ಮುಳಬಾಗಿಲು | ಜಾನುವಾರುಗಳಿಗೆ ಮೇವಿನ ಕೊರತೆ: ಆಂಧ್ರದ ಮೊರೆ

ಬೇಸಿಗೆ ಕಾಲ ಸಮೀಪಿಸುತ್ತಿದ್ದಂತೆ ಜಾನುವಾರುಗಳಿಗೆ ಹಸಿ ಮೇವಿನ ಸಮಸ್ಯೆ ಎದುರಾಗುತ್ತಿದೆ. ಎಲ್ಲಿ ನೋಡಿದರೂ ಭೂಮಿ ಒಣಗುತ್ತಾ ಹುಲ್ಲು ಒಣಗಿ ಹೋಗುತ್ತಿದೆ. ಇದರಿಂದ ಒಣಗಿದ ಹುಲ್ಲನ್ನು ಹಾಕಿದರೆ ಹಸುಗಳು ಹಾಲು ಕಡಿಮೆ ಕೊಡುತ್ತದೆ. ಇದರಿಂದ ಸಾವಿರಾರು ರೂಪಾಯಿಗಳನ್ನು ನೀಡಿ ಉಳ್ಳವರಿಂದ ಜೋಳದ ಕಡ್ಡಿಯನ್ನು ಕೊಂಡು ಹಾಕಲಾಗುತ್ತಿದೆ. ಇನ್ನು ಹಸಿ ಮೇವೇ ಹಾಕಿದರೆ ಜಾನುವಾರುಗಳನ್ನು ನಿಭಾಯಿಸಲು ಆಗದು ಎಂದು ಆಂಧ್ರದ ವ್ಯಾಪಾರಿಗಳು ಮಾರುವ ಒಣ ಭತ್ತದ ಹುಲ್ಲನ್ನು ತಂದು ಹಸುಗಳನ್ನು ಮೇಯಿಸುವ ಸ್ಥಿತಿ ಎದುರಾಗುತ್ತಿದೆ.

ಜಾನುವಾರುಗಳಿಗೆ ಮೇವಿನ ಸಮಸ್ಯೆ ಎದುರಾಗುತ್ತಿದ್ದು ಈಗಾಗಲೇ ರೈತರಿಗೆ 2500 ಕಿಟ್ಟುಗಳ ಜೋಳವನ್ನು ರಿಯಾಯಿತಿ ದರದಲ್ಲಿ ವಿತರಿಸಲಾಗಿದೆ. ಇನ್ನು ಜೋಳ ಬೆಳೆದಿರುವವರಿಗೆ ಸರ್ಕಾರದ ವತಿಯಿಂದ ಇಂತಿಷ್ಟು ಹಣವನ್ನು ನೀಡಿ ಜೋಳದ ಮೇವನ್ನು ಪಶುಪಾಲನಾ ಇಲಾಖೆಯ ವತಿಯಿಂದ ಕೊಂಡುಕೊಂಡು ರೈತರಿಗೆ ರಿಯಾಯಿತಿ ದರದಲ್ಲಿ ನೀಡಲೂ ಸಹ ಯೋಜನೆ ಇದೆ. ಈಗಾಗಲೇ ಒಣ ಮೇವನ್ನು ಬೇರೆ ಕಡೆಯಿಂದ ತಂದು ರಿಯಾಯಿತಿ ದರದಲ್ಲಿ ಜಾನುವಾರುಗಳು ಇರುವವರಿಗೆ ಮಾರಲು ಯೋಜನೆ ಹಮ್ಮಿಕೊಳ್ಳಲಾಗಿದ್ದು ಜಿಲ್ಲಾಧಿಕಾರಿ ಅನುಮತಿ ನೀಡಿದ ಕೂಡಲೇ ಒಣ ಮೇವನ್ನು ತಂದು ಕಡಿಮೆ ಬೆಲೆಗೆ ಮಾರಲಾಗುವುದು.