ರೈತರು ಜಮೀನು ಸರ್ವೆ ಮಾಡಿಸಬೇಕೆಂದರೆ ಸರ್ವೆ ಕಚೇರಿಗೆ ತಿಂಗಳಾನುಗಟ್ಟಲೇ ಅಲೆದಾಡಬೇಕಾಗುತ್ತಿದೆ. ಲಂಚ ಕೊಡದೇ ಇದ್ದರೆ ರೈತರನ್ನು ಮಾತನಾಡಿಸುವುದೂ ಇಲ್ಲ. ಸರ್ವೇಯರ್‌ಗಳ ಕೊರತೆಯ ನೆಪ ಹೇಳಿ ಉದ್ದೇಶಪೂರ್ವಕವಾಗಿ ವಿಳಂಬ ಮಾಡುತ್ತಾರೆ. ಅವರಿಗೆ ‘ಪ್ರಸಾದ’ ಮುಟ್ಟಿಸಿದರಷ್ಟೇ ಕೆಲಸಗಳು ಆಗುತ್ತವೆ. ಯಾವ ಸರ್ಕಾರ ಬಂದರೂ ಈ ಇಲಾಖೆ ಮಾತ್ರ ಬದಲಾಗುವುದಿಲ್ಲ.

ತಾಲ್ಲೂಕು ಕಚೇರಿಗಳಲ್ಲಿ ಮಧ್ಯವರ್ತಿಗಳ ಹಾವಳಿ ಹೆಚ್ಚುತ್ತಿದೆ. ಒಂದು ಸರ್ವೆ ನಂಬರ್‌ನಲ್ಲಿ ಎರಡಕ್ಕಿಂತ ಹೆಚ್ಚು ಜನರ ಹೆಸರಿದ್ದರೆ ಅದನ್ನು ಪ್ರತ್ಯೇಕ (ಪೋಡಿ) ಮಾಡಲು ರೈತರಿಂದ ದುಪ್ಪಟ್ಟು ಹಣಕ್ಕೆ ಬೇಡಿಕೆ ಇಡಲಾಗುತ್ತದೆ. ಜಿಲ್ಲಾವಾರು ತಹಶೀಲ್ದಾರ್‌ಗೆ ಹೆಚ್ಚಿನ ಅಧಿಕಾರ ನೀಡಬೇಕು. ಇಲ್ಲಿ ಸರ್ವೆ ಕಾರ್ಯಕ್ಕೆ ಸಿಬ್ಬಂದಿ ನೇಮಕ ಆಗದ ಹೊರತು ಸಮಸ್ಯೆ ಬಗೆಹರಿಯುವುದಿಲ್ಲ.

ರೈತರಿಗೆ ಕಂದಾಯ ಇಲಾಖೆ ಕುರಿತ ಕಾನೂನು ತಿಳಿವಳಿಕೆ ಕಡಿಮೆ ಇದೆ. ಇದನ್ನು ದುಷ್ಟಶಕ್ತಿಗಳು ದುರ್ಬಳಕೆ ಮಾಡಿಕೊಳ್ಳುತ್ತಿವೆ. ಇಲ್ಲಿ ಬಗೆಹರಿಸಬಹುದಾದ ತೊಡಕುಗಳು ಸಾಕಷ್ಟಿವೆ. ಸರ್ಕಾರ ಇದನ್ನು ಬಗೆಹರಿಸುವತ್ತ ಹೆಜ್ಜೆ ಇಡಬೇಕು.

ಕಂದಾಯ ಇಲಾಖೆ ಎಂದರೆ ಜನರನ್ನು ಸತಾಯಿಸುವ ಇಲಾಖೆ ಎಂದೇ ಕುಖ್ಯಾತಿ ಪಡೆದಿದೆ. ರೈತರಿಗೆ ಅಗತ್ಯದ ಕೆಲಸಗಳನ್ನು ಮಾಡಿಸಿಕೊಳ್ಳಲು ಕಷ್ಟವಾಗುತ್ತಿದೆ. ಆರ್‌ಟಿಸಿ ನೋಂದಣಿ, ಖಾತೆ ಬದಲಾವಣೆ ಮುಂತಾದ ಕೆಲಸಗಳು ಇದ್ದರೆ ದಿನಗಟ್ಟಲೆ ಕಾಯಬೇಕಾದ ಸ್ಥಿತಿ ನಿರ್ಮಾಣವಾಗಿದೆ. ಅಲೆದಾಡಿ ಸುಸ್ತಾಗಿರುತ್ತಾರೆ.