ರಾಮನಗರ: ಇನ್ನೂ ಸ್ವಚ್ಛತೆ ಕಾಣದ ರಾಜಕಾಲುವೆ, ಚರಂಡಿ

‘ಮಳೆಗಾಲ ನಿರ್ವಹಣೆಗಾಗಿ ಜಿಲ್ಲಾಧಿಕಾರಿ ಅವರು ಕಾರ್ಯಪಡೆ ರಚಿಸಿದ್ದಾರೆ. ನಗರಸಭೆಯ ಘನತ್ಯಾಜ್ಯ ನಿರ್ವಹಣಾ ವಿಭಾಗದವರು ಸೇರಿದಂತೆ ಕೆಲವರಿಗೆ ಅದರ ಜವಾಬ್ದಾರಿ ವಹಿಸಲಾಗಿದೆ. ಹಿಟಾಚಿ ಇಲ್ಲದಿರುವುದರಿಂದ ನಗರದ ರಾಜಕಾಲುವೆಗಳ ಸ್ವಚ್ಛತೆ ಇನ್ನು ಆಗಿಲ್ಲ. ಬಾಡಿಗೆ ಪಡೆದು ಸ್ವಚ್ಛತೆ ಕಾರ್ಯ ಕೈಗೊಳ್ಳಲು ನಿರ್ಧರಿಸಲಾಗಿದೆ. ಸದ್ಯ ಚಾಮುಂಡೇಶ್ವರಿ ಕರಗ ಮಹೋತ್ಸವ ನಡೆಯುತ್ತಿರುವುದರಿಂದ ಅದು ಮುಗಿದ ಬಳಿಕ ಸ್ವಚ್ಛತೆ ಕೆಲಸ ಕೈಗೊಳ್ಳಲಾಗುವುದು’ ಎಂದು ಹೆಸರು ಹೇಳಲಿಚ್ಛಿಸದ ನಗರಸಭೆ ಅಧಿಕಾರಿಯೊಬ್ಬರು ತಿಳಿಸಿದರು. ‘ರೋಗ ಭೀತಿಯಲ್ಲೇ ಜೀವನ’ ‘ಮಳೆ ಶುರುವಾದಾಗಿನಿಂದ ನಗರದಲ್ಲಿ ಸೊಳ್ಳೆಗಳ ಕಾಟವು ಹೆಚ್ಚಾಗಿದೆ. ಇದರಿಂದಾಗಿ ಡೆಂಗಿ ಚಿಕನ್ ಗುನ್ಯಾದಂತಹ ಸಾಂಕ್ರಾಮಿಕ ರೋಗಗಳ ಭೀತಿ ಎದುರಾಗಿದೆ. ಮಕ್ಕಳಿಂದಿಡಿದು ವೃದ್ಧರವರೆಗೆ ಜ್ವರ ಸಾಮಾನ್ಯವಾಗಿದೆ. ಆಸ್ಪತ್ರೆಗೆ ಹೋದರೆ ರಕ್ತ ಪರೀಕ್ಷೆ ಮಾಡಿಸದ ಹೊರತು ಸಾಂಕ್ರಾಮಿಕ ರೋಗದ ಆತಂಕ ಹೋಗುವುದಿಲ್ಲ. ಉಳ್ಳವರು ಪರೀಕ್ಷೆ ಮಾಡಿಸುತ್ತಾರೆ. ಬಡವರು ಏನು ಮಾಡಬೇಕು? ನಗರಸಭೆಯವರು ನಗರವನ್ನು ಶುಚಿಯಾಗಿಟ್ಟರೆ ಜನ ಸಾಂಕ್ರಾಮಿಕ ರೋಗಗಳ ಭಯವಿಲ್ಲದೆ ಆರೋಗ್ಯವಾಗಿರುತ್ತಾರೆ’ ಎಂದು ಅರ್ಕಾವತಿ ಬಡಾವಣೆಯ ರಕ್ಷಿತ್ ಹೇಳಿದರು.

‘ಮಳೆಗಾಲದಲ್ಲಿ ಹೆಚ್ಚಾಗಿ ಹರಡುವ ಡೆಂಗಿ ಜ್ವರದ ಕುರಿತು ಜನ ನಿರ್ಲಕ್ಷ್ಯಿಸಬಾರದು. ಒಬ್ಬರಿಂದ ಮತ್ತೊಬ್ಬರಿಗೆ ಹರಡುವ ಈ ಜ್ವರವು ಸೊಳ್ಳೆ ಕಡಿತದಿಂದ ಬರುತ್ತಿದೆ. ಅದಕ್ಕಾಗಿ ಸೊಳ್ಳೆಗಳು ಹರಡದಂತೆ ಮುನ್ನೆಚ್ಚರಿಕೆ ವಹಿಸುವುದೇ ರೋಗ ನಿಯಂತ್ರಣಕ್ಕಿರುವ ಪ್ರಮುಖ ದಾರಿ. ನೀರು ಶೇಖರಣೆ ಪರಿಕರಗಳಾದ ಸಿಮೆಂಟ್ ತೊಟ್ಟಿ ಬ್ಯಾರಲ್ ಮಣ್ಣಿನ ಮಡಿಕೆಗಳಲ್ಲಿ ನಿಲ್ಲುವ ನೀರೇ ಸೊಳ್ಳೆಗಳ ಸಂತಾನೋತ್ಪತ್ತಿ ತಾಣವಾಗಿವೆ. ಹಾಗಾಗಿ ಇಲ್ಲಿನ ನೀರು ನಿಲ್ಲದಂತೆ ಎಚ್ಚರಿಕೆ ವಹಿಸುವ ಜೊತೆಗೆ ಆಗಾಗ ಶುಚಿಗೊಳಿಸಬೇಕು. ರಾಜಕಾಲುವೆ ಚರಂಡಿಗಳನ್ನು ಸ್ವಚ್ಛಗೊಳಿಸಬೇಕು. ವಿಪರೀತ ಜ್ವರ ಮೈ ಮೇಲೆ ಕೆಂಪು ಗಂದೆಗಳು ಕಣ್ಣಿನ ಹಿಂಭಾಗ ನೋವು ತಲೆ ನೋವು ಮಾಂಸಖಂಡಗಳ ನೋವು ಈ ರೋಗದ ಪ್ರಮುಖ ಲಕ್ಷಣಗಳಾಗಿದ್ದು ಕೂಡಲೇ ವೈದ್ಯರನ್ನು ಸಂಪರ್ಕಿಸಬೇಕು’ ಎಂದು ಜಿಲ್ಲಾ ರಾಷ್ಟ್ರೀಯ ರೋಗವಾಹಕ ಆಶ್ರಿತ ರೋಗ ನಿಯಂತ್ರಣಾಧಿಕಾರಿ ಡಾ. ಶಶಿಧರ್ ಸಲೆಹ ನೀಡಿದರು.