ಕಾರವಾರ | ನಿರ್ವಹಣೆಯಿಲ್ಲದೆ ಪಾಳುಬಿದ್ದ ಕಟ್ಟಡಗಳು: ವಸತಿಗೃಹದಲ್ಲಿ ಸರಿಸೃಪ ವಾಸ

ಜೊಯಿಡಾ ಮತ್ತು ಇದೇ ತಾಲ್ಲೂಕಿನ ವಿವಿಧ ಭಾಗಗಳಲ್ಲಿರುವ ಪೊಲೀಸ್ ಅರಣ್ಯ ಇಲಾಖೆಯ ಸಿಬ್ಬಂದಿ ವಸತಿಗೃಹಗಳು ನಿರ್ವಹಣೆ ಕಾಣದೆ ಪಾಳು ಬಿದ್ದಿದೆ. ಸಿಬ್ಬಂದಿ ಬಾಡಿಗೆ ಮನೆಗಾಗಿ ಅಲೆದಾಡುವ ಸ್ಥಿತಿ ನಿರ್ಮಾಣವಾಗಿದೆ. ತಾಲ್ಲೂಕು ಕೇಂದ್ರ ಜೊಯಿಡಾದಲ್ಲಿರುವ ಕೆಲವು ಪೊಲೀಸ್ ವಸತಿ ಗೃಹಗಳು ಕುಂಬಾರವಾಡ ಗುಂದ ಪಣಸೋಲಿ ಜಗಲಪೇಟ ತಿನೈಘಾಟ ಉಳವಿ ಮುಂತಾದ ವಲಯಗಳಲ್ಲಿ ಇರುವ ಅರಣ್ಯ ಇಲಾಖೆ ಸಿಬ್ಬಂದಿ ವಸತಿ ಗೃಹಗಳು ಹಲವು ವರ್ಷಗಳಿಂದ ದುರಸ್ತಿ ಕಂಡಿಲ್ಲ ವಸತಿಗೃಹಗಳ ನಿರ್ವಹಣೆ ಸರಿಯಾಗಿಲ್ಲದ ಕಾರಣ ಹಲವು ನೌಕರರು ಜೊಯಿಡಾ ಮತ್ತು ದಾಂಡೇಲಿಯಲ್ಲಿ ಬಾಡಿಗೆ ಮನೆ ಮಾಡಿಕೊಂಡಿದ್ದಾರೆ ಎಂಬ ದೂರು ಇದೆ. ‘ಅನುದಾನ ಬಂದಂತೆ ಹಂತ ಹಂತವಾಗಿ ವಸತಿಗೃಹಗಳನ್ನು ದುರಸ್ತಿ ಮಾಡಲಾಗುತ್ತಿದೆ’ ಎನ್ನುತ್ತಾರೆ ಕುಂಬಾರವಾಡ ಆರ್.ಎಫ್.ಒ ಎಸ್.ಬೈಲಾ.

ಮುಂಡಗೋಡ ಪಟ್ಟಣದ ಅರಣ್ಯ ಇಲಾಖೆ ಆವರಣ ಪೊಲೀಸ್‌ ಠಾಣೆಯ ಆವರಣ ತಾಲ್ಲೂಕು ಪಂಚಾಯಿತಿ ಆವರಣದಲ್ಲಿ ಸಿಬ್ಬಂದಿಗಾಗಿ ಹಲವು ವರ್ಷಗಳ ಹಿಂದೆಯೇ ವಸತಿ ಗೃಹಗಳನ್ನು ನಿರ್ಮಿಸಲಾಗಿದೆ. ಆದರೆ ಅವುಗಳು ಆರಂಭವಾದಾಗ ಕಂಡಿದ್ದ ಸುಣ್ಣ ಬಣ್ಣವನ್ನು ಮತ್ತೆ ಕಂಡಿಲ್ಲ ಎಂಬಂತಿವೆ. ಇನ್ನೂ ಕೆಲವು ವಸತಿಗೆ ಯೋಗ್ಯವಲ್ಲದ ಸ್ಥಿತಿಯಲ್ಲಿದ್ದು ಇಂದೋ ನಾಳೆ ಬೀಳುವ ಸ್ಥಿತಿಯಲ್ಲಿವೆ. ಅಂತವುಗಳು ಹಾವು ಹಂದಿಗಳ ವಾಸಸ್ಥಾನವಾಗಿವೆ. ಪೊಲೀಸ್‌ ವಸತಿಗೃಹಗಳು ಶಿಥಿಲಗೊಂಡಿರುವುದನ್ನೇ ಕೆಲವು ಸಿಬ್ಬಂದಿ ದುರಸ್ತಿಗೊಳಿಸಿಕೊಂಡು ಮನೆಯ ಚಾವಣಿಗೆ ಪೂರ್ತಿಯಾಗಿ ಪ್ಲಾಸ್ಟಿಕ್‌ ಹೊದಿಕೆ ಹಾಕಿಸಿಕೊಂಡು ವಾಸಿಸುತ್ತಿದ್ದಾರೆ.