ಚೆಕ್‌ಇನ್‌, ಬೋರ್ಡಿಂಗ್ ಪಾಸ್‌ಗೆ ಸ್ವಸಹಾಯ ಪದ್ಧತಿ: ಈ ನಿಲ್ದಾಣ ದೇಶದಲ್ಲೇ ಮೊದಲು

ನವದೆಹಲಿ: ದೆಹಲಿಯಲ್ಲಿರುವ ಇಂದಿರಾಗಾಂಧಿ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣದ ಟರ್ಮಿನಲ್‌ 1ರಿಂದ 3ರವರೆಗಿರುವ 50 ಸ್ವಸಹಾಯ ಬ್ಯಾಗ್‌ ಚೆಕ್‌ಇನ್‌ ವ್ಯವಸ್ಥೆಯು ಕಾರ್ಯಾರಂಭ ಮಾಡಿದ್ದು, ಇದರಿಂದ ಬೋರ್ಡಿಂಗ್‌ ಪಾಸ್ ಹಾಗೂ ಬ್ಯಾಗ್ ಚೆಕ್‌ಇನ್‌ ಎರಡನ್ನೂ ಒಂದೇ ಕೇಂದ್ರದಲ್ಲಿ ಪ್ರಯಾಣಿಕರೇ ಮಾಡಬಹುದಾಗಿದೆ.

ದೇಶದಲ್ಲೇ ಇಂಥ ವ್ಯವಸ್ಥೆ ಜಾರಿಗೊಳಿಸಿದ ಮೊದಲ ಹಾಗೂ ಜಗತ್ತಿನ 2ನೇ ವಿಮಾನ ನಿಲ್ದಾಣ ಇದು ಎಂದೆನ್ನಲಾಗಿದೆ. ಟೊರೊಂಟೊ ವಿಮಾನ ನಿಲ್ದಾಣದಲ್ಲಿ ಈ ವ್ಯವಸ್ಥೆ ಇದೆ. ಕಳೆದ ವರ್ಷ ಈ ವ್ಯವಸ್ಥೆಯನ್ನು ಟರ್ಮಿನಲ್‌ 3ರಲ್ಲಿ ಮಾತ್ರ ಅಳವಡಿಸಲಾಗಿತ್ತು. ಇದೀಗ 1ರಿಂದ 3ನೇ ಟರ್ಮಿನಲ್‌ವರೆಗೂ ಸೆಲ್ಫ್‌ ಸರ್ವೀಸ್ ಬ್ಯಾಗ್‌ ಡ್ರಾಪ್‌ ವ್ಯವಸ್ಥೆ ಲಭ್ಯ.

‘ಈ ಸಾಧನದ ಅಳವಡಿಕೆಯಿಂದಾಗಿ ಪ್ರಯಾಣಿಕರು ಬೋರ್ಡಿಂಗ್ ಪಾಸ್ ಪಡೆಯಲು ಹಾಗೂ ಬ್ಯಾಗ್ ಚೆಕ್‌ಇನ್ ಮಾಡಲು ಉದ್ದನೆಯ ಸರತಿಸಾಲಿನಲ್ಲಿ ನಿಲ್ಲುವ ಗೋಜು ಇಲ್ಲ. ನೇರವಾಗಿ ಸ್ವಸಹಾಯ ಪದ್ಧತಿಯುಳ್ಳ ಕಿಯೋಸ್ಕ್‌ ಬಳಿ ಹೋಗಿ, ಬೋರ್ಡಿಂಗ್ ಪಾಸ್ ಪಡೆದು, ಅದನ್ನು ಸ್ಕ್ಯಾನ್‌ ಮಾಡುವ ಮೂಲಕ, ಇಲ್ಲವೇ ಬಯೊಮೆಟ್ರಿಕ್‌ ಕ್ಯಾಮೆರಾಗಳ ಸಹಾಯದಿಂದ ಬ್ಯಾಗ್‌ಗಳನ್ನು ಚೆಕ್‌ಇನ್ ಮಾಡಬಹುದು. ನಂತರ ಅದನ್ನು ಸಾಮಾನು ಸರಂಜಾಮು ಸಾಗಿಸುವ ಕನ್ವೆಯರ್‌ ಬೆಲ್ಟ್‌ ಮೇಲಿಟ್ಟರೆ ಸಾಕು. ಈ ಇಡೀ ಪ್ರಕ್ರಿಯೆ ಕೆಲವೇ ನಿಮಿಷಗಳಲ್ಲಿ ಪೂರ್ಣಗೊಳ್ಳಲಿದೆ.