ಪ್ರಗತಿ ಹಾದಿಯಲ್ಲಿ ಹುಬ್ಬಳ್ಳಿ ಏರ್ ಪೋರ್ಟ್...

ವಿಮಾನ ಪ್ರಯಾಣಿಕರು ತಮ್ಮ ಆಸನಗಳ ಮೇಲಿನ ಕ್ಯಾಬಿನ್‌ನಲ್ಲಿ ಇರಿಸುವ ಬ್ಯಾಗ್‌ ತೂಕ ಗರಿಷ್ಠ 7 ಕೆಜಿ ವರೆಗೂ ಹೊಂದಲು ಅವಕಾಶವಿದೆ. ಅದಕ್ಕಿಂತ ಹೆಚ್ಚು ತೂಕ ಇರುವ ಬ್ಯಾಗೇಜ್‌ನ್ನು ಸರಕು ವಿಭಾಗದಲ್ಲಿ ಪ್ರತ್ಯೇಕವಾಗಿ ಇರಿಸಲು ಕೊಡಬೇಕಾಗಿದ್ದು, ಅದು ಗರಿಷ್ಠ 15 ಕೆಜಿವರೆಗೂ ಉಚಿತ. ಅದಕ್ಕಿಂತ ಹೆಚ್ಚು ತೂಕ ಹೊಂದಿದ್ದರೆ ಅದಕ್ಕೆ ಶುಲ್ಕ ಕೊಡಬೇಕಾಗುತ್ತದೆ. ಹುಬ್ಬಳ್ಳಿ ವಿಮಾನ ನಿಲ್ದಾಣದಲ್ಲಿ ಪೊಲೀಸ್‌ ತಪಾಸಣೆ ಬಳಿಕ ಬೋರ್ಡಿಂಗ್‌ ಏರಿಯಾಗೆ ತೆರಳುವ ಪೂರ್ವ ಎಲ್ಲ ಬ್ಯಾಗ್‌ಗಳನ್ನು ಎಕ್ಸ್‌ರೇ ತಪಾಸಣೆ ಮಾಡುತ್ತಾರೆ. ರಾಸಾಯನಿಕ ಇರುವ ಮತ್ತು ಲೋಹದ ಸರಕುಗಳನ್ನು ಕ್ಯಾಬಿನ್‌ ಬ್ಯಾಗೇಜ್‌ನೊಂದಿಗೆ ತೆಗೆದುಕೊಳ್ಳಲು ಅವಕಾಶವಿಲ್ಲ. ಬೋರ್ಡಿಂಗ್‌ ಏರಿಯಾದಿಂದ ಕೋಚ್‌ ಬಸ್‌ ಮೂಲಕ ಪ್ರಯಾಣಿಕರನ್ನು ವಿಮಾನ ನಿಲುಗಡೆಯಾದ ಕಡೆಗೆ ತಲುಪಿಸುತ್ತಾರೆ. ವಿಮಾನ ದ್ವಾರಕ್ಕೆ ಹೊಂದಿಕೊಂಡು ಕೋಚ್‌ ವಾಹನ ಇರುತ್ತದೆ. ಅದರ ಮೂಲಕ ವಿಮಾನದೊಳಗೆ ಪ್ರವೇಶಿಸಬೇಕು. ಹುಬ್ಬಳ್ಳಿ ವಿಮಾನ ನಿಲ್ದಾಣ ಮೇಲ್ದರ್ಜೆಗೇರಿದ ಬಳಿಕ ಪ್ರಯಾಣಿಕರು ಟರ್ಮಿನಲ್‌ ಕಟ್ಟಡದಿಂದ ಏರೋಬ್ರಿಡ್ಜ್‌ ಮೂಲಕ ನೇರವಾಗಿ ವಿಮಾನದೊಳಗೆ ಪ್ರವೇಶಿಸಲು ಸೌಲಭ್ಯ ಇರಲಿದೆ. ಒಟ್ಟು ನಾಲ್ಕು ಏರೋಬ್ರಿಡ್ಜ್‌ಗಳು ನಿರ್ಮಾಣವಾಗಲಿವೆ.

1954ರ ಪೂರ್ವದಲ್ಲಿ ಬಾಂಬೆ ಪ್ರಾಂತದ ಭಾಗವಾಗಿದ್ದ ಹುಬ್ಬಳ್ಳಿಯು ರಾಜ್ಯಗಳ ಪುನರವಿಂಗಡನೆ ಕಾಯ್ದೆ ಜಾರಿಯಾದ ಬಳಿಕ ಈ ಕಡೆಗೆ ಬಂತು. ಈ ಸಂದರ್ಭದಲ್ಲಿಯೇ ಹುಬ್ಬಳ್ಳಿಯಲ್ಲಿ ವಿಮಾನ ನಿಲ್ದಾಣವೊಂದನ್ನು ಸ್ಥಾಪಿಸಬೇಕೆನ್ನುವ ವಿಚಾರ ಅಧಿಕಾರಿಗಳ ಮಟ್ಟದಲ್ಲಿ ಮೊಳಕೆ ಒಡೆಯಿತು. 1974ರಲ್ಲಿ ವಿಮಾನ ನಿಲ್ದಾಣಕ್ಕಾಗಿ ಒಟ್ಟು 588 ಎಕರೆ ಸ್ವಾಧೀನ ಮಾಡಿಕೊಂಡು, ರಾಜ್ಯ ಲೋಕೋಪಯೋಗಿ ಇಲಾಖೆಯು ವಿಮಾನ ನಿಲ್ದಾಣ ನಿರ್ಮಾಣ ಮಾಡಿತು. 1996 ರಲ್ಲಿ ವಿಮಾನ ನಿಲ್ದಾಣಗಳ ಪ್ರಾಧಿಕಾರವು ತನ್ನ ವಶಕ್ಕೆ ಪಡೆಯಿತು. 2003ರಲ್ಲಿ ಏರ್‌ ಡೆಕ್ಕನ್‌ ವಿಮಾನ ಕಂಪೆನಿಯು ಸೇವೆ ಆರಂಭಿಸಿತು. ಆನಂತರ ಕಿಂಗ್‌ಫಿಶರ್‌ ಕಂಪನಿಯು ಬೆಂಗಳೂರು–ಮುಂಬೈ ವಯಾ ಹುಬ್ಬಳ್ಳಿ ವಿಮಾನಸೇವೆ ಆರಂಭಿಸಿತು. 2014–2019ರ ಮಧ್ಯೆ ಸ್ಪೈಸ್‌ಜೆಟ್‌ ಕಂಪೆನಿಯ ವಿಮಾನಗಳು ಸಂಚಾರಸೇವೆ ನೀಡಿದವು. ರನ್‌ವೇ ದುರಸ್ತಿ ಕಾರಣದಿಂದ ವಿಮಾನ ಸಂಚಾರ ಸೇವೆ ಎಲ್ಲವೂ ಸ್ಥಗಿತವಾದವು. 2018 ರಲ್ಲಿ ಇಂಡಿಗೋ ವಿಮಾನ ಕಂಪನಿಯು ಸೇವೆ ಆರಂಭಿಸಿ, ಮುಂದುವರಿಸಿಕೊಂಡು ಹೋಗುತ್ತಿದೆ. ಪ್ರತಿದಿನ ಐದು ಆಗಮನ ಮತ್ತು ಐದು ನಿರ್ಗಮನ ವಿಮಾನಗಳಿವೆ. ರಾಜ್ಯ ಸರ್ಕಾರವು ಒಟ್ಟು 615 ಎಕರೆ ಭೂಮಿಯನ್ನು ಎಎಐಗೆ ಹಸ್ತಾಂತರಿಸಿದೆ.