ಹಮಾಸ್ ಮಾತು ಭರವಸೆ ಮೂಡಿಸುವಂತಿದೆ: ಅಮೆರಿಕ
ಟೆಲ್ ಅವಿವ್/ಕೈರೊ (ರಾಯಿಟರ್ಸ್): ವಿಶ್ವಸಂಸ್ಥೆಯ ಭದ್ರತಾ ಮಂಡಳಿಯ ನಿರ್ಣಯಕ್ಕೆ ಬೆಂಬಲ ಸೂಚಿಸಿ ಹಮಾಸ್ ನೀಡಿರುವ ಹೇಳಿಕೆಯು ‘ಭರವಸೆ ಮೂಡಿಸುವ ಸೂಚನೆ’ ಎಂದು ಅಮೆರಿಕದ ವಿದೇಶಾಂಗ ಕಾರ್ಯದರ್ಶಿ ಆ್ಯಂಟನಿ ಬ್ಲಿಂಕನ್ ಹೇಳಿದ್ದಾರೆ.
ಯುದ್ಧವನ್ನು ಕೊನೆಗೊಳಿಸುವ ಯತ್ನಗಳ ಭಾಗವಾಗಿ ಬ್ಲಿಂಕನ್ ಅವರು ಇಸ್ರೇಲ್‌ನ ಅಧಿಕಾರಿಗಳನ್ನು ಮಂಗಳವಾರ ಭೇಟಿ ಮಾಡಿದರು. ಗಾಜಾದ ಹೊರಗೆ ನೆಲಸಿರುವ ಹಮಾಸ್ ಹಿರಿಯ ಅಧಿಕಾರಿ ಸಮಿ ಅಬು ಜುಹ್ರಿ ಅವರು ಕದನವಿರಾಮ ನಿರ್ಣಯವನ್ನು ಸಂಘಟನೆಯು ಒಪ್ಪಿಕೊಳ್ಳುತ್ತಿರುವುದಾಗಿ ತಿಳಿಸಿದ್ದಾರೆ.
ಕದನವಿರಾಮಕ್ಕೆ ಸಂಬಂಧಿಸಿದ ವಿವರಗಳ ಬಗ್ಗೆ ಮಾತುಕತೆಗೆ ಸಿದ್ಧವಿರುವುದಾಗಿ ಹೇಳಿದ್ದಾರೆ. ಆದರೆ ಕದನ ವಿರಾಮಕ್ಕೆ ಇಸ್ರೇಲ್ ಕೂಡ ಒಪ್ಪುವಂತೆ ಮಾಡುವುದು ಅಮೆರಿಕದ ಹೊಣೆ ಎಂದು ಅವರು ಹೇಳಿದ್ದಾರೆ.
ಹಮಾಸ್ ನೀಡಿರುವ ಹೇಳಿಕೆಯು ಭರವಸೆ ಮೂಡಿಸುವಂತೆ ಇದೆಯಾದರೂ ಗಾಜಾದಲ್ಲಿ ಇರುವ ಹಮಾಸ್ ನಾಯಕತ್ವದ ಕಡೆಯಿಂದ ಖಚಿತವಾದ ಮಾತುಗಳು ಬರಬೇಕಿವೆ ಎಂದು ಬ್ಲಿಂಕನ್ ಹೇಳಿದ್ದಾರೆ.
