ರಾಮನಾಥಪುರ ತಂಬಾಕು ಮಾರುಕಟ್ಟೆ: 10 ದಿನ ಕಳೆದರೂ ₹290 ದಾಟದ ಗರಿಷ್ಠ ಬೆಲೆ

ಈ ಭಾಗದಲ್ಲಿ ಇದೀಗ ವರ್ಷಕ್ಕೆ ಎರಡು ಬಾರಿ ತಂಬಾಕು ಬೆಳೆಯುವವರ ಸಂಖ್ಯೆ ಹೆಚ್ಚಾಗುತ್ತಿದೆ. ಜೂನ್ ಮತ್ತು ಜುಲೈನಲ್ಲಿ ಹೆಚ್ಚಿನ ಮಳೆಯಾದಾಗ ತೆಗ್ಗು ಪ್ರದೇಶದ ಜಮೀನಿನಲ್ಲಿದ್ದ ಬಹುತೇಕ ತಂಬಾಕು ಬೆಳೆಯು ಹೆಚ್ಚಿದ ತೇವಾಂಶದಿಂದ ಹಾನಿಗೀಡಾಯಿತು. ಕೆಲ ರೈತರು ಉತ್ಪಾದಿಸುತ್ತಿದ್ದ ತಂಬಾಕಿನ ಪ್ರಮಾಣ ಕಡಿಮೆ ಆಗಿದ್ದರಿಂದ 2ನೇ ಬೆಳೆ ಬೆಳೆಯಲು ತಂಬಾಕು ನಾಟಿ ಮಾಡಿದ್ದಾರೆ. ಈಗಾಗಲೇ ಕೆಲ ರೈತರು ನಾಟಿ ಮಾಡಿರುವ ತಂಬಾಕಿನ ಸಸಿಗಳು ವಿವಿಧ ರೋಗಬಾಧೆಗೆ ತುತ್ತಾಗಿದ್ದು ತಂಬಾಕು ನಾಟಿ ಮಾಡಿದ್ದ ಸಸಿಗಳನ್ನು ಸೇರಿಸಿ ಉಳುಮೆ ಮಾಡುತ್ತಿದ್ದಾರೆ. ಹೀಗಾಗಿ ಎರಡು ಬಾರಿ ನಾಟಿ ಮಾಡಿದರೂ ಉತ್ಪಾದನೆಯ ಪ್ರಮಾಣ ಹೆಚ್ಚದೇ ಇರುವುದರಿಂದ ಬೆಲೆ ಕುಸಿತದ ಆತಂಕ ಕಡಿಮೆಯಾಗಿದೆ ಎನ್ನುವುದು ಬೆಳೆಗಾರರ ಮಾತು.