Karnataka Budget 2023: ರಾಮನಗರ ಅಭಿವೃದ್ದಿಗೆ ಸಿಗುವುದೇ ವೇಗ?

ಗ್ರಾಮ ಪಂಚಾಯಿತಿ ಮಟ್ಟದಲ್ಲಿ ಕೃಷಿ ಉತ್ಪನ್ನಗಳಿಗೆ ಪೂರಕವಾದ ಸಂಸ್ಕರಣಾ ಘಟಕಗಳನ್ನು ಆರಂಭಿಸಬೇಕು. ಭೈರಾಪಟ್ಟಣದ ಮಾವು ಸಂಸ್ಕರಣಾ ಘಟಕ ಶೀಘ್ರ ಕಾರ್ಯಾರಂಭ ಮಾಡಬೇಕು. ಮಾರುಕಟ್ಟೆ ಹರಾಜು ಪದ್ಧತಿಯನ್ನು ತಡೆಯುವುದಕ್ಕಾಗಿ ಕನಿಷ್ಠ ಬೆಂಬಲ ಆಧಾರಿತ (ಎಂಎಸ್‌ಪಿ) ಮಾರುಕಟ್ಟೆ ಭದ್ರತೆ ಒದಗಿಸಬೇಕು. ಇದರಿಂದ ರೈತರ ಬೆಳೆಗೆ ತಕ್ಕ ಬೆಲೆ ಸಿಗಲಿದೆ.

ರಾಮನಗರವು ಜಿಲ್ಲಾ ಕೇಂದ್ರವಾಗಿ 15 ವರ್ಷವಾದರೂ ಸಾಂಸ್ಕೃತಿಕ ಚಟುವಟಿಕೆಗಳಿಗೆ ಯಾವುದೇ ವೇದಿಕೆ ಇಲ್ಲ. ಸಾಹಿತ್ಯ ಸಂಸ್ಕೃತಿ ಹಾಗೂ ಕಲೆಗಳಿಗೆ ಪೂರಕವಾಗಿ ರಂಗಮಂದಿರವನ್ನೊಳಗೊಂಡ ಒಂದು ಸಾಂಸ್ಕೃತಿಕ ಸಮುಚ್ಚವಯವನ್ನು ಜಿಲ್ಲಾ ಕೇಂದ್ರದಲ್ಲಿ ನಿರ್ಮಿಸಬೇಕು. ಕಲೆಗಳ ಪ್ರೋತ್ಸಾಹಕ್ಕೆ ಆರ್ಥಿಕ ಸಬಲತೆ ನೀಡಬೇಕು. ಕಲೆಗಳ ಉಳಿವಿಗಾಗಿ ಮೂಲ ಕಲಾವಿದರನ್ನು ಗುರುತಿಸಿ ಅವರಿಗೆ ಮನ್ನಣೆ ನೀಡಬೇಕಿದೆ. ಶಾಲಾ–ಕಾಲೇಜುಗಳಿವೆ ರಂಗ ಶಿಕ್ಷಕರನ್ನು ನೇಮಿಸಬೇಕು.

ಹಾಲಿನ ದರ ನಿಗದಿಯನ್ನು ಸರ್ಕಾರ ನಿಗದಿಪಡಿಸುವ ಬದಲು ಹಾಲು ಮಹಾಮಂಡಳಗಳ ವಿವೇಚನೆಗೆ ಬಿಡಬೇಕು. ಗುಜರಾತ್ ಮತ್ತು ಕೇರಳದಲ್ಲಿರುವ ಮಾದರಿಯನ್ನು ಇಲ್ಲೂ ಅನುಸರಿಸಬೇಕು. ಹಾಲಿನ ಪ್ರೋತ್ಸಾಹಧನವನ್ನು ₹5ರಿಂದ ₹7ಕ್ಕೆ ಏರಿಕೆ ಮಾಡಬೇಕು. ಮಾರಾಟ ದರವನ್ನು ₹5 ಹೆಚ್ಚಿಸಬೇಕು. ಹೈನೋದ್ಯಮಕ್ಕೆ ಪೂರಕವಾಗಿ ಪಶು ಆಹಾರ ಕಾರ್ಖಾನೆ ಸ್ಥಾಪಿಸಬೇಕು. ಇದರಿಂದ ಪಶುಗಳ ಆರೋಗ್ಯ ವೃದ್ಧಿಯಾಗಿ ಹೆಚ್ಚಿನ ಹಾಲು ಸಿಗುತ್ತದೆ.

ವಿದ್ಯುತ್ ದರ ಏರಿಕೆಯು ರೇಷ್ಮೆ ಉದ್ಯಮಕ್ಕೆ ಹೊಡೆತ ಕೊಡಲಿದ್ದು ನಮಗೆ ವಿನಾಯಿತಿ ಕೊಡಬೇಕು. ಕೆಎಸ್‌ಐಸಿ ರೇಷ್ಮೆಯನ್ನು ನಿಯಮಿತವಾಗಿ ‌ ಖರೀದಿಸಬೇಕು. ರಾಮನಗರದಲ್ಲಿರುವ ಏಷ್ಯಾದ ಅತಿ ದೊಡ್ಡ ರೇಷ್ಮೆಗೂಡಿನ ಮಾರುಕಟ್ಟೆಯನ್ನು ಚನ್ನಪಟ್ಟಣಕ್ಕೆ ಸ್ಥಳಾಂತರಿಸದೆ ಇಲ್ಲೇ ಉಳಿಸಬೇಕು. ರೇಷ್ಮೆ ಕೊಡುತ್ತಿದ್ದ ಸಬ್ಸಿಡಿ ಪುನರಾರಂಭಿಸಬೇಕು. ರೇಷ್ಮೆ ಇಳುವರಿ ಆಧರಿಸಿ ಬೆಲೆ ನಿಗದಿ ಮಾಡಲು ವೈಜ್ಞಾನಿಕ ಮಾನದಂಡಗಳನ್ನು ಘೋಷಿಸಬೇಕು.