ಚಿಕ್ಕಮಗಳೂರು | ನಗರಸಭೆ ಚುನಾವಣೆ: ಪ್ರವಾಸ ತೆರಳಿದ ಬಿಜೆಪಿ ಸದಸ್ಯರು

ಬಿಜೆಪಿಯ ಇನ್ನಷ್ಟು ಸದಸ್ಯರನ್ನು ಸೆಳೆಯುವ ಪ್ರಯತ್ನವನ್ನು ಕಾಂಗ್ರೆಸ್ ತೆರೆ ಮರೆಯಲ್ಲಿ ಮಾಡುತ್ತಿದೆ ಎನ್ನಲಾಗಿದೆ. ಈ ನಡುವೆ ಕಮಲ ಚಿಹ್ನೆಯಡಿ ಗೆದ್ದಿರುವ ಎಲ್ಲಾ 18 ಸದಸ್ಯರಿಗೂ ಬಿಜೆಪಿ ವ್ಹಿಪ್ ಜಾರಿಗೊಳಿಸಿದೆ. 15 ಜನ ಸ್ವೀಕರಿಸಿದ್ದರೆ ಮೂವರು ಸ್ವೀಕಾರ ಮಾಡಿಲ್ಲ. ಅವರ ಮನೆಯ ಬಾಗಿಲಿಗೆ ವ್ಹಿಪ್ ಅಂಟಿಸಿ ಫೋಟೊ ತೆಗೆದುಕೊಂಡಿದ್ದಾರೆ. ವ್ಹಿಪ್ ಸ್ವೀಕಾರ ಮಾಡದ ಮೂವರು ಅಡ್ಡಮತದಾನ ಮಾಡುವ ಸಾಧ್ಯತೆ ಇದೆ. ಹಾಗೇನಾದರೂ ಮಾಡಿದರೆ ಅವರ ಸದಸ್ಯತ್ವವನ್ನು ಕಾನೂನಿನ ಮೂಲಕವೇ ಅನರ್ಹಗೊಳಿಸಲು ಬೇಕಿರುವ ದಾಖಲೆಗಳನ್ನು ಬಿಜೆಪಿ ಹೊಂದಿಸಿಕೊಳ್ಳುತ್ತಿದೆ.  ನೋಟಿಸ್ ನೀಡಲು ತಯಾರಿ ಮಾಡಿಕೊಂಡಿದೆ ಎಂದು ಬಿಜೆಪಿ ಮೂಲಗಳು ತಿಳಿಸಿವೆ.