ಕೋಲಾರ: ವೃದ್ಧರಿಗೆ ಹೆಚ್ಚುತ್ತಿದೆಯೇ ಕಿರುಕುಳ?

ಉತ್ತಮ ವಿದ್ಯಾಭ್ಯಾಸ ಕೊಡಿಸಿ ಸಾಕಿ ಸಲುಹಿದ ಪೋಷಕರನ್ನು ಹೊರೆ ಎಂದು ಭಾವಿಸಿ ಮಕ್ಕಳು ಮನೆಯಿಂದ ಹೊರಹಾಕುತ್ತಿರುವ ಪ್ರಕರಣಗಳು ಜಿಲ್ಲೆಯಲ್ಲಿ ನಡೆದಿರುವುದು ಗೊತ್ತಾಗಿದೆ. ಆಸ್ತಿಗೆ ಸಹಿ ಹಾಕಿಸಿಕೊಂಡು ಹೊರಗೆ ನೂಕಿರುವ ಪ್ರಕರಣವೂ ಪತ್ತೆಯಾಗಿದೆ. ಕೋಲಾರ ತಾಲ್ಲೂಕಿನ ಬೆಗ್ಲಿ ಹೊಸಹಳ್ಳಿ ಗ್ರಾಮದಲ್ಲಿ ವಿಧವೆ ವೃದ್ಧೆಯೊಬ್ಬರು ತನ್ನ ಪುತ್ರ ಹಾಗೂ ಸೊಸೆ ಜೊತೆ ತಮ್ಮ ಮನೆಯಲ್ಲಿ ವಾಸವಿದ್ದರು. ಆದರೆ ಯಾವುದೋ ಕಾರಣಕ್ಕೆ ಕುಟುಂಬದವರು ವೃದ್ಧೆಯನ್ನು ಮನೆಯಿಂದ ಹೊರಹಾಕಿದ್ದರು. ಮಾನಸಿಕವಾಗಿ ಕುಗ್ಗಿ ಹೋದ ಅವರು ಹಿರಿಯ ನಾಗರಿಕರ ಸಹಾಯವಾಣಿಗೆ ಕರೆ ಮಾಡಿ ಸಮಸ್ಯೆ ಹೇಳಿಕೊಂಡರು. ಹಿರಿಯ ಜೀವದ ಪರವಾಗಿ ಸಹಾಯವಾಣಿ ಸಂಸ್ಥೆಯು ಕೋಲಾರ ಉಪವಿಭಾಗಾಧಿಕಾರಿ ನ್ಯಾಯಾಲಯದಲ್ಲಿ ದೂರು ದಾಖಲಿಸಿತು. ಪ್ರಕರಣ ಅವಲೋಕಿಸಿದ ಉಪವಿಭಾಗಾಧಿಕಾರಿಯು ವೃದ್ಧೆಗೆ ಮನೆ ಬಿಡಿಸಿ ಕೊಡುವಂತೆ ಆದೇಶ ಮಾಡಿದ್ದಾರೆ ಎಂದು ಸಹಾಯವಾಣಿ ಯೋಜನಾಧಿಕಾರಿ ಹರೀಶ್‌ ತಿಳಿಸಿದರು.