ಮಹಾರಾಜ ಟ್ರೋಫಿ ಕ್ರಿಕೆಟ್ | ಅಭಿಷೇಕ್‌ಗೆ ಐದು ವಿಕೆಟ್; ಸ್ಮರಣ್ ಅರ್ಧಶತಕ

ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಶನಿವಾರ ಮಧ್ಯಾಹ್ನ ಆರಂಭವಾದ ಪಂದ್ಯದಲ್ಲಿ ಟಾಸ್ ಗೆದ್ದ ಗುಲ್ಬರ್ಗ ತಂಡದ ನಾಯಕ ದೇವದತ್ತ ಪಡಿಕ್ಕಲ್ ಫೀಲ್ಡಿಂಗ್ ಆಯ್ಕೆ ಮಾಡಿಕೊಂಡರು. ಅಭಿಷೇಕ್ (4–0–21–5) ಅವರ ದಾಳಿಯ ಮುಂದೆ ಮೈಸೂರು ವಾರಿಯರ್ಸ್ ತಂಡವು 20 ಓವರ್‌ಗಳಲ್ಲಿ 9 ವಿಕೆಟ್‌ಗಳಿಗೆ 154 ರನ್ ಗಳಿಸಿತು. 

ಗುರಿ ಬೆನ್ನಟ್ಟಿದ ಗುಲ್ಬರ್ಗ್ ತಂಡವು ಆರ್. ಸ್ಮರಣ್ (52; 36ಎ, 4X2, 6X4) ಅವರ ಅರ್ಧಶತಕದ ಬಲದಿಂದ 18.5 ಓವರ್‌ಗಳಲ್ಲಿ 5 ವಿಕೆಟ್‌ಗಳಿಗೆ 157 ರನ್ ಗಳಿಸಿತು. 5 ವಿಕೆಟ್‌ಗಳಿಂದ ಜಯಿಸಿತು. 

ಗುಲ್ಬರ್ಗ್ ತಂಡಕ್ಕೆ ಲವನಿತ್ ಸಿಸೊಡಿಯಾ (23; 16ಎ) ಮತ್ತು ದೇವದತ್ತ ಪಡಿಕ್ಕಲ್ (24; 21ಎ) ಅವರು ಮೊದಲ ವಿಕೆಟ್‌ಗೆ 41 ರನ್ ಗಳಿಸಿ ಉತ್ತಮ ಆರಂಭ ನೀಡಿದರು. ಆದರೆ ವಿದ್ಯಾಧರ್ ಪಾಟೀಲ ಮತ್ತು ಕೆ. ಗೌತಮ್ ಅವರು ಕ್ರಮವಾಗಿ ಲವನೀತ್ ಮತ್ತು ದೇವದತ್ತ ವಿಕೆಟ್‌ಗಳನ್ನು ಗಳಿಸಿದರು. ಕೆ.ವಿ.ಅನೀಶ್ (8) ಬೇಗನೆ ಔಟಾದರು. ಈ ಹಂತದಲ್ಲಿ ಸ್ಮರಣ್ ಮತ್ತು ರಿತೇಶ್ ಭಟ್ಕಳ (22; 16ಎ) ತಂಡದ ಗೆಲುವಿಗೆ ಬಲ ತುಂಬಿದರು. 

ಮೊದಲು ಬ್ಯಾಟಿಂಗ್ ಮಾಡಿದ ಕರುಣ್ ನಾಯರ್ ನಾಯಕತ್ವದ ಮೈಸೂರು ತಂಡದಲ್ಲಿ ದೊಡ್ಡ ಜೊತೆಯಾಟಗಳು ಬೆಳೆಯದಂತೆ ಅಭಿಷೇಕ್ ಪ್ರಭಾಕರ್ ನೋಡಿಕೊಂಡರು. ಅವರು ಪ್ರಮುಖ ಬ್ಯಾಟರ್‌ಗಳ ವಿಕೆಟ್‌ ಕಬಳಿಸಿದರು.

ಸಂಕ್ಷಿಪ್ತ ಸ್ಕೋರು

ಮೈಸೂರು ವಾರಿಯರ್ಸ್: 20 ಓವರ್‌ಗಳಲ್ಲಿ 9ಕ್ಕೆ154 (ಎಸ್‌.ಯು. ಕಾರ್ತಿಕ್ 24, ಜೆ. ಸುಚಿತ್ ಔಟಾಗದೆ 25, ಮನೋಜ್ ಭಾಂಡಗೆ 38, ವೈಶಾಖ ವಿಜಯಕುಮಾರ್ 47ಕ್ಕೆ2, ಅಭಿಷೇಕ್ ಪ್ರಭಾಕರ್ 21ಕ್ಕೆ5, ಪ್ರವೀಣ ದುಬೆ 19ಕ್ಕೆ1)

ಗುಲ್ಬರ್ಗ ಮಿಸ್ಟಿಕ್ಸ್: 18.5 ಓವರ್‌ಗಳಲ್ಲಿ 5ಕ್ಕೆ157 (ಲವನಿತ್ ಸಿಸೊಡಿಯಾ 23, ದೇವದತ್ತ ಪಡಿಕ್ಕಲ್ 24, ಆರ್. ಸ್ಮರಣ್ 52, ರಿತೇಶ್ ಭಟ್ಕಳ 22, ಮನೋಜ್ ಭಾಂಡಗೆ 36ಕ್ಕೆ2)

ಫಲಿತಾಂಶ: ಗುಲ್ಬರ್ಗ ಮಿಸ್ಟಿಕ್ಸ್‌ಗೆ 5 ವಿಕೆಟ್‌ಗಳ ಜಯ.