ವಿಜಯ‍ಪುರ |ಯತ್ನಾಳ ವರ್ಸಸ್‌ ಮುಶ್ರೀಫ್‌; ಗೆಲುವು ಯಾರಿಗೆ?

ಬಿಜೆಪಿ ಪಕ್ಷದೊಳಗಿನ ಮುಖಂಡರ ಅಸಮಾಧಾನ, ಭಿನ್ನಮತ ಯತ್ನಾಳ ಅವರ ಗೆಲುವಿನ ಓಟಕ್ಕೆ ಅಡತಡೆಯಾಗುವುದೇ ಎಂಬುದನ್ನು ಕಾದುನೋಡಬೇಕಿದೆ. ಬಿಜೆಪಿ ಟಿಕೆಟ್‌ ಸಿಗದೇ ಅಸಮಾಧಾನಗೊಂಡಿರುವ ಮಾಜಿ ಸಚಿವ ಅಪ್ಪು ಪಟ್ಟಣಶೆಟ್ಟಿ, ಸಂಸದ ರಮೇಶ ಜಿಗಜಿಣಗಿ, ಸಚಿವ ಮುರುಗೇಶ ನಿರಾಣಿ, ಬಿಜೆಪಿ ರಾಜ್ಯ ಉಪಾಧ್ಯಕ್ಷ ಬಿ.ವೈ.ವಿಜಯೇಂದ್ರ, ಮಾಜಿ ಮುಖ್ಯಮಂತ್ರಿ ಬಿ.ಎಸ್‌.ಯಡಿಯೂರಪ್ಪ ಅವರು ಈ ಚುನಾವಣೆಯಲ್ಲಿ ಯಾವ ಪಾತ್ರ ವಹಿಸುತ್ತಿದ್ದಾರೆ ಎಂಬುದು ಇನ್ನೂ ಖಚಿತವಾಗಿಲ್ಲ. ಆದರೆ, ಈ ಹಿಂದೆ ಯತ್ನಾಳ ಅವರೇ ಇವರೆಲ್ಲರೂ ನನ್ನ ವಿರುದ್ಧ ಚುನಾವಣೆಯಲ್ಲಿ ಕೆಲಸ ಮಾಡಲಿದ್ದಾರೆ ಎಂದು ಅನುಮಾನ ವ್ಯಕ್ತಪಡಿಸಿದ್ದರು. ಯತ್ನಾಳ ಅವರನ್ನು ‘ಬಿಜೆಪಿ ಸ್ಟಾರ್‌ ಪ್ರಚಾರಕ’ರನ್ನಾಗಿ ರಾಜ್ಯದ ವಿವಿಧೆಡೆ ಪಕ್ಷದ ಅಭ್ಯರ್ಥಿಗಳ ಪರ ಪ್ರಚಾರಕ್ಕೆ ಕಳುಹಿಸುವ ಮೂಲಕ ಅವರು ತಮ್ಮ ಕ್ಷೇತ್ರದಲ್ಲಿ ಹೆಚ್ಚು ಸಕ್ರಿಯರಾಗದಂತೆ ತಡೆಯುವ ಪ್ರಯತ್ನವೂ ನಡೆದಿದೆ ಎನ್ನಲಾಗುತ್ತಿದೆ.

ಬಣಜಿಗ ಸಮುದಾಯದ ವಿರುದ್ಧ ಅವಹೇಳನಕಾರಿ ಹೇಳಿಕೆ ನೀಡಿದ್ದಾರೆ ಎಂಬುದು ಆ ಸಮುದಾಯವನ್ನು ಕೆರಳಿಸಿದೆ. ಈ ಸಂಬಂಧ ಬಣಜಿಗ ಸಮಾಜದ ಮುಖಂಡರು ಪತ್ರಿಕಾಗೋಷ್ಠಿ ನಡೆಸಿ, ‘ಯತ್ನಾಳ ಅವರಿಗೆ ವೋಟ್‌ ಹಾಕುವುದಿಲ್ಲ’ ಎಂದು ಘೋಷಿಸಿರುವುದು ಚುನಾವಣೆಯಲ್ಲಿ ಯತ್ನಾಳರಿಗೆ ಬಣಜಿಗರು ‘ಲೆಕ್ಕ ಚುಕ್ತಾ’ ಮಾಡುವ ಸಾಧ್ಯತೆ ತಳ್ಳಿಹಾಕುವಂತಿಲ್ಲ. ಇನ್ನೊಂದೆಡೆ ಒಳಮೀಸಲಾತಿ ಜಾರಿಯಿಂದ ಕುಪಿತವಾಗಿರುವ ಬಂಜಾರ ಸಮಾಜವು ಬಿಜೆಪಿ ವಿರುದ್ಧ ತಿರುಗಿ ಬಿದ್ದಿರುವುದು ಸಹಜವಾಗಿ ಯತ್ನಾಳ ಅವರಿಗೆ ತಮ್ಮದಲ್ಲದ ತಪ್ಪಿಗೆ ‘ಏಟು’ ತಿನ್ನುವಂತಾಗಿದೆ. ಜೊತೆ, ಜೊತೆಗೆ ‘ಮುಸ್ಲಿಂ ಮತಗಳು ಬೇಡ’ ಎಂಬ ತಮ್ಮ ಹಿಂದಿನ ಘೋಷಣೆಗೆ ಬದ್ಧವಾಗಿರುವುದಾಗಿ ಹೇಳುತ್ತಿರುವ ಯತ್ನಾಳ ಈ ಮೂಲಕ ಪಕ್ಷಾತೀತವಾಗಿ ಹಿಂದುಗಳ ಮತಗಳನ್ನು ಕ್ರೂಡೀಕರಿಸಲು ಯತ್ನಿಸಿದ್ದಾರೆ. ಮುಸ್ಲಿಮರ ವಿರುದ್ಧ ಆಗಾಗ ಹರಿಹಾಯುತ್ತಿದ್ದರೂ ನಗರದ ಒಂದಷ್ಟು ಮುಸ್ಲಿಮರು ಯತ್ನಾಳ ಪರವಾಗಿ ಇದ್ದರು. ಆದರೆ, ರಾಜ್ಯ ಸರ್ಕಾರ ಇತ್ತೀಚೆಗೆ ಮುಸ್ಲಿಂ ಮೀಸಲಾತಿ ಕಿತ್ತುಕೊಂಡಿರುವುದರಿಂದ ಆ ಸಮುದಾಯದ ವೋಟುಗಳು ಯತ್ನಾಳರಿಗೆ ಮರೀಚಿಕೆಯೇ ಸರಿ.