‘ಮಧ್ಯಮ ಆದಾಯದ ಬಲೆ’ಯಿಂದ ತಪ್ಪಿಸಿಕೊಂಡು, ಹೆಚ್ಚು ಆದಾಯದ ರಾಷ್ಟ್ರವಾಗಿ ಪರಿವರ್ತನೆಗೊಳ್ಳಲು ಈ ದೇಶಗಳು ‘3 ಐ’ ಕಾರ್ಯತಂತ್ರವನ್ನು ಅನುಸರಿಸಬೇಕು ಎಂದು ವರದಿ ಪ್ರತಿಪಾದಿಸಿದೆ. ‘3 ಐ’ಗಳೆಂದರೆ ಹೂಡಿಕೆ (Investment), ಅಳವಡಿಕೆ (Infusion) ಮತ್ತು ನಾವೀನ್ಯ/ಆವಿಷ್ಕಾರ (Innovation). ಕಡಿಮೆ ಆದಾಯ ಹೊಂದಿರುವ ರಾಷ್ಟ್ರಗಳು ಈಗ ಹೂಡಿಕೆ ಬಗ್ಗೆ ಮಾತ್ರ ಆದ್ಯತೆ ನೀಡುತ್ತಿವೆ. ಹೂಡಿಕೆಯೊಂದರಿಂದಲೇ ಅಭಿವೃದ್ಧಿ ಸಾಧ್ಯವಿಲ್ಲ. ಬಂಡವಾಳ ಹೂಡಿಕೆಯ ಜೊತೆಗೆ ಹೊಸ ಹೊಸ ತಂತ್ರಜ್ಞಾನಗಳ ಅಳವಡಿಕೆ ಮತ್ತು ಹೊಸ ಕಲ್ಪನೆಗಳು, ಆವಿಷ್ಕಾರಗಳಿಗೂ ಗಮನ ಹರಿಸಬೇಕು ಎಂದು ವರದಿ ಹೇಳಿದೆ. ಅಭಿವೃದ್ಧಿಯ ವಿವಿಧ ಹಂತಗಳಲ್ಲಿ ದೇಶಗಳು ಈ ಕಾರ್ಯತಂತ್ರವನ್ನು ಹೇಗೆ ಅನುಷ್ಠಾನ ಮಾಡಬೇಕು ಎಂಬುದನ್ನೂ ವಿಶ್ವ ಬ್ಯಾಂಕ್‌ ವಿವರಿಸಿದೆ. ಹೂಡಿಕೆ (1i) ಆಧಾರಿತ ಅಭಿವೃದ್ಧಿ ಕಾರ್ಯತಂತ್ರಗಳು ಪ್ರಗತಿಯ ಆರಂಭದ ಹಾದಿಯಲ್ಲಿ ಅಭಿವೃದ್ಧಿಗೆ ವೇಗ ನೀಡುತ್ತವೆ. ಆ ನಂತರದಲ್ಲಿ ಹೊಸ ತಂತ್ರಜ್ಞಾನಗಳನ್ನು ಅಳವಡಿಸುವ (2i) ನೀತಿಗಳಿಗೆ ಆದ್ಯತೆ ನೀಡಬೇಕು. ಬಳಿಕ ಹೊಸ ಕಲ್ಪನೆಗಳು, ಸಂಶೋಧನೆ, ಆವಿಷ್ಕಾರಗಳಿಗೆ (3i) ಸಂಪನ್ಮೂಲ ಗಳನ್ನು ಒದಗಿಸಬೇಕು. ವಿಶ್ವಬ್ಯಾಂಕ್‌ನ ಪ್ರಕಾರ, ಕಡಿಮೆ ಆದಾಯದ ರಾಷ್ಟ್ರಗಳು (low income) ಹೂಡಿಕೆಗೆ (1i) ಹೆಚ್ಚು ಆದ್ಯತೆ ನೀಡಬೇಕು, ಕೆಳ ಮಧ್ಯಮ ಆದಾಯದ (low middle income) ದೇಶಗಳು ಹೂಡಿಕೆ ಮತ್ತು ತಂತ್ರಜ್ಞಾನಗಳ ಅಳವಡಿಕೆಗೆ (2i) ಗರಿಷ್ಠ ಪ್ರಮಾಣದಲ್ಲಿ ಒತ್ತು ನೀಡಬೇಕು, ಮೇಲು ಮಧ್ಯಮ ಆದಾಯದ (upper middle income) ದೇಶಗಳು ಹೂಡಿಕೆ, ಅಳವಡಿಕೆಯೊಂದಿಗೆ ಆವಿಷ್ಕಾರಕ್ಕೂ (3i) ಗರಿಷ್ಠ ಆದ್ಯತೆ ನೀಡಬೇಕು. ಯಾವ ಕ್ಷೇತ್ರಗಳಿಗೆ ಒತ್ತು?: ‘3ಐ’ ಕಾರ್ಯತಂತ್ರವನ್ನು ಅನುಷ್ಠಾನಗೊಳಿಸುವ ಸಂದರ್ಭದಲ್ಲಿ ದೇಶಗಳು ಉದ್ಯಮ (Enterprise), ಕೌಶಲ ವೃದ್ಧಿ/ಪ್ರತಿಭೆ (Talent) ಮತ್ತು ಇಂಧನ (Energy) ಕ್ಷೇತ್ರಗಳಿಗೆ ಒತ್ತು ನೀಡಬೇಕು ಎಂದೂ ವರದಿ ಪ್ರತಿಪಾದಿಸಿದೆ.

‘3ಐ’ ಕಾರ್ಯತಂತ್ರವನ್ನು ಅನುಷ್ಠಾನಗೊಳಿಸುವ ಸಂದರ್ಭದಲ್ಲಿ ದೇಶಗಳು ಉದ್ಯಮ (Enterprise), ಕೌಶಲ ವೃದ್ಧಿ/ಪ್ರತಿಭೆ (Talent) ಮತ್ತು ಇಂಧನ (Energy) ಕ್ಷೇತ್ರಗಳಿಗೆ ಒತ್ತು ನೀಡಬೇಕು ಎಂದೂ ವರದಿ ಪ್ರತಿಪಾದಿಸಿದೆ.

1950ರ ದಶಕದಲ್ಲಿ ಅತ್ಯಂತ ಬಡ ರಾಷ್ಟ್ರವಾಗಿದ್ದ ದಕ್ಷಿಣ ಕೊರಿಯಾ ಪವಾಡ ಸದೃಶ ರೀತಿಯಲ್ಲಿ ಅಭಿವೃದ್ಧಿ ಹೊಂದಿದ್ದನ್ನು ವಿಶ್ವ ಬ್ಯಾಂಕ್‌ ತನ್ನ ವರದಿಯಲ್ಲಿ ಪ್ರಮುಖವಾಗಿ ಉಲ್ಲೇಖಿಸಿದೆ. ಆರ್ಥಿಕತೆಯ ಇತಿಹಾಸದಲ್ಲಿಯೇ ದಾಖಲೆ ಸೃಷ್ಟಿಸಿರುವ ಕೊರಿಯಾ ಏಳು ದಶಕಗಳ ಅವಧಿಯಲ್ಲಿ ಕ್ರಾಂತಿಕಾರಕವಾಗಿ ಪರಿವರ್ತನೆ ಹೊಂದಲು ಕಾರಣವಾದ ಅಂಶಗಳನ್ನೂ ವಿವರಿಸಿದೆ. ಆರಂಭದಲ್ಲಿ ರಪ್ತು ಉತ್ತೇಜನಕ್ಕೆ ಗಮನಕೊಟ್ಟಿದ್ದ ಕೊರಿಯಾ, ದೇಶಿಯ ಕಂಪನಿಗಳಿಗೆ ಅಂತರರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಪೈಪೋಟಿ ನಡೆಸಲು ಅವಕಾಶ ಕಲ್ಪಿಸಿತು. ನಂತರದ ವರ್ಷಗಳಲ್ಲಿ ತೆರಿಗೆ ಕಡಿತ ಮಾಡುವುದರ ಜೊತೆಗೆ ದೇಶೀಯ ಮಾರುಕಟ್ಟೆಯನ್ನು ವಿದೇಶಿ ಹೂಡಿಕೆಗೆ ಮುಕ್ತವಾಗಿಸಿತು. ಕೈಗಾರಿಕಾ ನೀತಿಗಳ ಮೂಲಕ ಮೊದಲು ದೊಡ್ಡ ಉದ್ದಿಮೆಗಳಿಗೆ ಉತ್ತೇಜನ ನೀಡಿದ ಸರ್ಕಾರ, ಬಳಿಕ ಸಣ್ಣ ಮತ್ತು ಮಧ್ಯಮ ಕೈಗಾರಿಕೆಗಳಿಗೆ ಪ್ರೋತ್ಸಾಹ ಕೊಟ್ಟಿತು. ಮೂಲಸೌಕರ್ಯ ಕ್ಷೇತ್ರದಲ್ಲಿ ಹೂಡಿದ ಬಂಡವಾಳ ವೇಗವಾದ ಆರ್ಥಿಕ ಅಭಿವೃದ್ಧಿಗೆ ಕಾರಣವಾಯಿತು. 2000ದ ನಂತರ ಮಾಹಿತಿ ಮತ್ತು ಸಂವಹನ ತಂತ್ರಜ್ಞಾನ, ಮೂಲಸೌಕರ್ಯ ಕ್ಷೇತ್ರದಲ್ಲಿ ಭಾರಿ ಪ್ರಮಾಣದಲ್ಲಿ ಹೂಡಿಕೆಗೆ ಅವಕಾಶ ನೀಡಿದ್ದರಿಂದ ಡಿಜಿಟಲ್‌ ಮತ್ತು ತಂತ್ರಜ್ಞಾನ ಆಧಾರಿತವಾಗಿಯೂ ಅಭಿವೃದ್ಧಿ ಹೊಂದಿತು. ಎರಡನೆಯದಾಗಿ, ಕೊರಿಯಾವು ಸಂಶೋಧನೆ ಮತ್ತು ಅಭಿವೃದ್ಧಿಯಲ್ಲಿ ತೊಡಗಿರುವ ಕೈಗಾರಿಕೆಗಳು, ವಿಜ್ಞಾನ, ತಂತ್ರಜ್ಞಾನ ಮತ್ತು ಹೊಸ ಕಲ್ಪನೆಗಳಿಗೆ ಸಂಬಂಧಿಸಿದಂತೆ ಹೊಸ ನೀತಿಗಳನ್ನು ಜಾರಿಗೆ ತಂದಿತು. ತೆರಿಗೆ ವಿನಾಯಿತಿಗಳನ್ನು ಘೋಷಿಸಿತು. ಇದೇ ಸಂದರ್ಭದಲ್ಲಿ ಮಾನವ ಸಂಪನ್ಮೂಲದ ಮೇಲೂ ಬಂಡವಾಳ ಹೂಡಿ, ಉದ್ಯೋಗ ಸೃಷ್ಟಿಗೆ ಅವಕಾಶ ಕಲ್ಪಿಸಿತು. ಮೂರನೆಯದಾಗಿ, ಉದ್ಯಮಗಳೊಂದಿಗೆ ಉತ್ತಮ ಸಂಬಂಧ ಕಾಯ್ದುಕೊಂಡು, ದೇಶದಲ್ಲಿ ಕೈಗಾರಿಕೆಗಳ ಅಭಿವೃದ್ಧಿಗೆ ಪೂರಕವಾದ ನೀತಿಗಳ ಮೂಲಕ ಆರ್ಥಿಕ ಪ್ರಗತಿ ಸಾಧಿಸಿತು.