮ ಸುತ್ತಮುತ್ತಲಿನ ಬೆಟ್ಟಗಳಲ್ಲಿ ಸಹಜವಾಗಿಯೇ ಬೆಳವಣಿಗೆಯಾಗಲಿದೆ– ಎನ್.ಆರ್.ರಂಜಿತಾ ವಿದ್ಯಾರ್ಥಿನಿ