ಚಾಮುಂಡಿಬೆಟ್ಟಕ್ಕೆ ಬೇಕು ಆಂಬುಲೆನ್ಸ್

‘ಬೆಟ್ಟದಿಂದ ಮೈಸೂರಿನ ಆಸ್ಪತ್ರೆಗಳಿಗೆ 10ರಿಂದ 12 ಕಿ.ಮೀ ಆಗುತ್ತದೆ. ನಗರದಲ್ಲಿ ಟ್ರಾಫಿಕ್ ಸಮಸ್ಯೆಯೂ ಇದೆ. ಖಾಸಗಿ ವಾಹನಗಳಲ್ಲಿ ಬೆಟ್ಟದಿಂದ ತುರ್ತು ಚಿಕಿತ್ಸೆ ಪಡೆಯಲು ಹೋಗುವುದು ತಡವಾಗುತ್ತಿದೆ. ಆಷಾಢ ಅಥವಾ ಇತರೆ ಸಂದರ್ಭದಲ್ಲೂ ಹೃದಯಾಘಾತದಿಂದ ಹಲವರು ಮೃತಪಟ್ಟಿದ್ದಾರೆ’ ಎಂದು ಚಾಮುಂಡಿ ಬೆಟ್ಟದ ಗ್ರಾಮದ ಮುಖಂಡ ರಮೇಶ್ ಬಾಬು ಹೇಳಿದರು. ‘ರಸ್ತೆಯಲ್ಲಿ ಅಪಘಾತವಾದರೂ ಗೊತ್ತಾಗುವುದಿಲ್ಲ. ಚಿಕ್ಕದಾದರೂ ಆಂಬುಲೆನ್ಸ್‌ ಒದಗಿಸಿದರೆ ಹಲವರ ಪ್ರಾಣ ಉಳಿಯುತ್ತದೆ. ಕುಟುಂಬಗಳನ್ನು ರಕ್ಷಿಸಿದಂತಾಗುತ್ತದೆ. ಗ್ರಾಮ ಪಂಚಾಯಿತಿ ಅಥವಾ ಮುಜರಾಯಿ ಇಲಾಖೆ ಸ್ಪಂದಿಸಬೇಕು. ಜಿಲ್ಲಾಡಳಿತ ಆರೋಗ್ಯ ಇಲಾಖೆಗೆ ನಿರ್ದೇಶನ ನೀಡಬೇಕು’ ಎಂದರು.

‘ದಸರೆ, ಆಷಾಢ ಮಾಸ ಸೇರಿದಂತೆ ವಿಶೇಷ ಸಂದರ್ಭದಲ್ಲಿ ಎರಡು ಆಂಬುಲೆನ್ಸ್‌ಗಳನ್ನು ನಿಯೋಜಿಸಲಾಗಿತ್ತು. ಜನಸಂದಣಿ ಇರುವಾಗೆಲ್ಲ ಸೇವೆ ಕಲ್ಪಿಸಲಾಗಿದೆ’ ಎಂದು ಡಿಎಚ್‌ಒ ಡಾ.ಪಿ.ಸಿ.ಕುಮಾರಸ್ವಾಮಿ ‘ಪ್ರಜಾವಾಣಿ’ಗೆ ‍ಪ್ರತಿಕ್ರಿಯಿಸಿದರು. ‘ಬೆಟ್ಟದ ತಪ್ಪಲಿನಲ್ಲಿಯೇ ಆಸ್ಪತ್ರೆಯಿದ್ದು, ಡಾ.ನವೀನ್‌ ಎಂಬುವರು ಆಂಬುಲೆನ್ಸ್ ಸೇವೆಯನ್ನು ಒದಗಿಸುತ್ತಿದ್ದಾರೆ. ಶಾಶ್ವತ ಸೇವೆಯನ್ನು ಕಲ್ಪಿಸಲು ಪರಿಶೀಲಿಸಿ ಕ್ರಮವಹಿಸಲಾಗುವುದು’ ಎಂದರು.