ಉಡುಪಿ | ಶೌಚಾಲಯಗಳ ಅಧ್ವಾನ; ಮಲಮೂತ್ರ ವಿಸರ್ಜನೆಗೆ ಸಂಕಟ

ಉಡುಪಿ ಜಿಲ್ಲೆ ಪ್ರಸಿದ್ಧ ಪ್ರವಾಸಿ ತಾಣಗಳನ್ನು ಹೊಂದಿರುವುದರಿಂದ ಪ್ರತಿದಿನ ಸಾವಿರಾರು ಪ್ರವಾಸಿಗರು ಬರುತ್ತಾರೆ. ಲಕ್ಷಾಂತರ ಪ್ರವಾಸಿಗರನ್ನು ಸೆಳೆಯುವ ಜಿಲ್ಲೆಯಲ್ಲಿ ಸಮುದಾಯ ಶೌಚಾಲಯಗಳ ಕೊರತೆ ಕಾಡುತ್ತಿದೆ. ತೀರ್ಥ ಕ್ಷೇತ್ರಗಳ ದರ್ಶನ ಮಾಡಲು ಬರುವವರು ಪ್ರವಾಸಿತಾಣಗಳನ್ನು ನೋಡಲು ಬರುವವರು ಹೋಟೆಲ್‌ ಮಾಲ್‌ಗಳಿಗೆ ತೆರಳಿ ಮಲಮೂತ್ರ ವಿಸರ್ಜಿಸಬೇಕಾಗಿದೆ. ನಿರ್ಗತಿಕರು ಭಿಕ್ಷುಕರು ಬಸ್ ನಿಲ್ದಾಣದ ಸಮೀಪದ ಖಾಲಿ ಜಾಗಗಳಲ್ಲಿ ಮಲಮೂತ್ರ ಮಾಡುತ್ತಿದ್ದು ಪರಿಸರ ಗಬ್ಬು ವಾಸನೆ ಬೀರುತ್ತಿದೆ.

ಮಲ್ಪೆ ಬೀಚ್‌ ಸೇರಿದಂತೆ ಜಿಲ್ಲೆಯ ಪ್ರಸಿದ್ಧ ಪ್ರವಾಸಿ ತಾಣಗಳಲ್ಲಿ ಖಾಸಗಿ ಸಂಘ–ಸಂಸ್ಥೆಗಳು ನಿರ್ವಹಣೆ ಮಾಡುತ್ತಿರುವ ಶೌಚಾಲಯಗಳಲ್ಲಿ ದರ ದುಬಾರಿ ಎಂಬ ಟೀಕೆಗಳು ಕೇಳಿಬಂದಿವೆ. ಮೂತ್ರ ವಿಸರ್ಜನೆಗೆ ₹10 ಮಲ ವಿಸರ್ಜನೆಗೆ ₹20 ನಿಗದಿಪಡಿಸಲಾಗಿದೆ. ಶಾಲೆಗಳಿಂದ ಪ್ರವಾಸಕ್ಕೆ ಬರುವ ಮಕ್ಕಳು ದರ ಪಾವತಿಸಲಾಗದೆ ಬೀಚ್‌ನ ಪರಿಸರದಲ್ಲಿ ಮೂತ್ರ ವಿಸರ್ಜನೆ ಮಾಡುತ್ತಿದ್ದಾರೆ. ಪ್ರವಾಸಿ ತಾಣಗಳಲ್ಲಿರುವ ಶೌಚಾಲಯಗಳ ನಿರ್ವಹಣೆಯನ್ನು ಸ್ಥಳೀಯ ಆಡಳಿತ ಅಥವಾ ಕಾರ್ಪೊರೆಟ್‌ ಸಂಸ್ಥೆಗಳ ನಿರ್ವಹಣೆಯ ಮೂಲಕ ಉಚಿತವಾಗಿ ಶೌಚಾಲಯ ಸೇವೆ ಒದಗಿಸಬೇಕು ಎಂಬ ಆಗ್ರಹ ಪ್ರವಾಸಿಗರದ್ದು.