ಮುಳಬಾಗಿಲು: ಗ್ರಾಹಕರಿಗೆ ಹೋಟೆಲ್ ದರದ ಬರೆ

ರಾಷ್ಟ್ರೀಯ ಹೆದ್ದಾರಿ 75ರಲ್ಲಿ ಹೋಗಿ ಬರುವವರಿಗಾಗಿ ತಾಲ್ಲೂಕಿನ ನರಸಿಂಹ ತೀರ್ಥದ ಬಳಿ ರಿಯಾಯಿತಿ ಹಾಗೂ ಕಡಿಮೆ ದರದಲ್ಲಿ ಆಹಾರ ಪೂರೈಸಲು ಪ್ರವಾಸೋದ್ಯಮ ಇಲಾಖೆ ವತಿಯಿಂದ ಮಯೂರ ಅಪೂರ್ವ ಹೆಸರಿನಲ್ಲಿ ಹೋಟೆಲ್ ಮತ್ತು ವಸತಿ ಗೃಹಗಳನ್ನು ಸ್ಥಾಪಿಸಿದೆ.  ಮಯೂರ ಮತ್ತು ಅಪೂರ್ವ ಹೋಟೆಲ್ ಮತ್ತು ವಸತಿ ಗೃಹದಲ್ಲಿ ವ್ಯಾಪಾರ ವಹಿವಾಟು ಚೆನ್ನಾಗಿಯೇ ನಡೆಯುತ್ತಿತ್ತು. ಆದರೆ 13 ವರ್ಷಗಳ ಹಿಂದೆ ಹೆದ್ದಾರಿ ಅಗಲೀಕರಣದ ಕಾಮಗಾರಿ ವೇಳೆ ಹೋಟೆಲ್‌ನ ಅರ್ಧಭಾಗವನ್ನು ಒಡೆಯಲಾಯಿತು. ಅಂದು ಮುಚ್ಚಿದ ಹೋಟೆಲ್ ಮತ್ತು ವಸತಿ ಗೃಹವು ಈವರೆಗೆ ತೆರೆಯಲಾಗಿಲ್ಲ. ಪ್ರಯಾಣಿಕರ ಅನುಕೂಲಕ್ಕಾಗಿ ಲಕ್ಷಾಂತರ ರೂಪಾಯಿ ವೆಚ್ಚದಲ್ಲಿ ನಿರ್ಮಿಸಲಾಗಿದ್ದ ಕಟ್ಟಡವು ಇಂದು ಅನೈತಿಕ ಚಟುವಟಿಕೆಗಳ ತಾಣವಾಗಿ ಮಾರ್ಪಟ್ಟಿದೆ ಎಂದು ಬೇಸರ ವ್ಯಕ್ತಪಡಿಸುತ್ತಾರೆ ಈ ಭಾಗದಲ್ಲಿ ಪ್ರತಿನಿತ್ಯ ಓಡಾಡುವ ಜನರು. 

ತಾಲ್ಲೂಕಿನ ಮೂಲಕ ಹಾದುಹೋಗಿರುವ ಹೆದ್ದಾರಿಯಲ್ಲಿ ಪ್ರವಾಸಿಗರು ಹಾಗೂ ನಾನಾ ಕೆಲಸ ಕಾರ್ಯಗಳಿಗಾಗಿ ಹೋಗಿ ಬರುವವರ ಸಂಖ್ಯೆ ದಿನೇ ದಿನೇ ಹೆಚ್ಚಾಗುತ್ತಿದೆ. ಇದರಿಂದ ಈ ಭಾಗದಲ್ಲಿರುವ ಖಾಸಗಿ ಹೋಟೆಲ್‌ನವರಿಗೆ ಹೆಚ್ಚಿನ ಲಾಭವಾಗುತ್ತಿದೆ. ಆದರೆ ಬಡವರು ಮತ್ತು ಮಧ್ಯಮ ವರ್ಗದ ಜನರಿಗೆ ಈ ಹೋಟೆಲ್‌ನ ದರ ಕೈಗೆಟುಕುವುದಿಲ್ಲ.  ಪ್ರಭಾಕರ್ ಪ್ರಯಾಣಿಕ ಇನ್ನೂ ಆರಂಭವಾಗದ ಹೋಟೆಲ್ ಸರ್ಕಾರ ಪ್ರವಾಸೋದ್ಯಮ ಇಲಾಖೆಯು ಮುಳಬಾಗಿಲು ನಗರದ ಹೊರವಲಯದಲ್ಲಿ ಹೋಟೆಲ್ ಪ್ರಾರಂಭಿಸಿ ರಿಯಾಯಿತಿ ದರದಲ್ಲಿ ಆಹಾರ ಪೂರೈಸುತ್ತಿತ್ತು. ರಸ್ತೆ ಅಗಲೀಕರಣದಿಂದ ಸ್ಥಗಿತಗೊಂಡಿರುವ ಈ ಹೋಟೆಲ್ ಇಂದಿಗೂ ಆರಂಭವಾಗಿಲ್ಲ. ಇದೇ ಮಾದರಿಯಲ್ಲಿ ಮತ್ತಷ್ಟು ಹೋಟೆಲ್ ಅಥವಾ ಜನಸಂದಣಿ ಇರುವ ಕಡೆ ಇಂದಿರ ಕ್ಯಾಂಟೀನ್ ಮಾದರಿ ಹೋಟೆಲ್ ಸ್ಥಾಪಿಸಿದರೆ ಜನರಿಗೆ ಅನುಕೂಲವಾಗಲಿದೆ.  ಜಯಪ್ಪ ಮುಳಬಾಗಿಲು