ಚುರುಮುರಿ: ಹಬ್ಬದ ಸಂಭ್ರಮ

‘ದೀಪಾವಳಿ ಬಂದೇ ಬಿಡ್ತು, ಹೊಸ ಬಟ್ಟೆ ಇಲ್ಲ, ಬಂಗಾರ ಇಲ್ಲ. ಈ ಸಲ ಹಬ್ಬಕ್ಕೇನೂ ಕೊಡಿಸೋದಿಲ್ವ...’ ಅಡುಗೆ ಮನೆಯಿಂದಲೇ ಸುಪ್ರಭಾತ ಪ್ರಾರಂಭಿಸಿದಳು ಹೆಂಡತಿ.

. ‘ನೀನೇ ಬಂಗಾರ, ಮತ್ತೇಕೆ ಬೇಕು ನಿನಗೆ ಚಿನ್ನ’ ಎಂದೆ ಪ್ರೀತಿಯಿಂದ.

. ‘ಈ ಸಿನಿಮಾ–ನಾಟಕದ ಡೈಲಾಗ್ ಎಲ್ಲ ನನ್ನ ಮುಂದೆ ಹೇಳಬೇಡಿ. ಚಿನ್ನ ಕೊಡಿಸೋ ಕ್ಕಾಗದಿದ್ದರೂ ಹೊಸ ಸೀರೆಯನ್ನಾದರೂ ಕೊಡಿಸಿ’ ಸಿಟ್ಟಿನಲ್ಲಿಯೇ ಹೇಳಿದಳು ಪತ್ನಿ.

. ‘ಬಟ್ಟೆ–ಬಂಗಾರವೇ ಹಬ್ಬ ಅಲ್ಲ’ ನನಗೂ ಸಿಟ್ಟು ಬಂತು.

. ‘ಹೋಗಲಿ ಮಕ್ಕಳಿಗೆ ಪಟಾಕಿಯಾದರೂ ತಗೊಂಡು ಬನ್ನಿ’ ಹೆಂಡತಿಯ ಧ್ವನಿ ಸ್ವಲ್ಪ ತಗ್ಗಿತು.

. ‘ಪಟಾಕಿ ಹೊಡೆದರೆ ಮಾತ್ರ ದೀಪಾವಳಿನಾ? ನಾವು ಸಂತೋಷವಾಗಿರೋದೇ ಹಬ್ಬ’ ಎಂದೆ ವೇದಾಂತಿಯಂತೆ.

. ‘ಇದೆಲ್ಲ ಕೇಳೋಕ್ಕಷ್ಟೇ ಸರಿ. ಹಬ್ಬ ಮಾಡಿಲ್ಲ ಅಂದ್ರೆ ಅಕ್ಕ–ಪಕ್ಕದವರು ಏನೆಂದುಕೊಳ್ತಾರೆ?’

. ‘ಅವರಿವರು ಏನಂದುಕೊಳ್ತಾರೋ ಅಂತ ಅವರಿಷ್ಟದಂತೆ ಜೀವನ ಮಾಡೋಕಾಗು ತ್ತೇನಮ್ಮ, ನಮ್ಮಿಷ್ಟದಂತೆ ಬದುಕಬೇಕು’.

. ‘ಅಂದರೆ ನಿಮ್ಮ ಪ್ರಕಾರ ಹಬ್ಬ ಅಂದರೇನು?’

. ‘ಬಯಸಿದ ಕ್ಷೇತ್ರದಲ್ಲಿ ಬಯಸಿದ ಪಕ್ಷದಿಂದ ಎಲೆಕ್ಷನ್ ಟಿಕೆಟ್ ಸಿಕ್ಕರೆ ಯುವ ರಾಜಕಾರಣಿಗಳಿಗೆ ಅದೇ ಹಬ್ಬ’.

. ‘ಸೀನಿಯರ್ ರಾಜಕಾರಣಿಗಳಿಗೆ?’

. ‘ಬಯಸಿದ ಭೂಮಿ ಡಿನೋಟಿಫೈ ಆಗಿ ಕೈ ಸೇರಿದರೆ ರಾಜಕಾರಣಿಗಳಿಗೆ ಅದೇ ದೀಪಾವಳಿ’.

. ‘ಮತ್ತೆ?’

. ‘ಜೈಲಿನಲ್ಲಿರೋರಿಗೆ ಬೇಲ್ ಸಿಕ್ಕರೆ ಹಬ್ಬ, ರಿಯಲ್ ಎಸ್ಟೇಟ್ ಉದ್ಯಮಿಗಳಿಗೆ ಅವರ ಲೇಔಟ್ ಸೇಲ್ ಆದರೆ ಹಬ್ಬ’.

. ‘ಮುಂದೆ?’

. ‘ಅಭಿನಯಿಸಿದ ಸಿನಿಮಾಗಳೆಲ್ಲ ಸೆಂಚುರಿ ಬಾರಿಸಿದರೆ ಸಿನಿಮಾ ನಟ–ನಟಿಯರಿಗೆ, ಆಡಿದ ಪಂದ್ಯಗಳಲ್ಲೆಲ್ಲ ಶತಕ ಹೊಡೆದರೆ ಕ್ರಿಕೆಟರ್ಗಳಿಗೆ ಹಬ್ಬ’ ಉದಾಹರಣೆ ಕೊಡುತ್ತಾ ಸಾಗಿದೆ.

. ‘ನಿಮಗೆ ಯಾವಾಗ ನಿಜವಾದ ಹಬ್ಬ?’

. ‘ನೀನು ತವರು ಮನೆಗೆ ಹೋದಾಗ...’

. ಅಡುಗೆ ಕೋಣೆಯಿಂದ ಸೌಟು ತೂರಿಬಂತು.

. ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್ , ಎಕ್ಸ್ , ಫೇಸ್ಬುಕ್ ಮತ್ತು ಇನ್ಸ್ಟಾಗ್ರಾಂ ನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.