ಮೈಸೂರು | ಕಾಡುವ ಪ್ರವಾಹ: ತೋಟಕ್ಕೆ ನುಗ್ಗುವ ನಾಲೆ ನೀರು

‘ಹುಯಿಲಾಳು ಗ್ರಾಮದ ಪೂರ್ಣಯ್ಯ ನಾಲೆಗೆ ಹೊಂದಿಕೊಂಡಿರುವ ಜಮೀನುಗಳು ಬಡಾವಣೆಗಳಾಗುತ್ತಿದ್ದು, ಪ್ರಭಾವಿ ವ್ಯಕ್ತಿಯೊಬ್ಬರು ಬಡಾವಣೆ ನಿರ್ಮಿಸಿದ್ದಾರೆ. ನಾಲೆಯ ಬಫರ್ ವಲಯವನ್ನು ಒತ್ತುವರಿ ಮಾಡಿಕೊಂಡಿದ್ದಾರೆ. ನಾಲೆ ಏರಿಯು ನಾಶವಾದ್ದರಿಂದ ತೋಟಕ್ಕೆ ನೀರು ನುಗ್ಗುತ್ತಿದೆ’ ಎಂದು ಗ್ರಾಮದ ನಿವಾಸಿ ಚೇತನ್ ಬೇಸರ ವ್ಯಕ್ತಪಡಿಸಿದರು. ‘ನಾಲೆಯನ್ನು ಉಳುಮೆ ಮಾಡಿ ಒತ್ತುವರಿ ಮಾಡಿಕೊಂಡಿದ್ದಾರೆ. ನೀರು ಹೋಗಲು ಜಾಗವಿಲ್ಲದೇ ಹಳ್ಳದ ತೋಟಗಳು ಮುಳುಗಿ ನಾಶವಾಗಿದೆ. ಚಿಕ್ಕ ಫಾರಂ ಮಾಡಿ ಸಾಕಿದ್ದ 150 ನಾಟಿ ಕೋಳಿಗಳು ಕೊಚ್ಚಿ ಹೋಗಿದ್ದವು. ಕುಟುಂಬದವರು ಆಸ್ಪತ್ರೆ ಸೇರುವಂತಾಗಿತ್ತು. ರೈತರ ಕಷ್ಟ ಅಧಿಕಾರಸ್ಥರಿಗೆ ಕೇಳುತ್ತಿಲ್ಲ’ ಎಂದು ಅಳಲು ತೋಡಿಕೊಂಡರು.

‘2011 ಹೊರತು ಪಡಿಸಿದರೆ, ಹುಯಿಲಾಳು ಹಾಗೂ ಮಾದಗಳ್ಳಿ ಕೆರೆಗಳು 2021ರವರೆಗೂ ಬತ್ತಿದ್ದವು. 2022ರಲ್ಲಿ ಜೋರು ಮಳೆಯಾದ್ದರಿಂದ ತುಂಬಿದ್ದವು. 2023ರ ಜನವರಿಯಲ್ಲೂ ಪೂರ್ಣ ನೀರಿತ್ತು. ಅದಕ್ಕೆ ಕಬಿನಿ–ಕಾವೇರಿ ನೀರು ತುಂಬಿಸಿದ್ದೇ ಕಾರಣ’ ಎಂದು ಪರಿಸರ ತಜ್ಞ ಯು.ಎನ್‌.ರವಿಕುಮಾರ್ ಹೇಳಿದರು. ‘2007, 2010, 2013, 2015, 2016, 2017, 2018, 2022ರವರೆಗೂ ಗೂಗಲ್‌ ಚಿತ್ರಗಳನ್ನು ಗಮನಿಸಿದಾಗ ಈ ಎರಡೂ ಕೆರೆಗಳು ಬತ್ತಿವೆ. ಕೆರೆಗೆ ನದಿ ನೀರು ತುಂಬಿಸಿದ್ದರಿಂದ ಮಳೆಗಾಲದಲ್ಲಿ ಹೆಚ್ಚುವರಿ ನೀರು ಕೋಡಿ ಬಿತ್ತು. ತೋಟಗಳಿಗೆ ನೀರು ನುಗ್ಗಿತು. ನಾಲೆಯ ಒತ್ತುವರಿಯೂ ಸೇರಿ ಮಾನವ ನಿರ್ಮಿತ ದುರಂತವಿದು’ ಎಂದರು.