ಅಧ್ಯಕ್ಷೀಯ ಚುನಾವಣೆ | ಕಮಲಾ ಹ್ಯಾರಿಸ್‌ ‘ಅಸಮರ್ಥರು’: ಟ್ರಂಪ್‌ ವಾಗ್ದಾಳಿ

ಅಮೆರಿಕದ ಅಧ್ಯಕ್ಷ ಜೋ ಬೈಡನ್‌ ಅವರು ಸ್ಪರ್ಧೆಯಿಂದ ಹಿಂದೆ ಸರಿದ ಕಾರಣ ಕಮಲಾ ಅವರು ನವೆಂಬರ್‌ನಲ್ಲಿ ನಡೆಯಲಿರುವ ಚುನಾವಣೆಯಲ್ಲಿ ಡೆಮಾಕ್ರಟಿಕ್‌ ಪಕ್ಷದ ಸಂಭಾವ್ಯ ಅಭ್ಯರ್ಥಿ ಎನಿಸಿಕೊಂಡಿದ್ದಾರೆ. ಈ ಬೆಳವಣಿಗೆ ಬಳಿಕ ಬುಧವಾರ ತಮ್ಮ ಮೊದಲ ಪ್ರಚಾರ ಸಭೆಯಲ್ಲಿ ಮಾತನಾಡಿದ 78 ವರ್ಷದ ಟ್ರಂಪ್‌, ಎದುರಾಳಿಯನ್ನು ಗುರಿಯಾಗಿಸಿ ವಾಗ್ದಾಳಿ ನಡೆಸಿದರು.

‘ಬೈಡನ್‌ ಅವರ ವಿನಾಶಕಾರಿ ನೀತಿಗಳನ್ನು ಕಳೆದ ಮೂರೂವರೆ ವರ್ಷಗಳಿಂದ ಬೆಂಬಲಿಸುತ್ತಾ ಬಂದಿರುವ ಕಮಲಾ ಅವರು ಅತಿರೇಕದ ಎಡಪಂಥೀಯ ವಿಚಾರಧಾರೆ ಹೊಂದಿದ್ದಾರೆ. ಅವರಿಗೆ ಅಧಿಕಾರ ಸಿಕ್ಕರೆ ನಮ್ಮ ದೇಶವನ್ನು ನಾಶ ಮಾಡುತ್ತಾರೆ. ಅದಕ್ಕೆ ಅವಕಾಶ ನೀಡಬಾರದು’ ಎಂದು ಕಿಡಿಕಾರಿದರು.

‘ಇಂತಹ ಜನರೊಂದಿಗೆ ವ್ಯವಹರಿಸುವಾಗ ನೀವು ತುಂಬಾ ಎಚ್ಚರದಿಂದ ಇರಬೇಕು. ಏಕೆಂದರೆ ಇವರು ಅಪಾಯಕಾರಿ ಜನರು. ನವೆಂಬರ್‌ನಲ್ಲಿ ಬರುವ ಚುನಾವಣೆಯಲ್ಲಿ ಜನರು ಇವರಿಗೆ ಪಾಠ ಕಲಿಸಲಿದ್ದಾರೆ’ ಎಂದು ಸಭಿಕರ ಚಪ್ಪಾಳೆಯ ನಡುವೆ ಹೇಳಿದರು.

‘ನೀವು ತುಂಬಾ ಕೆಟ್ಟ ಕೆಲಸ ಮಾಡಿದ್ದೀರಿ. ಯಾವ ಕೆಲಸವನ್ನೂ ಸಮರ್ಥವಾಗಿ ನಿರ್ವಹಿಸಿಲ್ಲ. ನೀವು ಅತಿ ಉದಾರವಾದಿ ಆಗಿದ್ದೀರಿ. ನಿಮ್ಮಂಥವರು ಇಲ್ಲಿ ಮಾತ್ರವಲ್ಲ, ಎಲ್ಲಿಯೂ ಇರಲು ನಾವು ಬಯಸುವುದಿಲ್ಲ. ಕಮಲಾ ಅವರೇ, ನಿಮ್ಮನ್ನು ಇಲ್ಲಿಂದ ಕಿತ್ತೆಸೆಯಲಾಗಿದೆ. ಹೊರಟು ಹೋಗಿ’ ಎಂದು ಟ್ರಂಪ್ ಹೇಳಿದರು.

ಬೈಡನ್‌ ಅವರು ಅಧ್ಯಕ್ಷ ಸ್ಥಾನದಲ್ಲಿ ಮುಂದುವರಿಯಲು ದೈಹಿಕವಾಗಿ ಸಮರ್ಥರಲ್ಲದಿದ್ದರೂ, ಆ ವಿಷಯವನ್ನು ಕಮಲಾ ಮುಚ್ಚಿಟ್ಟರು ಎಂದು ದೂರಿದರು. ತಮ್ಮ ಭಾಷಣದಲ್ಲಿ ಕಮಲಾ ಹೆಸರನ್ನು 45 ಸಲ ಪ್ರಸ್ತಾಪಿಸಿದರಲ್ಲದೆ, ‘ಹ್ಯಾರಿಸ್ ಕೈಹಾಕಿದ ಎಲ್ಲ ಕೆಲಸಗಳೂ ಸಂಪೂರ್ಣ ದುರಂತವಾಗಿ ಬದಲಾಗುತ್ತದೆ’ ಎಂದು ಆರೋಪಿಸಿದರು.

‘ಉಕ್ರೇನ್‌ ಮೇಲೆ ದಾಳಿ ಮಾಡದಂತೆ ರಷ್ಯಾವನ್ನು ತಡೆಯಲು ಕಮಲಾ ಹ್ಯಾರಿಸ್ ಅವರನ್ನು ಯುರೋಪ್‌ಗೆ ಕಳುಹಿಸಲಾಗಿತ್ತು. ಅದು ಯಾವ ರೀತಿ ಕೆಲಸ ಮಾಡಿತು? ಅವರು ಅಮೆರಿಕಕ್ಕೆ ವಾಪಸಾದ ಐದು ದಿನಗಳ ನಂತರ ಆಕ್ರಮಣ ಪ್ರಾರಂಭಿಸುವ ಮೂಲಕ ರಷ್ಯಾ ತಕ್ಕ ಉತ್ತರ ನೀಡಿತು. ಕಮಲಾ ಏನೂ ಅಲ್ಲ ಎಂಬುದನ್ನು ಪುಟಿನ್ ತೋರಿಸಿಕೊಟ್ಟಿದ್ದಾರೆ’ ಎಂದರು.