2014ರಲ್ಲಿ ಕೇಂದ್ರದಲ್ಲಿ ಅಧಿಕಾರಕ್ಕೆ ಬರುವ ಮುನ್ನವೂ, ಬಂದ ಮೇಲೂ ಬಿಜೆಪಿಯು ರಾಹುಲ್‌ ಗಾಂಧಿ ಅವರ ವ್ಯಕ್ತಿತ್ವವನ್ನು ಅಪಹಾಸ್ಯ ಮಾಡುತ್ತಲೇ ಬಂದಿದೆ. ರಾಹುಲ್ ಅವರ ಕುರಿತು ಬಂದ ಸುಳ್ಳು ಸುದ್ದಿಗಳೂ ದೊಡ್ಡ ಪ್ರಮಾಣದಲ್ಲಿದ್ದವು ಮತ್ತು ಈಗಲೂ ಇದೆ. ಫಲಿತಾಂಶದ ನಂತರ ರಾಹುಲ್‌ ಅವರು ಇಟಲಿಗೆ ಓಡಿಹೋಗುತ್ತಾರೆ, ಥಾಯ್ಲೆಂಡ್‌ಗೆ ಓಡುತ್ತಾರೆ, ಬ್ಯಾಂಕಾಕ್‌ಗೆ ಹೋಗುತ್ತಾರೆ ಎಂದೆಲ್ಲಾ ಸುಳ್ಳು ಸುದ್ದಿ ಹಬ್ಬಿಸಲಾಗಿತ್ತು. ಆದರೆ, ಭಾರಿ ಬಹುಮತದೊಂದಿಗೆ ರಾಹುಲ್‌ ಗಾಂಧಿ ಅವರು ತಾವು ಸ್ಪರ್ಧಿಸಿದ್ದ ವಯನಾಡ್‌ ಹಾಗೂ ರಾಯಿಬರೇಲಿ ಕ್ಷೇತ್ರಗಳಿಂದ ಗೆದ್ದು ಬಂದಿದ್ದಾರೆ. ಸಾಮಾಜಿಕ ಜಾಲತಾಣಗಳಲ್ಲಿ ಕಾಣಸಿಗುವ ರಾಹುಲ್‌ ಗಾಂಧಿಗೂ ವಾಸ್ತವದಲ್ಲಿ ಇರುವ ರಾಹುಲ್‌ ಗಾಂಧಿಗೂ ಬಹಳ ವ್ಯತ್ಯಾಸವಿದೆ ಎಂದು ಜಗತ್ತಿಗೆ ತಿಳಿದಿದ್ದು, ಅವರ 'ಭಾರತ ಜೊಡೊ' ಹಾಗೂ 'ಭಾರತ ಜೊಡೊ ನ್ಯಾಯ ಯಾತ್ರೆ'ಗಳಿಂದ. ದ್ವೇಷದ ಮಾರುಕಟ್ಟೆಯಲ್ಲಿ ಪ್ರೀತಿಯ ಅಂಗಡಿ ತೆರೆಯುತ್ತೇನೆ ಎಂದು ಅವರು ಪದೇ ಪದೇ ತಮ್ಮ ಭಾಷಣಗಳಲ್ಲಿ ಹೇಳಿಕೊಂಡಿದ್ದರು. ಈ ಯಾತ್ರೆಯ ಕಾರಣಕ್ಕಾಗಿ ಪಕ್ಷಕ್ಕೆ ಎಷ್ಟು ಮತಗಳು ಬಂದವು ಎನ್ನುವುದು ಚರ್ಚೆಯ ವಿಚಾರ. ಆದರೆ, ರಾಹುಲ್‌ ಅವರ ವ್ಯಕ್ತಿತ್ವದ ಪರಿಚಯ ಆಗಿದ್ದು ಮಾತ್ರ ಯಾತ್ರೆಯಿಂದಲೇ.