ಶಿವಮೊಗ್ಗ | ಹೆಚ್ಚಿದ ಅಪಾಯಕಾರಿ ರಾಸಾಯನಿಕ: ಕುಡಿಯಲೂ ಯೋಗ್ಯವಲ್ಲ ತುಂಗೆಯ ನೀರು!

ಸಾಮಾನ್ಯವಾಗಿ ಕುಡಿಯಲು ಯೋಗ್ಯವಾಗಿರುವ ನೀರಿನಲ್ಲಿ ಪ್ರತೀ ಲೀಟರ್‌ಗೆ 0.03 ಮಿಲಿ ಗ್ರಾಂನಷ್ಟು (ಎಂಪಿಎಲ್‌) ಅಲ್ಯುಮಿನಿಯಂ ಅಂಶ ಇರಬೇಕು. ತುಂಗಾ ನದಿಯಲ್ಲಿ ಆ ಪ್ರಮಾಣ 0.2 ಮಿಲಿಗ್ರಾಂನಷ್ಟು ಇದೆ. ಅಂದರೆ ನಿಗದಿತ ಮಿತಿಗಿಂತ ಎಂಟು ಪಟ್ಟು ಹೆಚ್ಚಾಗಿದೆ. ತುಂಗಾ ಉಳಿಸಿ ಅಭಿಯಾನದ ಮಿತ್ರರು ನದಿಯ ನೀರನ್ನು ಬೆಂಗಳೂರಿನಲ್ಲಿರುವ ಅಂತರರಾಷ್ಟ್ರೀಯ ಪ್ರಮಾಣಿತ ಯುರೋಸಿನ್ ಲ್ಯಾಬ್‌ನಲ್ಲಿ ಪರೀಕ್ಷೆ ನಡೆಸಿದ್ದು ಅದರ ವರದಿ ಬಂದಿದೆ. ‘ಸಮಾಧಾನಕರ ಸಂಗತಿ ಅಂದರೆ ನೀರಿನಲ್ಲಿ ಬ್ಯಾಕ್ಟೀರಿಯಲ್ ಕಂಟಾಮನೇಶನ್ ಇದ್ದರೂ ಭಾರಲೋಹಗಳ ಪ್ರಮಾಣ ಮಾತ್ರ ನಿಗದಿತ ಪ್ರಮಾಣದಲ್ಲಿದೆ. ತುಂಗಾ ನದಿ ಮಾತ್ರವಲ್ಲ ಮನೆ ಮನೆಗೆ ನಲ್ಲಿ ಮೂಲಕ ಹರಿದು ಬರುವ ನೀರಿನಲ್ಲೂ ಅಲ್ಯುಮಿನಿಯಂ ಪ್ರಮಾಣ ಅಪಾಯಕಾರಿ ಮಟ್ಟದಲ್ಲಿದೆ. ಹೀಗಾಗಿ ತುಂಗೆಯ ನೀರು ಕುಡಿಯಲು ಯೋಗ್ಯವಾಗಿಲ್ಲ’ ಎಂದು ಅಭಿಯಾನದ ನೇತೃತ್ವ ವಹಿಸಿರುವ ಪರಿಸರವಾದಿ ಬಿ.ಎಂ. ಕುಮಾರಸ್ವಾಮಿ ಹೇಳುತ್ತಾರೆ. ‘ಶಿವಮೊಗ್ಗದಲ್ಲಿ ಎಷ್ಟು ಆಸ್ಪತ್ರೆಗಳು ಇವೆಯೋ ಅವೆಲ್ಲವೂ ಸದಾ ಭರ್ತಿ. ಎಲ್ಲಿಂದ ಹುಟ್ಟುತ್ತೆ ಇಷ್ಟೊಂದು ರೋಗಗಳು. ಎಲ್ಲವೂ ತುಂಗೆಯ ಮಾಲಿನ್ಯದ ಪರಿಣಾಮ. ಮಹಾನಗರ ಪಾಲಿಕೆ ಆಡಳಿತ ಐದು ವರ್ಷ ಸುಮ್ಮನೆ ಕುಳಿತು ಅಧಿಕಾರದ ಕೊನೆಯ ದಿನ ತುಂಗಾ ನದಿ ಮಾಲಿನ್ಯದ ಬಗ್ಗೆ ಒಣ ಚರ್ಚೆ ಮಾಡಿತು’ ಎಂದು ಅವರು ಬೇಸರ ವ್ಯಕ್ತಪಡಿಸುತ್ತಾರೆ.

‘ಅಲ್ಯುಮಿನಿಯಂ ಅಂಶ ಬರೀ ನೀರು ಕುಡಿಯುವುದರಿಂದ ಮಾತ್ರ ದೇಹ ಸೇರುವುದಿಲ್ಲ. ಆ ನೀರು ಬಳಸಿ ಬೆಳೆದ ಆಹಾರ ಪದಾರ್ಥ ಹಣ್ಣು–ತರಕಾರಿಯ ಮೂಲಕವೂ ಸೇರುತ್ತದೆ’ ಎಂದು ನಿರ್ಮಲ ತುಂಗಾ ಅಭಿಯಾನದ ನೇತೃತ್ವ ವಹಿಸಿರುವ ಡಾ.ಧನಂಜಯ ಸರ್ಜಿ ಹೇಳುತ್ತಾರೆ. ‘ಸಾಮಾನ್ಯವಾಗಿ ಶೇ 60ರಷ್ಟು ಅಲ್ಯುಮಿನಿಯಂ ಅಂಶ ಮೂಳೆಯಲ್ಲಿ ಶೇ 25ರಷ್ಟು ಶ್ವಾಸಕೋಶದಲ್ಲಿ ಶೇ 10ರಷ್ಟು ಲಿವರ್‌ನಲ್ಲಿ ಉಳಿದದ್ದು ಮೆದುಳು ಹಾಗೂ ಕಿಡ್ನಿಯಲ್ಲಿ ಇರುತ್ತದೆ. ಆದರೆ ಹೆಚ್ಚುವರಿಯಾಗಿ ದೇಹಕ್ಕೆ ಸೇರುವ ಅಲ್ಯು‌ಮಿನಿಯಂನಿಂದ ಜೀವಕೋಶಗಳ ಉತ್ಪತ್ತಿಗೆ ತೊಂದರೆ ಆಗುತ್ತದೆ. ಜೊತೆಗೆ ಮೂಳೆಯಲ್ಲಿನ ಕ್ಯಾಲ್ಸಿಯಂ ಅಂಶ ಕಡಿಮೆ ಆಗಿ ಅವು ದುರ್ಬಲಗೊಳ್ಳುತ್ತವೆ. ಮುರಿದ ಮೂಳೆಯೂ ಬೇಗನೆ ಜೋಡಣೆಯಾಗುವುದಿಲ್ಲ. ಜೊತೆಗೆ ಮೂಳೆ ಸವೆತವೂ ಹೆಚ್ಚಲಿದೆ. ಲಿವರ್‌ ಸಮಸ್ಯೆಯ ಜೊತೆಗೆ ಉಸಿರಾಟದ ತೊಂದರೆ ರೋಗ ನಿರೋಧಕ ಶಕ್ತಿ ಕಡಿಮೆ ಆಗುವ ಸಮಸ್ಯೆಯನ್ನು ಎದುರಿಸಲಿದ್ದೇವೆ’ ಎಂದು ತಿಳಿಸುತ್ತಾರೆ. ‘ತುಂಗೆಯ ನೀರಿನಲ್ಲಿ ಅಪಾಯಕಾರಿ ಕಣಗಳು ಭಾರೀ ಪ್ರಮಾಣದಲ್ಲಿ ಹೆಚ್ಚಳವಾಗಿದೆ. ಕ್ಲೋರಿನ್ ಅಂಶ ನಿಗದಿತ ಮಟ್ಟಕ್ಕಿಂತ ಕಡಿಮೆ ಇದೆ. ಪೊಲಿಫಾಮ್ ಬ್ಯಾಕ್ಟೀರಿಯಾ ಪ್ರತೀ ಮಿಲಿ ಗ್ರಾಂನಲ್ಲಿ 6 ಇರಬೇಕು. ಅದು ನೂರಾರು ಪಟ್ಟು ಹೆಚ್ಚಿದೆ. ಆ ಬಗ್ಗೆಯೂ ಇನ್ನಷ್ಟು ಪ್ರಯೋಗ ಆಗಬೇಕಿದೆ. ಮಾಲಿನ್ಯದಿಂದ ಮುಖ್ಯವಾಗಿ ನೀರಿನ ಜನ್ಯ ರೋಗ ಹೆಚ್ಚಳವಾಗುತ್ತಿವೆ. ಮಕ್ಕಳು ತೀವ್ರ ಸಂಕಷ್ಟ ಅನುಭವಿಸುತ್ತಿದ್ದಾರೆ. ಮುಂದಿನ ಪೀಳಿಗೆಯ ಹಿತಕ್ಕೆ ಈಗಲೇ ಜಾಗ್ರತರಾಗಬೇಕಿದೆ’ ಎಂದು ಎಚ್ಚರಿಸಿದರು.

‘ರಾಷ್ಟ್ರೀಯ ಹಸಿರು ಪೀಠದ (ಎನ್‌ಜಿಟಿ) ಮಾರ್ಗಸೂಚಿಯಂತೆ ತುಂಗಾ ನದಿ ಸ್ವಚ್ಛತೆಗೆ ಕಾರ್ಯ ಯೋಜನೆ ರೂಪಿಸಲಾಗಿದೆ. ಅದಕ್ಕೆ ವೇಗ ನೀಡುವ ಕೆಲಸವನ್ನು ಜಿಲ್ಲಾಡಳಿತದ ನೇತೃತ್ವದಲ್ಲಿಯೇ ಕೈಗೆತ್ತಿಕೊಳ್ಳಲಾಗುವುದು. ಅದಕ್ಕೆ ನಾನೇ ಮೇಲ್ವಿಚಾರಣೆ ಮಾಡಲಿದ್ದೇನೆ’ ಎಂದು ಜಿಲ್ಲಾಧಿಕಾರಿ ಡಾ.ಆರ್.ಸೆಲ್ವಮಣಿ ‘ಪ್ರಜಾವಾಣಿ’ಗೆ ಪ್ರತಿಕ್ರಿಯಿಸಿದರು. ‘ಈ ಬಗ್ಗೆ ಕಳೆದ ವಾರ ಕೂಡ ಸಭೆ ನಡೆಸಿದ್ದೇವೆ. ಸಾರ್ವಜನಿಕರಲ್ಲೂ ಜಾಗೃತಿ ಮೂಡಿಸಲು ತುಂಗಾ ಮೂಲ ಉಳಿಸಿಯಂತಹ ಸ್ವಯಂ ಸೇವಾ ಸಂಸ್ಥೆಗಳು ನಮ್ಮ ಜೊತೆ ಕೈಜೋಡಿಸಿವೆ. ಎಸ್‌ಟಿಪಿಗಳನ್ನು ಸರಿಪಡಿಸಲು ಒತ್ತು ನೀಡುತ್ತಿದ್ದೇವೆ. ಆ ಕೆಲಸ ತುರ್ತಾಗಿ ನಡೆಸಲು ತುಂಗಾ ನದಿಯೊಳಗೆ ಕಸ ಹಾಕುವ ಜಾಗಗಳನ್ನು ಗುರುತಿಸಿ ಅಲ್ಲಿ ಗ್ರಿಲ್ ಅಳವಡಿಸಲಾಗುವುದು. ನಾವು ಕೂಡ ಹಲವು ಜಾಗಗಳನ್ನು ಗುರುತಿಸಿದ್ದೇವೆ. ಇನ್ನೂ ಶೇ 40ರಷ್ಟು ಕೊಳಚೆ ನೀರು ಶುದ್ಧೀಕರಣ ಘಟಕಕ್ಕೆ ಹೋಗಬೇಕಿದೆ. ಆ ನಿಟ್ಟಿನಲ್ಲೂ ಕೆಲಸ ಮಾಡುತ್ತಿದ್ದೇವೆ. ಶಿವಮೊಗ್ಗ ಮಾತ್ರವಲ್ಲ ತೀರ್ಥಹಳ್ಳಿ ಶೃಂಗೇರಿ ಕೊಪ್ಪ ಭಾಗದಲ್ಲೂ ಎನ್‌ಜಿಟಿ ಮಾರ್ಗಸೂಚಿ ಅನ್ವಯ ನದಿ ಸ್ವಚ್ಛತೆಗೆ ಒತ್ತು ನೀಡುತ್ತಿದ್ದೇವೆ’ ಎಂದು ತಿಳಿಸಿದರು.