ಬಹುದಿನಗಳ ಹೋರಾಟಕ್ಕೆ ಸಂದ ಜಯ: ‘ನಿರಾಶ್ರಿತ ಬಂಗಾಲಿ’ಗರಿಗೆ ಪೌರತ್ವ ಭಾಗ್ಯ

‘ಪೌರತ್ವ ಲಭಿಸಿದರೂ ನಮ್ಮನ್ನು ಬಹುಮುಖ್ಯವಾದ ಸಮಸ್ಯೆಗಳು ಕಾಡುತ್ತಿವೆ. ಸಿಂಧನೂರಿನಲ್ಲಿ 50 ವರ್ಷ ಕಳೆದರೂ ಇಲ್ಲಿಯವರೆಗೆ ಜಾತಿ ಪ್ರಮಾಣ ಪತ್ರ ಲಭ್ಯವಾಗುತ್ತಿಲ್ಲ. ಪಶ್ಚಿಮ ಬಂಗಾಲ ಒಡಿಶಾ ಮಣಿಪುರ ತ್ರಿಪುರಾ ಅಸ್ಸಾಂ ಹಾಗೂ ಮತ್ತಿತರ ರಾಜ್ಯಗಳಲ್ಲಿ ‘ನಮಶೂದ್ರ’ ಸಮುದಾಯಕ್ಕೆ ಪರಿಶಿಷ್ಟ ಜಾತಿ ಪ್ರಮಾಣ ಪತ್ರ ದೊರೆಯುತ್ತಿದ್ದು ಇಲ್ಲಿ ವಾಸವಾಗಿರುವ ಬಹುಸಂಖ್ಯಾತರು ನಮಶೂದ್ರರಾಗಿದ್ದಾರೆ. ಯಾವುದೇ ಜಾತಿ ಪ್ರಮಾಣ ಪತ್ರ ಕೊಡುತ್ತಿಲ್ಲ. ಇತರ ರಾಜ್ಯಗಳಂತೆ ಇಲ್ಲಿಯೂ ಪರಿಶಿಷ್ಟ ಜಾತಿ ಪ್ರಮಾಣ ಪತ್ರ ಕೊಡಬೇಕು’ ಎಂದು ನಿಖಿಲ್ ಭಾರತ್ ಬಂಗಾಲಿ ಉದ್ಬಾಸ್ತು ಸಮನ್ವಯ ಸಮಿತಿ ರಾಷ್ಟ್ರೀಯ ಪ್ರಧಾನ ಕಾರ್ಯದರ್ಶಿ ಪ್ರೆಸೆನ್ ರಫ್ತಾನ್ ಆಗ್ರಹಿಸಿದ್ದಾರೆ.

ಸಿಂಧನೂರು ತಾಲ್ಲೂಕಿನ ಆರ್.ಎಚ್.ನಂ.4ರ ನಿವಾಸಿ ಜಯಂತ್ ಮಂಡಲ್ ಆರ್.ಎಚ್.ನಂ.2ರ ಬಿಪ್ರದಾಸ್ ಗೋಲ್ದರ್ ರಾಮಕೃಷ್ಣ ಅಧಿಕಾರಿ ಸುಕುಮಾರ್ ಮಂಡಲ್ ಅದೈತ್ ಅವರಿಗೆ ಕೇಂದ್ರ ಸರ್ಕಾರದಿಂದ ಪೌರತ್ವ ಪ್ರಮಾಣ ಪತ್ರ ಲಭಿಸಿದೆ. ಪೌರತ್ವ ನೀಡುವುದಕ್ಕಾಗಿಯೇ 2024ರ ಮೇ ತಿಂಗಳಲ್ಲಿ ಜಿಲ್ಲಾ ಮಟ್ಟದಲ್ಲಿ ಸಮಿತಿ ರಚಿಸಿದ್ದು ಆನ್‍ಲೈನ್ ಮೂಲಕ ಅರ್ಜಿ ಸಲ್ಲಿಸಿದ ಬಳಿಕ ಗುಪ್ತಚರ ಇಲಾಖೆ ಅಧಿಕಾರಿಗಳು ಖುದ್ದಾಗಿ ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲಿಸಲಿದ್ದಾರೆ. ಬಳಿಕ ರಾಜ್ಯ ಮಟ್ಟದ ಸಮಿತಿಯು ಸಂಪೂರ್ಣ ಮಾಹಿತಿ ಪಡೆದು ಪೌರತ್ವ ಪ್ರಮಾಣ ಪತ್ರವನ್ನು ನೀಡಲಿದೆ.