ನಿರ್ಣಾಯಕ ಪಾತ್ರ ಹೇಳಿಕೆ ತಳ್ಳಿಹಾಕಿದ ಚೀನಾ
ಬೀಜಿಂಗ್ (ಎ.ಪಿ): ‘ಉಕ್ರೇನ್‌ ಯುದ್ಧದಲ್ಲಿ ‘ನಿರ್ಣಾಯಕ ಪಾತ್ರ’ ವಹಿಸುತ್ತಿದೆ’ ಎಂಬ ‘ನ್ಯಾಟೊ’ ಹೇಳಿಕೆಯನ್ನು ಚೀನಾ ತಳ್ಳಿಹಾಕಿದೆ. ಈ ರೀತಿಯ ಆರೋಪದಿಂದ ಏಷ್ಯಾದಲ್ಲಿ ಗೊಂದಲ ಮೂಡಿಸಬಾರದು’ ಎಂದು ಹೇಳಿದೆ. ‘ಉಕ್ರೇನ್‌ ಯುದ್ಧದಲ್ಲಿ ಚೀನಾದ ಪಾತ್ರವನ್ನು ನ್ಯಾಟೊ ಉತ್ಪ್ರೇಕ್ಷಿಸಿ ಹೇಳುತ್ತಿದೆ. ಇದು ಒಳ್ಳೆಯ ನಡೆಯಲ್ಲ’ ಎಂದು ಚೀನಾದ ವಿದೇಶಾಂಗ ಸಚಿವಾಲಯ ಪ್ರತಿಕ್ರಿಯಿಸಿದೆ. ‘ರಷ್ಯಾದ ಜೊತೆಗಿನ ವ್ಯಾಪಾರ ಕಾನೂನುಬದ್ಧವಾಗಿದೆ. ವಿಶ್ವ ವ್ಯಾಪಾರ ಸಂಘಟನೆಯ ನಿಯಮಗಳಿಗೆ ಪೂರಕವಾಗಿದೆ’ ಎಂದು ವಕ್ತಾರ ಲಿನ್‌ ಸಮರ್ಥಿಸಿಕೊಂಡಿದ್ದಾರೆ.
