ಮಾಗಡಿ: ಮಲಿನವಾಗುತ್ತಿದೆ ಐತಿಹಾಸಿಕ ಹೊಂಬಾಳಮ್ಮನ ಸಿಹಿ ನೀರಿನ ಕೆರೆ

ಮಾಗಡಿ ಸೀಮೆಯನ್ನು ಆಳುತ್ತಿದ್ದ ಗುಡೇಮಾರನಹಳ್ಳಿ ಪಾಳೇಗಾರ ತಳಾರಿ ಗಂಗಪ್ಪ ನಾಯಕ ಮಾಗಡಿಯಲ್ಲಿ ಮಣ್ಣಿನ ಕೋಟೆ ಕಟ್ಟಿಸಿದ್ದ. ಈ ಕೋಟೆಯ ಕಂದಕಕ್ಕೆ ನೀರು ತುಂಬಲು ಮತ್ತು ಕೋಟೆಯ ಒಳಗಿನ ಪಾಳೇಗಾರನ ಅರಮನೆ ದೇವಾಲಯಗಳಿಗೆ ಕುಡಿಯುವ ನೀರು ಬಳಸಲು ಕ್ರಿ.ಶ. 15ನೇ ಶತಮಾನದಲ್ಲಿ ಕೆರೆಯನ್ನು ಕಟ್ಟಿಸಿದ ಎಂಬುದು ಕೆರೆಯ ಐತಿಹಾಸಿಕ ದಾಖಲೆಯಲ್ಲಿದೆ. ಬೆಟ್ಟದ ಆಚೆ ಇದ್ದ ಚೆಲುವರಾಯ ಪಟ್ಟಣದಲ್ಲಿ ಸಾಂಕ್ರಾಮಿಕ ರೋಗ ಹರಡಿ ಇಡೀ ಊರಿನ ವಾಸಿಗಳೆಲ್ಲರೂ ಸಾಂಕ್ರಾಮಿಕ ರೋಗಕ್ಕೆ ಬಲಿಯಾದರು. ಚೆಲುವರಾಯ ಪಟ್ಟಣವನ್ನು ತ್ಯಜಿಸಿ ಮೊಮ್ಮಕ್ಕಳೊಂದಿಗೆ ಸಾಧ್ವಿ ಶಿರೋಮಣಿ ಹೊಂಬಾಳಮ್ಮ ಕೆರೆಯ ದಂಡೆಯಲ್ಲಿ ಬಂದು ನೆಲೆ ನಿಂತಳು. ಪಾಳೇಗಾರರು ಆಕೆಯ ಹೆಸರನ್ನೇ ಊರು ಮತ್ತು ಕೆರೆಗೆ ಇಟ್ಟರು. ಅಂದಿನಿಂದ ಹೊಂಬಾಳಮ್ಮನಕೆರೆ ಎಂದು ಹೆಸರಾಯಿತು.

ಹೊಂಬಾಳಮ್ಮನಕೆರೆಯಲ್ಲಿ ಸಿಹಿನೀರು ತುಂಬಿರುತ್ತಿತ್ತು. ನಮ್ಮ ಮನೆಗಳಲ್ಲಿ ಕುಡಿಯಲು ಮತ್ತು ಗರಡಿ ಮನೆಗಳಿಗೆ ಕೆರೆಯ ನೀರನ್ನು ಬಳಸುತ್ತಿದ್ದೆವು. ಬಾಲ್ಯದಲ್ಲಿ ಕೆರೆನೀರು ಶುದ್ಧವಾಗಿತ್ತು. ನಮ್ಮ ಓರಗೆಯ ಹುಡುಗರೆಲ್ಲಾ ಇದೇ ಕೆರೆಯಲ್ಲಿ ಈಜು ಕಲಿತೆವು. ವರ್ಷಕೊಮ್ಮೆ ಮಾರಮ್ಮ ಮಹೇಶ್ವರಮ್ಮ ಲಕ್ಷ್ಮೀದೇವಿ ಜಾತ್ರೆಯಲ್ಲಿ ಕೆರೆಯಲ್ಲಿ ಹೂವು ಹೊಂಬಾಳೆ ಪೂಜೆ ನಡೆಯುತ್ತಿತ್ತು. ಗ್ರಾಮದೇವತೆಗಳಿಗೆ ಅಭಿಷೇಕಕ್ಕೆ ಕೆರೆಯ ನೀರನ್ನೇ ಬಳಸುತ್ತಿದ್ದೆವು. 35 ವರ್ಷಗಳಿಂದಲೂ ಕೆರೆಯ ನೀರು ಮಲಿನವಾಗಿದೆ. ಕೆರೆಯನ್ನು ದುರಸ್ತಿಪಡಿಸಿ ಜಲಮೂಲ ಉಳಿಸಬೇಕು ಶಂಕರಪ್ಪ ಪತ್ರ ಬರಹಗಾರ ಹೊಂಬಾಳಮ್ಮನಪೇಟೆ