ಧಾರವಾಡ: ಹಳ್ಳಿಗೂ ಜನೌಷಧ ಕೇಂದ್ರ ವಿಸ್ತರಣೆಯಾಗಲಿ

‘ಧಾರವಾಡ ಜಿಲ್ಲೆಯಲ್ಲಿ ಒಟ್ಟು 43 ಪ್ರಧಾನಮಂತ್ರಿ ಭಾರತೀಯ ಜನೌಷಧಿ ಕೇಂದ್ರಗಳಿವೆ.  ಜಿಲ್ಲೆಯ ಗ್ರಾಮೀಣ ಪ್ರದೇಶಗಳಲ್ಲಿ ಇನ್ನೂ ಹೆಚ್ಚು ಜನೌಷಧಿ ಕೇಂದ್ರಗಳನ್ನು ತೆರೆಯಲು ನಿಯಮದನ್ವಯ ಆಸಕ್ತರು ಅರ್ಜಿ ಸಲ್ಲಿಸಿದರೆ ಪರವಾನಗಿ ನೀಡಲಾಗುವುದು‘ ಎನ್ನುತ್ತಾರೆ ಹುಬ್ಬಳ್ಳಿ ವಲಯದ ಸಹಾಯಕ ಔಷಧಿ ನಿಯಂತ್ರಣಾಧಿಕಾರಿ ಅಜಯ್‌ ಮುದಗಲ್‌ ಹೇಳುತ್ತಾರೆ.

‘ಜಿಲ್ಲೆಯಲ್ಲಿನ ಪ್ರಧಾನಮಂತ್ರಿ ಭಾರತೀಯ ಜನೌಷಧಿ ಕೇಂದ್ರಗಳಲ್ಲಿ ನಿತ್ಯ ಅಂದಾಜು ₹10 ಲಕ್ಷ ವಹಿವಾಟು ನಡೆಯುತ್ತಿದೆ. ಇದರಲ್ಲಿ ಕಿಮ್ಸ್‌ ಆಸ್ಪತ್ರೆ ಆವರಣದಲ್ಲಿ ಜನೌಷಧಿ ಕೇಂದ್ರ ನವನಗರ ಗೋಕುಲ ರಸ್ತೆ ಕೇಶ್ವಾಪುರ ಕೋರ್ಟ್‌ ಸರ್ಕಲ್‌ ಬಳಿಯಲ್ಲಿನ ಜನೌಷಧಿ ಕೇಂದ್ರಗಳಲ್ಲಿ ಹೆಚ್ಚು ಜನೌಷಧಿಗಳು ಮಾರಾಟವಾಗುತ್ತಿವೆ’ ಎನ್ನುತ್ತಾರೆ ಜನೌಷಧಿ ಕೇಂದ್ರದ ಹುಬ್ಬಳ್ಳಿ ವಲಯದ ಸಹಾಯಕ ವ್ಯವಸ್ಥಾಪಕ ವೇಮು ನಾಗರಾಜು.

‘ಸರ್ಕಾರಿ ಆಸ್ಪತ್ರೆಗಳ ಆವರಣ ಬಸ್‌ನಿಲ್ದಾಣ ರೈಲ್ವೆ ನಿಲ್ದಾಣ ಸೇರಿದಂತೆ ಜನದಟ್ಟಣೆ ಪ್ರದೇಶಗಳಲ್ಲಿ ಜನೌಷಧಿ ಕೇಂದ್ರಗಳು ದಿನದ ಇಪ್ಪತ್ನಾಲ್ಕು ಗಂಟೆಯೂ ತೆರೆದರೆ ರೋಗಿಗಳಿಗೆ ಅನುಕೂಲವಾಗುತ್ತದೆ. ವೈದ್ಯರು ಚೀಟಿ ಬರೆದು ಹೊರಗಡೆಯಿಂದ ತರುವಂತೆ ಜನರಿಗೆ ಹೇಳಬಾರದು. ಇದರಿಂದ ಬಡ ಮಧ್ಯಮ ವರ್ಗದ ರೋಗಿಗಳ ಸಂಬಂಧಿಕರು ರಾತ್ರಿ ವೇಳೆ ಔಷಧಕ್ಕಾಗಿ ಅಲೆಯುವುದು ತಪ್ಪುತ್ತದೆ. ಈ ನಿಟ್ಟಿನಲ್ಲಿ ಸಂಬಂಧಿಸಿದ ಅಧಿಕಾರಿಗಳು ಕ್ರಮಕೈಗೊಳ್ಳಬೇಕು‘ ಎನ್ನುತ್ತಾರೆ ಹೊಸೂರು ನಿವಾಸಿ ಗೃಹಿಣಿ ಕಮಲಾದೇವಿ.  ಗುಣಮಟ್ಟದ ಜನೌಷಧಿ: ಅರಿವು ಅವಶ್ಯ ‘ಜನೌಷಧಿಗಳು ಬ್ರಾಂಡೆಡ್‌ ಕಂಪೆನಿಯ ಔಷಧಿಯಷ್ಟೇ ಉತ್ತಮ ಗುಣಮಟ್ಟ ರೋಗನಿವಾರಕ ಸಾಮರ್ಥ್ಯ ಹೊಂದಿರುತ್ತವೆ. ಶೇ 30ರಿಂದ ಶೇ 70ರ ವರೆಗೆ ರಿಯಾಯಿತಿ ದರದಲ್ಲಿಯೂ ದೊರೆಯುತ್ತವೆ. ಆದರೆ ಕೆಲ ವೈದ್ಯರು ಈ ಜನೌಷಧಿಗಳನ್ನು ಖರೀದಿಸುವಂತೆ ತಮ್ಮ ಸಲಹಾ ಚೀಟಿಯ ಮೂಲಕ ಸೂಚಿಸುತ್ತಿಲ್ಲ. ಹೆಚ್ಚು ಕಮಿಷನ್‌ ದೊರೆಯುವಂತಹ ಬ್ರಾಂಡೆಡ್‌ ಕಂಪನಿಗೆ ಸಂಬಂಧಿಸಿದ ಔಷಧಿಗಳನ್ನೇ ಖರೀದಿಸಿ ತಂದು ತೋರಿಸುವಂತೆ  ಹೇಳುತ್ತಿದ್ದಾರೆ. ಇದಕ್ಕೆ ಕಡಿವಾಣ ಹಾಕಬೇಕಿದೆ. ಜನೌಷಧಿಗಳ ಬಗ್ಗೆ ಗ್ರಾಮೀಣ ಪ್ರದೇಶದ ಜನರಲ್ಲಿ ಇನ್ನೂ ಹೆಚ್ಚಿನ ಅರಿವು ಮೂಡಿಸುವುದು ಅವಶ್ಯವಿದೆ‘ ಎನ್ನುತ್ತಾರೆ ಧಾರವಾಡದ ಜೆನೆರಿಕ್ ಮೆಡಿಸಿನ್‌ ಅಂಗಡಿಯ ಮಾಲೀಕರೊಬ್ಬರು.