ಸ್ಪರ್ಧಾವಾಣಿ: ರಾಮಾಯಣ; ಜಗತ್ತಿನಾದ್ಯಂತ ಪಸರಿಸಿದ ಸಾಂಸ್ಕೃತಿಕ ಪರಂಪರೆ

ವಿಶ್ವದ ನಾನಾ ಭಾಗಗಳಲ್ಲಿ ರಾಮಾಯಣದ ಹಲವು ಆವೃತ್ತಿಗಳಿವೆ. ಸಾಮಾಜಿಕ, ಸಾಂಸ್ಕೃತಿಕ, ಆಧ್ಯಾತ್ಮಿಕ ಹಲವು ಮಜಲುಗಳಲ್ಲಿ ಬೇರೂರಿರುವ ರಾಮಾಯಣದ ಕಥೆಯು ಹೊಸ ಹೊಳಹುಗಳನ್ನು ನೀಡುತ್ತಲೇ ಬಂದಿದೆ. ಯುಪಿಎಸ್ಸಿ ಪ್ರಿಲಿಮ್ಸ್ ಮತ್ತು ಸಾಮಾನ್ಯ ಅಧ್ಯಯನ ಪತ್ರಿಕೆ - 1, ಕೆಪಿಎಸ್ಸಿ ಪ್ರಿಲಿಮ್ಸ್ ಮತ್ತು ಸಾಮಾನ್ಯ ಅಧ್ಯಯನ ಪತ್ರಿಕೆ -1, ಸೇರಿ ಎಲ್ಲ ಸ್ಪರ್ಧಾತ್ಮಕ ಪರೀಕ್ಷೆಗಳಿಗೆ ಕೇಳಬಹುದಾದ ಪೂರಕ ಮಾಹಿತಿಯಿದು.

ಪ್ರಧಾನಿ ನರೇಂದ್ರ ಮೋದಿ ಅವರು ಇತ್ತೀಚೆಗೆ ಲುವಾಂಗ್ ಪ್ರಬಾಂಗ್ನ ರಾಯಲ್ ಥಿಯೇಟರ್ ಪ್ರದರ್ಶಿಸಿದ ಫಲಕ್ ಫಲಮ್ ಅಥವಾ ಫ್ರಾ ಲಕ್ ಫ್ರಾ ರಾಮ್ ಎಂದು ಕರೆಲಾಗುವ ಲಾವೋ ರಾಮಾಯಣದ ಪ್ರದರ್ಶನದಲ್ಲಿ ಭಾಗವಹಿಸಿದ್ದರು. ಈ ವಿಚಾರ ಬಂದಾಗ ಕುಮಾರವ್ಯಾಸನ ತಿಣುಕಿದನು ಫಣಿರಾಯ ರಾಮಾ ಯಣದ ಕವಿಗಳ ಭಾರದಲಿ ತಿಂ ತಿಣಿಯ ರಘುವರ ಚರಿತೆಯಲ್ಲಿ ಕಾಲಿಡಲು ತೆರಪಿಲ್ಲ ಎಂದು ಉದ್ಗಾರ ಮಾಡಿ ಮಹಾಭಾರತದ ಕಡೆ ವಾಲಿಕೊಂಡ ರೋಚಕ ಮಾಹಿತಿ ನೆನಪಾಗುತ್ತದೆ. ಹಾಗಂತ ಅನಂತರ ಬಂದವರಾರೂ ರಾಮಾಯಣ ಬರೆಯದೇ ಬಿಟ್ಟಿಲ್ಲ. 12 ನೇ ಶತಮಾನದಲ್ಲಿ ಬಂದ ತೊರವೆ ನರಹರಿಯ ತೊರವೆ ರಾಮಾಯಣ, ನಾಗಚಂದ್ರನ ರಾಮಚಂದ್ರಚರಿತ ಪುರಾಣಗಳು ಬಂದವು. ಮುಂದೆ 17ನೇ ಶತಮಾನದಲ್ಲಿ ಪಾರ್ತಿ ಸುಬ್ಬ ಬರೆದ ಯಕ್ಷಗಾನ ಪ್ರಸಂಗಗಳಲ್ಲಿ ರಾಮಾಯಣದ ಎಲ್ಲಾ ಪಾತ್ರಗಳು ಗೆಜ್ಜೆ ಕಟ್ಟಿದವು. ಹಾಗೆಯೇ ಕೇರಳದ ಮಲಬಾರ್ ಪ್ರಾಂತ್ಯದಲ್ಲಿ ಬ್ಯಾರಿ ಭಾಷೆಯಲ್ಲಿ ಮಾಪಿಳ್ಳೆ ರಾಮಾಯಣವು ಇದೆ. ಕನ್ನಡ ಜನಪದದಲ್ಲಿ ಇರುವ ಗೊಂಡ ರಾಮಾಯಣವು ಆದಿವಾಸಗಳ ಕಣ್ಣಿನಲ್ಲಿ ಕಂಡ ರಾಮನ ವಿಶೇಷ ಕಥನ. ತುಳುವಿನಲ್ಲಿ ಮಂದಾರ ರಾಮಾಯಣವಿದೆ.

. ಹಲವು ರಾಮಾಯಣದ ಆವೃತ್ತಿಗಳು

ಹೀಗೆ ಅದ್ಭುತ ರಾಮಾಯಣ, ಆಧ್ಯಾತ್ಮ ರಾಮಾಯಣ, ಆನಂದ ರಾಮಾಯಣ, ಪಉಮ ಚರಿಯ, ಪದ್ಮಚರಿತ, ರಾಮಾಯಣ ದರ್ಶನಂ ಹೀಗೆ ರಾಮಾಯಣದ್ದೊಂದು ಕೊನೆಯಿಲ್ಲದ ಲೋಕ. ಈ ನಿಟ್ಟಿನಲ್ಲಿ ಏಷ್ಯಾ ಖಂಡದಲ್ಲಿ ಪ್ರಚಲಿತದಲ್ಲಿರುವ ಕೆಲವು ಪ್ರಮುಖ ರಾಮಾಯಣದ ಆವೃತ್ತಿಗಳನ್ನು ನೋಡೋಣ.

* ರಾಮಾಯಣವು ಲಾವೋಸ್ನಲ್ಲಿ ಪ್ರಸಿದ್ಧವಾದ ಮಹಾಕಾವ್ಯವಾಗಿ ಪರಿಗಣಿಸಲ್ಪಟ್ಟಿದ್ದು ಇದು ಭಾರತ ಮತ್ತು ಲಾವೋಸ್ ನಡುವಿನ ಆಳವಾದ ಬೇರೂರಿರುವ ಸಾಂಸ್ಕೃತಿಕ ಮತ್ತು ನಾಗರಿಕ ಸಂಬಂಧಗಳನ್ನು ಸಂಕೇತಿಸುತ್ತದೆ.

* ಶತಮಾನಗಳಿಂದ, ಭಾರತೀಯ ಸಂಸ್ಕೃತಿ ಮತ್ತು ಸಂಪ್ರದಾಯಗಳ ವಿವಿಧ ಅಂಶಗಳನ್ನು ಲಾವೋಸ್ನ ಜನರು ನಿರಂತರ ಆಚರಣೆಯ ಮೂಲಕ ಸಂರಕ್ಷಿಸಿಕೊಂಡು ಬಂದಿದ್ದಾರೆ.

* ಲಾವೋಸ್ನಲ್ಲಿರುವ ವ್ಯಾಟ್ ಫೌ ದೇವಾಲಯ ಮತ್ತು ಸಂಬಂಧಿತ ಸ್ಮಾರಕಗಳ ಮರುಸ್ಥಾಪನೆಯಲ್ಲಿ ಭಾರತದ ಪುರಾತತ್ವ ಸರ್ವೇಕ್ಷಣಾ ಇಲಾಖೆಯು ಹೆಚ್ಚಿನ ಮುತುವರ್ಜಿ ವಹಿಸಿವೆ. ಈ ಸಮಾರಂಭದಲ್ಲಿ ಪ್ರಧಾನಿ ನರೇಂದ್ರ ಮೋದಿ ಸೇರಿ ಗೃಹ ವ್ಯವಹಾರಗಳ ಸಚಿವರು, ಶಿಕ್ಷಣ ಮತ್ತು ಕ್ರೀಡಾ ಸಚಿವರು, ಬ್ಯಾಂಕ್ ಆಫ್ ಲಾವೊ ಪಿಡಿಆರ್ ಗವರ್ನರ್ ಮತ್ತು ವಿಯೆಂಟಿಯಾನ್ ಮೇಯರ್ ಸೇರಿ ಗಣ್ಯರು ಭಾಗವಹಿಸಿದ್ದರು. ಬೌದ್ಧ ಪರಂಪರೆ ಕೂಡಾ ಭಾರತ ಮತ್ತು ಲಾವೋಸ್ ನಡುವಿನ ಪ್ರಾಚೀನ ನಾಗರಿಕ ಸಂಬಂಧಗಳನ್ನು ಮತ್ತಷ್ಟು ಬಲಪಡಿಸುತ್ತದೆ.

. ಪ್ರಪಂಚದಾದ್ಯಂತ ರಾಮಾಯಣದ ವಿವಿಧ ಆವೃತ್ತಿಗಳು ಹೀಗಿವೆ :

1. ಭಾರತ : ವಾಲ್ಮೀಕಿ ಋಷಿಯಿಂದ ರಚಿಸಲಾದ ಮೂಲ ಸಂಸ್ಕೃತ ಆವೃತ್ತಿಯನ್ನು ರಾಮಾಯಣದ ಮೊದಲ ಮತ್ತು ಅತ್ಯಂತ ಅಧಿಕೃತ ಆವೃತ್ತಿ ಎಂದು ಪರಿಗಣಿಸಲಾಗಿದೆ. ಅದರ ಜತೆಗೆ ಹಿಂದಿಯಲ್ಲಿ ತುಳಸಿದಾಸರ ರಾಮಚರಿತಮಾನಗಳು, ತಮಿಳಿನಲ್ಲಿ ಕಂಬ ರಾಮಾಯಣ ಮತ್ತು ಮಲಯಾಳಂನಲ್ಲಿ ಅಧ್ಯಾತ್ಮ ರಾಮಾಯಣಗಳಂಥ ಹಲವು ಪ್ರಾದೇಶಿಕ ರೂಪಾಂತರಗಳು ಅಸ್ತಿತ್ವದಲ್ಲಿವೆ.

. 2. ಲಾವೋಸ್ : ಫ್ರಾ ಲಕ್ ಫ್ರಾ ರಾಮ್, ರಾಮಾಯಣದ ಲಾವೊ ಆವೃತ್ತಿಯಾಗಿದ್ದು ಇದು ಸ್ಥಳೀಯ ಸಂಪ್ರದಾಯದಲ್ಲಿ ಆಳವಾಗಿ ಬೇರೂರಿದ ಕಥಾನಕವಾಗಿದೆ. ಭಾರತ ಮತ್ತು ಆಗ್ನೇಯ ಏಷ್ಯಾದ ನಡುವಿನ ನಿರಂತರ ಸಾಂಸ್ಕೃತಿಕ ಮತ್ತು ಧಾರ್ಮಿಕ ಸಂಪರ್ಕಗಳನ್ನು ಪ್ರತಿಬಿಂಬಿಸುತ್ತದೆ.

. 3. ಥಾಯ್ಲೆಂಡ್ : ರಾಮಾಯಣದ ಥಾಯ್ ಆವೃತ್ತಿಯನ್ನು ರಾಮಾಕೀನ್ ಎಂದು ಕರೆಯಲಾಗುತ್ತದೆ. ಇದು ರಾಮಾಯಣದ ಜತೆಗೆ ಸ್ಥಳೀಯ ನಂಬಿಕೆಗಳು, ಕಲೆ ಮತ್ತು ಸಂಸ್ಕೃತಿಯನ್ನು ಸಂಯೋಜಿಸುತ್ತದೆ. ಇದನ್ನು ಸಾಂಪ್ರದಾಯಿಕ ನೃತ್ಯಪ್ರಕಾರಗಳಲ್ಲಿ ಮತ್ತು ರಂಗಭೂಮಿಯಲ್ಲಿ ಪ್ರದರ್ಶಿಸಲಾಗುತ್ತದೆ.

. 4. ಕಾಂಬೋಡಿಯಾ : ರೀಮ್ಕರ್ ಎನ್ನುವುದು ರಾಮಾಯಣದ ಕಾಂಬೋಡಿಯನ್ ಆವೃತ್ತಿಯಾಗಿದೆ. ಇದು ದೇಶದಲ್ಲಿ ಸಾಂಪ್ರದಾಯಿಕ ನೃತ್ಯ, ರಂಗಭೂಮಿ ಮತ್ತು ಮ್ಯೂರಲ್ ಕಲೆಯ ಮೇಲೆ ತನ್ನ ಆಳವಾದ ಪ್ರಭಾವವನ್ನು ಬೀರಿದೆ.

. 5. ಇಂಡೋನೇಷ್ಯಾ : ರಾಮಾಯಣ ಕಕಾವಿನ್ ರಾಮಾಯಣದ ಜಾವಾನೀಸ್ ರೂಪಾಂತರವಾಗಿದ್ದು, ಭಾರತೀಯ ನಿರೂಪಣಾ ಸಂಪ್ರದಾಯಗಳನ್ನು ಜಾವಾನೀಸ್ ಸಂಸ್ಕೃತಿಯೊಂದಿಗೆ ಸಂಯೋಜಿಸುತ್ತದೆ. ಇಂಡೋನೇಷ್ಯಾದಲ್ಲಿ ಇದನ್ನು ಸಾಂಪ್ರದಾಯಿಕ ನೆರಳು ಬೊಂಬೆ ರಂಗಮಂದಿರವಾದ ವಯಾಂಗ್ ಕುಲಿಟ್ ಮೂಲಕ ಪ್ರದರ್ಶಿಸಲಾಗುತ್ತದೆ.

. 6. ಮ್ಯಾನ್ಮಾರ್ ( ಬರ್ಮಾ ) : ಯಮ ಜಟ್ಡಾವ್ ಎಂದು ಕರೆಯಲಾಗುವ ಬರ್ಮೀಸ್ ರಾಮಾಯಣವು ಮ್ಯಾನ್ಮಾರ್ನ ಸ್ಥಳೀಯ ಸಂಪ್ರದಾಯಗಳೊಂದಿಗೆ ಭಾರತೀಯ ಸಾಂಸ್ಕೃತಿಕ ಪರಂಪರೆಯ ಏಕೀಕರಣವನ್ನು ಪ್ರತಿಬಿಂಬಿಸುತ್ತದೆ. ವಿಶೇಷವಾಗಿ ಅದರೆ ಶಾಸ್ತ್ರೀಯ ಪ್ರದರ್ಶನಗಳ ಮೂಲಕ ರಾಮಾಯಣ ಪರಂಪರೆಯನ್ನು ಜೀವಂತವಾಗಿ ಇಡಲಾಗಿದೆ.

. 7. ನೇಪಾಳ : ನೇಪಾಳ ಭಾಸ ರಾಮಾಯಣವು ರಾಮಾಯಣದ ಪ್ರಮುಖ ರೂಪಾಂತರಗಳಲ್ಲಿ ಒಂದಾಗಿದೆ. ರಾಮಾಯಣವನ್ನು ಮೈಥಿಲಿ ಆವೃತ್ತಿಯಲ್ಲಿರುವಂತೆ ಇತರ ರೂಪಗಳಲ್ಲಿ ಕೂಡಾ ವ್ಯಾಪಕವಾಗಿ ಆಚರಿಸಲಾಗುತ್ತದೆ.

. 8. ಶ್ರೀಲಂಕಾ : ಶ್ರೀಲಂಕಾದಲ್ಲಿ ರಾಮಾಯಣವು ಅತ್ಯಂತ ಪ್ರಮುಖವಾದ ಸಾಂಸ್ಕೃತಿಕ ಮತ್ತು ಐತಿಹಾಸಿಕ ಪ್ರಾಮುಖ್ಯವನ್ನು ಹೊಂದಿದೆ. ಮಹಾಕಾವ್ಯವು ಸಾಮಾನ್ಯವಾಗಿ ಶ್ರೀಲಂಕಾದ ಪುರಾಣ ಕತೆಗಳಿಗೆ ಸಂಬಂಧಿಸಿದೆ. ವಿಶೇಷವಾಗಿ ರಾವಣನನ್ನು ಶ್ರೀಲಂಕಾದ ಜಾನಪದದಲ್ಲಿ ಪ್ರಮುಖ ಪಾತ್ರವಾಗಿ ಚಿತ್ರಿಸಲಾಗಿದೆ.

. 9. ಮಲೇಷ್ಯಾ : ರಾಮಾಯಣವು ಮಲೇಷ್ಯಾದ ಸಾಂಸ್ಕೃತಿಕ ಪರಂಪರೆಯ ಭಾಗವಾಗಿದೆ. ವಿಶೇಷವಾಗಿ ಭಾರತೀಯ ವಲಸೆಗಾರರು ಅಲ್ಲಿ ಹೆಚ್ಚಾಗಿದ್ದು, ಮಹಾಕಾವ್ಯದ ಪ್ರದರ್ಶನಗಳನ್ನು ಸ್ಥಳೀಯ ಭಾಷೆಗಳಲ್ಲಿಯೇ ಪ್ರದರ್ಶಿಸಲಾಗುತ್ತದೆ.

. 10. ಪಿಲಿಫೈನ್ಸ್ : ಮಹಾರಾಡಿಯಾ ಲವಾನಾ ಎಂಬುದು ಫಿಲಿಪೈನ್ಸ್ನ ಮರನಾವೊ ಜನರಿಂದ ನಿರೂಪಿಸಲ್ಪಟ್ಟ ರಾಮಾಯಣದ ಸ್ಥಳೀಯ ಆವೃತ್ತಿಯಾಗಿದ್ದು, ಇದು ರಾವಣನ ಪಾತ್ರವನ್ನು ಕೇಂದ್ರೀಕರಿಸುತ್ತದೆ.

ರಾಮಾಯಣವು ತನ್ನ ಆಳವಾದ ಸಾಂಸ್ಕೃತಿಕ, ಆಧ್ಯಾತ್ಮಿಕ ಮತ್ತು ಸಾಮಾಜಿಕ ಪ್ರಭಾವದಿಂದ ಜನಮಾನಸದಲ್ಲಿ ಬೇರೂರಿದೆ. ಬದುಕಿನ ಒಳನೋಟಗಳು ರೂಪುಗೊಳ್ಳಲು ವಿಶೇಷ ಪ್ರಭಾವವನ್ನು ಬೀರಿದೆ. ಅವುಗಳಲ್ಲಿ ಕೆಲವು ಹೀಗಿವೆ.

. 1. ನೈತಿಕ ಮೌಲ್ಯಗಳು : ರಾಮಾಯಣ, ಅದರ ಕೇಂದ್ರ ವಿಷಯಗಳಾದ ಸದಾಚಾರ (ಧರ್ಮ), ಕರ್ತವ್ಯ, ನಿಷ್ಠೆ ಮತ್ತು ನ್ಯಾಯದ ಮೂಲಕ ಲಕ್ಷಾಂತರ ಜನರಿಗೆ ನೈತಿಕ ದಿಕ್ಸೂಚಿಯನ್ನು ಒದಗಿಸುತ್ತದೆ. ಇದು ಸತ್ಯಗುಣ, ಕೊಟ್ಟಮಾತಿನಂತೆ ನುಡಿಯುವ ಮಹತ್ವ, ತ್ಯಾಗ ಮತ್ತು ಸಂಬಂಧಗಳಿಗೆ ಗೌರವ ನೀಡುವಂತ ಮೌಲ್ಯಗಳನ್ನು ಕಲಿಸುತ್ತದೆ. ಸಾಮಾಜಿಕ ರೂಢಿಗಳು ಮತ್ತು ವೈಯಕ್ತಿಕ ನಡವಳಿಕೆಯನ್ನು ರೂಪಿಸುತ್ತದೆ.

. 2. ಸಾಂಸ್ಕೃತಿಕ ಗುರುತು ಮತ್ತು ಸಂಪ್ರದಾಯಗಳು : ಭಾರತ, ನೇಪಾಳ, ಶ್ರೀಲಂಕಾ, ಥಾಯ್ಲೆಂಡ್, ಇಂಡೋನೇಷಿಯಾ ಮತ್ತು ಲಾವೋಸ್ನಂಥ ದೇಶಗಳ ಸಾಂಸ್ಕೃತಿಕ ರಚನೆಯಲ್ಲಿ ರಾಮಾಯಣವು ಆಳವಾಗಿ ಹೆಣೆಯಲ್ಪಟ್ಟಿದೆ. ರಾಮಾಯಣವು ಅಲ್ಲಿಯೂ ರಾಷ್ಟ್ರೀಯ ಹೆಮ್ಮೆ ಮತ್ತು ಸಾಂಸ್ಕೃತಿಕ ಗುರುತಿನ ಮೂಲವಾಗಿದೆ. ಅದರ ಪಾತ್ರಗಳು ಮತ್ತು ಘಟನೆಗಳಿಗೆ ಮೀಸಲಾದ ಹಬ್ಬಗಳು, ಕಲಾ ಪ್ರಕಾರಗಳು ಮತ್ತು ಆಚರಣೆಗಳು ಈ ಮಹಾಕಾವ್ಯದ ವ್ಯಾಪಕತೆಯನ್ನು ಹೆಚ್ಚಿಸಿವೆ. ಉದಾಹರಣೆಗೆ ಭಾರತದಲ್ಲಿ ರಾಮಲೀಲಾ ಪ್ರದರ್ಶನಗಳು ಮತ್ತು ಥಾಯ್ಲೆಂಡ್ನಲ್ಲಿ ರಾಮಾಕೀನ್ ಅನ್ನು ರಾಷ್ಟ್ರೀಯ ಸಂಪ್ರದಾಯಗಳಾಗಿ ಆಚರಿಸಲಾಗುತ್ತದೆ.

. 3. ಆಧ್ಯಾತ್ಮಿಕ ಪ್ರಭಾವ : ರಾಮಾಯಣವನ್ನು ಆಧ್ಯಾತ್ಮಿಕ ಪಠ್ಯವಾಗಿ ಪೂಜಿಸಲಾಗುತ್ತದೆ. ವಿಶೇಷವಾಗಿ ಹಿಂದೂ ಧರ್ಮ, ಬೌದ್ಧ ಧರ್ಮ ಮತ್ತು ಜೈನ ಧರ್ಮಗಳಲ್ಲಿ. ಇದು ಭಕ್ತಿ, ದೇವರ ಸ್ವರೂಪ ಮತ್ತು ಮೋಕ್ಷದ ಮಾರ್ಗದ ಬಗ್ಗೆ ಮಾರ್ಗದರ್ಶನ ನೀಡುತ್ತದೆ. ಪ್ರಪಂಚದಾದ್ಯಂತ ಜನರು ಶ್ರೀರಾಮನ ಸಚ್ಚಾರಿತ್ರ್ಯ, ಲಕ್ಷ್ಮಣನ ಸೋದರಪ್ರೇಮ, ಸೀತೆಯ ಪಾವಿತ್ರ್ಯತೆ ಮತ್ತು ಹನುಮಂತನ ಸ್ವಾಮಿಭಕ್ತಿಯಂಥ ಸದ್ಗುಣಗಳಿಂದ ಸ್ಫೂರ್ತಿ ಪಡೆಯುತ್ತಿದ್ದಾಋಎ. ಇದು ಭಕ್ತಿ ಮತ್ತು ನೈತಿಕ ಜೀವನವನ್ನು ಪ್ರೋತ್ಸಾಹಿಸುತ್ತದೆ.

. 4. ಸಾಹಿತ್ಯ ಮತ್ತು ಕಲಾತ್ಮಕ ಸ್ಫೂರ್ತಿ : ರಾಮಾಯಣವು ಕವಿತೆ ಮತ್ತು ರಂಗಭೂಮಿಯಿಂದ ಹಿಡಿದು ಚಿತ್ರಕಲೆ ಮತ್ತು ಶಿಲ್ಪಕಲೆಯಂತಹಾ ಅಸಂಖ್ಯಾತ ಸಾಹಿತ್ಯ ಮತ್ತು ಕಲಾತ್ಮಕ ಸೃಷ್ಟಿಗಳಿಗೆ ವಿಶೇಷ ಸ್ಫೂರ್ತಿಯನ್ನು ನೀಡಿದೆ. ಆಗ್ನೇಯ ಏಷ್ಯಾದಲ್ಲಿ, ರಾಮಾಯಣವು ಇಂಡೋನೇಷ್ಯಾದ ವಯಾಂಗ್ ಕುಲಿತ್ (ನೆರಳು ಬೊಂಬೆಯಾಟ) ಮತ್ತು ಥಾಯ್ಲೆಂಡ್ನ ಖೋನ್ ನೃತ್ಯದಂತಹ ಸಾಂಪ್ರದಾಯಿಕ ನೃತ್ಯ ಪ್ರಕಾರಗಳನ್ನು ಕೂಡಾ ಗಾಢವಾಗಿ ಪ್ರಭಾವಿಸಿದೆ. ಕಾಂಬೋಡಿಯಾದಲ್ಲಿನ ಅಂಕೋರ್ ವಾಟ್ ಮತ್ತು ಲಾವೋಸ್ನ ವ್ಯಾಟ್ ಫೌ ದೇವಾಲಯದಂತಹ ದೇವಾಲಯಗಳು ಮತ್ತು ಸ್ಮಾರಕಗಳಲ್ಲಿನ ಪ್ರಾಚೀನ ವಾಸ್ತುಶಿಲ್ಪದ ವಿನ್ಯಾಸಗಳನ್ನು ಈ ಕತೆಯು ಪ್ರೇರೇಪಿಸಿದೆ.

. 5. ಸಾಮಾಜಿಕ ಒಗ್ಗಟ್ಟು ಮತ್ತು ಹಬ್ಬಗಳು : ಭಾರತದಲ್ಲಿ ದೀಪಾವಳಿಯಂತಹ ಹಬ್ಬಗಳ ಸಂದರ್ಭದಲ್ಲಿ ಜನರು ಶ್ರೀರಾಮನು ಅಯೋಧ್ಯೆಗೆ ಹಿಂದಿರುಗಿ ಬರುವ ಪ್ರಸಂಗದ ಸ್ಮರಣಾರ್ಥ ಆಚರಿಸುವ ಸಂಭ್ರಮ ಮತ್ತು ರಾಮಲೀಲಾದಂತಹ ಘಟನೆಗಳು ಸಾಮಾಜಿಕ ಐಕ್ಯತೆ ಮತ್ತು ಒಗ್ಗಟ್ಟನ್ನು ಉತ್ತೇಜಿಸುತ್ತವೆ. ಪ್ರಪಂಚದಾದ್ಯಂತ ಲಕ್ಷಾಂತರ ಜನರು ಆಚರಿಸುವ ಈ ಆಚರಣೆಗಳು ಧಾರ್ಮಿಕ ಗಡಿಗಳನ್ನು ಮೀರಿ ಹಲವು ಸಮುದಾಯಗಳನ್ನು ಕೂಡಾ ಒಟ್ಟಿಗೆ ತರುತ್ತವೆ.

. 6. ರಾಜತಾಂತ್ರಿಕ ಮತ್ತು ಸಾಂಸ್ಕೃತಿಕ ಸಂಬಂಧಗಳು : ರಾಮಾಯಣದ ಹಂಚಿಕೆಯ ಪರಂಪರೆಯು ದೇಶಗಳ ನಡುವೆ, ವಿಶೇಷವಾಗಿ ದಕ್ಷಿಣ ಮತ್ತು ಆಗ್ನೇಯ ಏಷ್ಯಾದಲ್ಲಿ ರಾಜತಾಂತ್ರಿಕ ಮತ್ತು ಸಾಂಸ್ಕೃತಿಕ ಸಂಬಂಧಗಳನ್ನು ಬೆಳೆಸುತ್ತದೆ. ಇದು ಈ ವಲಯದಲ್ಲಿನ ಸಾಮಾನ್ಯ ಇತಿಹಾಸವನ್ನು ಪ್ರತಿಬಿಂಬಿಸುತ್ತದೆ. ಮಹಾಕಾವ್ಯದ ಜತೆಗೆ ಹಂಚಿಕೊಳ್ಳುವ ಸಂಬಂಧವು ಸಾಂಸ್ಕೃತಿಕ ತಂತುವಿನೊಂದಿಗೆ ಹೆಣೆದುಕೊಂಡು ರಾಷ್ಟ್ರಗಳ ನಡುವೆ ತಿಳಿವಳಿಕೆ ಮತ್ತು ಸಹಕಾರವನ್ನು ಹೆಚ್ಚಿಸುತ್ತದೆ.

. 7. ಶೈಕ್ಷಣಿಕ ಚೌಕಟ್ಟು : ರಾಮಾಯಣವು ಶೈಕ್ಷಣಿಕ ಸಾಧನವಾಗಿ ಮಾರ್ಪಟ್ಟಿದೆ. ವಿದ್ಯಾರ್ಥಿಗಳಿಗೆ ಸದ್ಗುಣಗಳ ಪ್ರಾಮುಖ್ಯತೆ, ನಾಯಕತ್ವದ ಪಾಠಗಳನ್ನು ಕಲಿಸುತ್ತದೆ. ಶಾಲೆಗಳು ಮತ್ತು ಧಾರ್ಮಿಕ ಸಂಸ್ಥೆಗಳಲ್ಲಿ ನೈತಿಕತೆ ಮತ್ತು ನೈತಿಕತೆಯ ಪಾಠಗಳನ್ನು ನೀಡಲು ಈ ಮಹಾಕಾವ್ಯವನ್ನು ಬಳಸಲಾಗುತ್ತದೆ. ರಾಮಾಯಣದ ಪ್ರಭಾವವು ಸಾಹಿತ್ಯ ಮತ್ತು ಧರ್ಮವನ್ನು ಮೀರಿ ವಿಸ್ತರಿಸಿದೆ. ಇದು ಪ್ರಪಂಚದಾದ್ಯಂತದ ಜನರ ದೈನಂದಿನ ಜೀವನ, ಸಾಮಾಜಿಕ ಪದ್ಧತಿಗಳು, ಹಬ್ಬಗಳು ಮತ್ತು ಸಾಂಸ್ಕೃತಿಕ ಗುರುತುಗಳನ್ನು ಪ್ರಭಾವಿಸಿದೆ. ಹಾಗೂ ನಾಗರಿಕರಿಗೆ ವಿಶ್ವ ದೃಷ್ಟಿಕೋನ ಮತ್ತು ಮೌಲ್ಯಗಳನ್ನು ರೂಪಿಸುತ್ತದೆ.

. ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್ , ಎಕ್ಸ್ , ಫೇಸ್ಬುಕ್ ಮತ್ತು ಇನ್ಸ್ಟಾಗ್ರಾಂ ನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.

ಸ್ಪರ್ಧಾವಾಣಿ: ರಾಮಾಯಣ; ಜಗತ್ತಿನಾದ್ಯಂತ ಪಸರಿಸಿದ ಸಾಂಸ್ಕೃತಿಕ ಪರಂಪರೆ

ಚಿನಕುರುಳಿ | ಗುರುವಾರ, 14 ನವೆಂಬರ್ 2024

ಚುರುಮುರಿ: ಎಲೆಕ್ಷನ್‌ ಹರಾಜು!

ದಿನ ಭವಿಷ್ಯ | ಈ ರಾಶಿಯ ಕಥೆ ಬರಹಗಾರರಿಗೆ ಶುಭ ದಿನ

ಚಿನಕುರುಳಿ | ಬುಧವಾರ, 13 ನವೆಂಬರ್ 2024

ಆಸ್ಟ್ರೇಲಿಯಾ ಸರಣಿಯಲ್ಲಿ ಕೊಹ್ಲಿ ಫಾರ್ಮ್‌ಗೆ ಮರಳುತ್ತಾರೆ: ರವಿ ಶಾಸ್ತ್ರಿ

ಮಹಿಳೆಯರ ಏಷ್ಯನ್ ಚಾಂಪಿಯನ್ಸ್ ಟ್ರೋಫಿ ಹಾಕಿ: ಗೋಲುಮಳೆಗರೆದ ಭಾರತ

ರಣಜಿಯಲ್ಲಿ ದಾಖಲೆ ಜೊತೆಯಾಟ; ಸ್ನೇಹಲ್‌, ಕಶ್ಯಪ್‌ ತ್ರಿಶತಕ: ಗೋವಾಕ್ಕೆ ಜಯ

Ranji Trophy | ಶ್ರೀಜಿತ್‌ ಶತಕ, ಪರಂತಾಪ್ ಪ್ರತಾಪ; ಕರ್ನಾಟಕ ಮೇಲುಗೈ

ಒಳನೋಟ: ದಾಂಪತ್ಯ ಸಾಂಗತ್ಯಗಳ ಸುತ್ತ

ಒಳನೋಟ | ಹೆಜ್ಜೆ ಹೆಜ್ಜೆಗೂ ಎಸ್‌ಐಟಿ ತನಿಖೆ

ಒಳನೋಟ | ‘ಅಕ್ರಮ ವಲಸೆ’: ನೆಲೆ ವಿಸ್ತಾರ

ಒಳನೋಟ | ಸಮ್ಮೇಳನಾಧ್ಯಕ್ಷತೆ: ‘ರಾಜಕೀಯ’ ಗುಂಗು

ಚಿನಕುರುಳಿ | ಗುರುವಾರ, 14 ನವೆಂಬರ್ 2024

ಚುರುಮುರಿ: ಎಲೆಕ್ಷನ್‌ ಹರಾಜು!

ದಿನ ಭವಿಷ್ಯ | ಈ ರಾಶಿಯ ಕಥೆ ಬರಹಗಾರರಿಗೆ ಶುಭ ದಿನ

ಚಿನಕುರುಳಿ | ಬುಧವಾರ, 13 ನವೆಂಬರ್ 2024