ಶಿವಮೊಗ್ಗ: ಹೋಟೆಲ್ ತಿಂಡಿ–ತಿನಿಸು ದರ ಶೇ 10ರಷ್ಟು ಹೆಚ್ಚಳ

‘ಬೆಂಗಳೂರಿನ ಹೋಟೆಲ್‌ಗಳಲ್ಲಿ ಮಾತ್ರ ಆಗಸ್ಟ್‌ 1ರಿಂದ ಊಟ–ತಿಂಡಿಯ ಬೆಲೆ ಹೆಚ್ಚಳಗೊಂಡಿದೆ. ಆದರೆ ಶಿವಮೊಗ್ಗದಲ್ಲಿ ಬೆಲೆ ಏರಿಕೆ ಮಾಡದಿರಲು ತೀರ್ಮಾನಿಸಿದ್ದೇವೆ’ ಎಂದು ಇಲ್ಲಿನ ಹೋಟೆಲ್ ಮಾಲೀಕರ ಸಂಘದ ಅಧ್ಯಕ್ಷ ಶಂಕರನಾರಾಯಣ ಹೊಳ್ಳ ಹೇಳುತ್ತಾರೆ. ‘ಶಿವಮೊಗ್ಗ ನಗರದ ಹೋಟೆಲ್ ಮಾಲೀಕರ ಸಂಘದ ವ್ಯಾಪ್ತಿಯಲ್ಲಿ 200 ಹೋಟೆಲ್‌ಗಳು ನೋಂದಣಿಯಾಗಿವೆ. ಕೋವಿಡ್ ನಂತರ ಹೋಟೆಲ್ ಉದ್ಯಮ ಸಂಕಷ್ಟದಲ್ಲಿದೆ. ಈಗ ಆಷಾಢ ಅಧಿಕ ಮಾಸ ನಿರಂತರ ಮಳೆಯಿಂದ ಹೋಟೆಲ್‌ಗಳಿಗೆ ಗ್ರಾಹಕರ ಸಂಖ್ಯೆಯೂ ಇಳಿಮುಖವಾಗಿದೆ. ಇಂತಹ ಸಂದರ್ಭದಲ್ಲಿ ಊಟ–ತಿಂಡಿಯ ಬೆಲೆ ಹೆಚ್ಚಿಸಿದರೆ ಗ್ರಾಹಕರು ತಳ್ಳುವ ಗಾಡಿಗಳನ್ನು ಆಶ್ರಯಿಸಿಬಿಡುತ್ತಾರೆ. ಹೀಗಾಗಿ ನಾವು (ಸಂಘ) ಬೆಲೆ ಏರಿಕೆ ಮಾಡುವುದಿಲ್ಲ’ ಎಂದು ಹೊಳ್ಳ ತಿಳಿಸಿದರು. ‘ತೀರಾ ಸಂಕಷ್ಟದಲ್ಲಿರುವವರು ಈ ಹಿಂದೆ ಬೆಲೆ ಹೆಚ್ಚಳ ಮಾಡದೇ ಕಡಿಮೆ ಬೆಲೆಗೆ ಊಟ–ತಿಂಡಿ ಕೊಡುತ್ತಿರುವವರು ಅವರ ಹಂತದಲ್ಲಿ ಬೆಲೆ ಹೆಚ್ಚಳ ಮಾಡಿಕೊಳ್ಳಬಹುದು. ಅದು ಹೋಟೆಲ್ ಮಾಲೀಕರ ಸಂಘದ ನಿರ್ಧಾರವಲ್ಲ’ ಎಂದು ಹೇಳಿದರು.