ಯಾದಗಿರಿ | ಸ್ಥಳೀಯ ಸಂಸ್ಥೆಗಳಲ್ಲಿ ಮಾರ್ಗಸೂಚಿ ನಾಮಫಲಕಗಳ ಕೊರತೆ

ಶಹಾಪುರ: ನಗರದ ಬೀದರ್‌-ಶ್ರೀರಂಗಪಟ್ಟಣ ಹೆದ್ದಾರಿಗೆ ಹೊಂದಿಕೊಂಡ ಹಾಗೂ ಬಸವೇಶ್ವರ ನಗರ ಹೀಗೆ ಬೆರಳೆಣಿಕೆ ಬಡಾವಣೆಗಳಿಗೆ ನಗರಸಭೆಯು ನಾಮಫಲಕ ಅಳವಡಿಸಿದೆ. ಆದರೆ ಇನ್ನುಳಿದ ಬಡಾವಣೆಗಳಿಗೆ ಫಲಕ ಅಳವಡಿಸುವ ಭಾಗ್ಯ ಕೂಡಿ ಬಂದಿಲ್ಲ ಎನ್ನುತ್ತಾರೆ ನಗರದ ಜನತೆ. ಆಯಾ ಬಡಾವಣೆಯ ಪ್ರಮುಖ ದಾರಿಯಲ್ಲಿ ನಾಮಫಲಕ ಅಳವಡಿಸಿ ವಾರ್ಡ್ ನಂಬರ್‌ ವ್ಯಾಪ್ತಿಯಲ್ಲಿ ಬರುವ ಬಡಾವಣೆಯ ಹೆಸರು ಎಷ್ಟು ಮನೆಗಳು ಇವೆ. ಮತದಾರರ ಸಂಖ್ಯೆ ಹೀಗೆ ಸಮಗ್ರವಾದ ಮಾಹಿತಿಯನ್ನು ಒಳಗೊಂಡ ಮಾದರಿ ಬಗೆಯ ನಾಮಫಲಕವನ್ನು ಅಳವಡಿಸಿದರೆ ಜನತೆಗೆ ಹೆಚ್ಚಿನ ಅನುಕೂಲವಾಗುತ್ತದೆ ಎಂಬ ಸಲಹೆಯನ್ನು ನಗರದ ನಿವಾಸಿ ರವಿ ಹಿರೇಮಠ ನೀಡಿದರು.

ಸುರಪುರ: ಸುರಪುರ ನಗರ ದಿನೇ ದಿನೇ ಬೆಳೆಯುತ್ತಿದ್ದು ಸದ್ಯ 31 ವಾರ್ಡ್‌ಗಳಿವೆ. ಯಾವುದೇ ವಾರ್ಡ್‌ಗೆ ನಾಮಫಲಕ ಹಾಕಿಲ್ಲ. ವಾರ್ಡ್‌ಗಳ ವಿಂಗಡಣೆ ಬೇಕಾಬಿಟ್ಟಿಯಾಗಿ ಮಾಡಿದ್ದು ಯಾವ ಬಡಾವಣೆ ಯಾವ ವಾರ್ಡ್‌ನಲ್ಲಿ ಇದೆ ಎಂಬುದೇ ತಿಳಿಯುತ್ತಿಲ್ಲ. ನಾಮಫಲಕ ಅಳವಡಿಸುವ ಬಗ್ಗೆ ಇದುವರೆಗೂ ಯಾರೂ ಚಕಾರ ಎತ್ತಿಲ್ಲ. ನಗರಸಭೆ ಸಾಮಾನ್ಯ ಸಭೆಯಲ್ಲೂ ಈ ಬಗ್ಗೆ ಚರ್ಚೆ ಆಗಿಲ್ಲ. ಹೀಗಾಗಿ ನಾಮಫಲಕ ಅಳವಡಿಸುವ ಬಗ್ಗೆ ಯಾರಿಗೂ ಇಚ್ಛಾಶಕ್ತಿ ಇಲ್ಲ. ಯಾವ ವ್ಯಕ್ತಿಯೂ ತಮ್ಮ ವಿಳಾಸದಲ್ಲಿ ವಾರ್ಡ್ ಸಂಖ್ಯೆ ನಮೂದಿಸುವುದಿಲ್ಲ. ದೇವಸ್ಥಾನದ ಹತ್ತಿರ ವೃತ್ತದ ಹತ್ತಿರ ಎಂದೇ ವಿಳಾಸ ನೀಡುತ್ತಾರೆ. ವಾರ್ಡ್ ವಿವರ ಆ ವಾರ್ಡ್‌ನಲ್ಲಿ ಬರುವ ಮನೆಗಳ ಸಂಖ್ಯೆ ರಸ್ತೆ ಬಗ್ಗೆ ನಗರಸಭೆಯಲ್ಲಿ ಮಾಹಿತಿ ಫಲಕ ಹಾಕಿಲ್ಲ.