ಕಾಕನಕೋಟೆಯ ಹೀರೊ 'ಅರ್ಜುನ'

‘ಎಲ್ಲರಿಂದಲೂ ಕೇಡಿ ಎಂದೇ ಕರೆಸಿಕೊಂಡು ಮೂಲೆಗುಂಪಾಗಿದ್ದ ಅರ್ಜುನನನ್ನು ಹೀರೊ ಮಾಡಿದ್ದೇ ನಮ್ಮಪ್ಪ ದೊಡ್ಡಮಾಸ್ತಿ’ ಎನ್ನುತ್ತಾರೆ ಅವರ ದೊಡ್ಡ ಮಗ ಬೋಳ. ‘ಅರ್ಜುನ ಯಾವತ್ತಿಗೂ ಹಸಿದು ಮಲಗೋ ಹಂಗಿರಲಿಲ್ಲ. ಆನೆ ರೇಷನ್‌ ಅಂಗಡಿಯಲ್ಲಿ ಕೊಡುತ್ತಿದ್ದ ಆಹಾರದ ಜೊತೆಗೆ ಮನೆಯಲ್ಲೂ ಬೇಯಿಸಿ ಹಾಕಲು ಅಪ್ಪ ನಮಗೆ ಹೇಳುತ್ತಿದ್ದರು. ಅಷ್ಟು ದೊಡ್ಡ ಜೀವಕ್ಕೆ ಇಷ್ಟೇ ಆಹಾರಾವೇ ಎನ್ನುತ್ತಿದ್ದರು’ ಎಂದು ಕಣ್ಣೀರಾದರು.

‘ಕಾಡಿಗೆ ಸೊಪ್ಪು ಸೆದೆ ತರಲು ಅರ್ಜುನನೊಂದಿಗೆ ಹೋದಾಗ ಕಾಡಾನೆ ಏನಾದರೂ ಎದುರಾದರೆ ಮೊದಲು ನನ್ನನ್ನು ಮರ ಹತ್ತಿಸಿ ಸೇಫ್‌ ಮಾಡಿ ಆಮೇಲೆ ಫೈಟಿಂಗ್‌ಗೆ ಇಳೀತಿತ್ತು. ಎಂಥ ದಟ್ಟ ಕಾಡಿನಲ್ಲೇ ಇದ್ದರೂ ಮರ್ಕಾ ಎನ್ನುತ್ತಿದ್ದಂತೆ ಓಡಿ ಬರ್ತಿತ್ತು’ ಎಂದು ತಂದೆ ದೊಡ್ಡಮಾಸ್ತಿ ಹೇಳುತ್ತಿದ್ದುದು ಅವರ ಎರಡನೇ ಮಗ ಸಣ್ಣಪ್ಪನವರ ನೆನಪಿನಲ್ಲಿದೆ. ಅದು ರೋಚಕ ಕತೆಯಾಗಿ ಅವರ ಮಕ್ಕಳಲ್ಲಿ ನೆಲೆಸಿದೆ! ‘ಮರ್ಕಾ’ ಎಂಬುದು ಅರ್ಜುನನ ಮತ್ತೊಂದು ಹೆಸರು.

‘ಈ ಕಾಕನಕೋಟೆ ಕಾಡಲ್ಲಿ ವೀರಾನೆ ಅಂದ್ರೆ ಪುನೀತ್‌ ರಾಜ್‌ಕುಮಾರೇ. ಅಂದ್ರೆ ನಮ್ಮ ಅರ್ಜುನ. ಅದಕ್ಕೇ ಪುನೀತ್‌ ರಾಜ್‌ಕುಮಾರ್‌ ಲೆವೆಲ್‌ನಲ್ಲೇ ಅದನ್ನ ನೋಡ್ಕೋತಿದ್ದೆವು’ ಎಂದರು ಮಾವುತ ಸಣ್ಣಪ್ಪ. ‘ಕಾಡಲ್ಲಿ ಯಾವ ಕೆಲ್ಸ ಕೊಟ್ರೂ ಅಚ್‌ಕಟ್ಟಾಗಿ ಮಾಡ್ಕೊಂಡ್‌ ಹೋಗ್ತಿದ್ವಿ. ತಾನೂ ಛೀ ಅನ್ನಿಸಿಕೊಳ್ಳಲಿಲ್ಲ. ನಮ್ಮನ್ನೂ ಛೀ ಅನ್ನಿಸಿಕೊಳ್ಳಕೆ ಬಿಡಲಿಲ್ಲ. ಬಳ್ಳೆ ಹಾಡಿಗೆ ಅರ್ಜುನನೇ ಫೇಮಸ್‌. ಚಿನ್ನ ಇದ್ದಂಗಿತ್ತು. ಆದ್ರೆ ಬರಿ ಚಿನ್ನ ಅನ್ನಂಗಿಲ್ಲ ವಜ್ರಾನೇ ಅದು. ಅದರ ಜೊತೆ ಐದು ವರ್ಷ ಅಂಬಾರಿ ಹೊತ್ತಿದ್ದೆ’ ಎಂದು ಸ್ಮರಿಸಿದರು. ‘ನಮ್ಮ ಬಳ್ಳೆ ಕ್ಯಾಂಪಲ್ಲಿ ಅರ್ಜುನ ಇಲ್ಲ ಅಂದ್ರೆ ಹವಾ ಇಲ್ಲ. ಮತ್ತೆ ಅಂಥ ಅರ್ಜುನ ಹುಟ್ಟಲ್ಲ. ಆ ಗತ್ತು ಆ ನಡೆ ಸೇವ್‌ಕಟ್ಟು ಅದರ ಲುಕ್ಕು ಅದರ ಸ್ವಭಾವ ಹುಡುಕೋದು ಕಷ್ಟ. ಇನ್ ಅಂತ ಆನೆ ಸಿಗಲ್ಲ’ ಎನ್ನುತ್ತಾ ಸಣ್ಣಪ್ಪ ಕಣ್ಣೀರಾದರು.