ಕೊಡಗು: ಜಿಲ್ಲೆಗೆ ಬೇಕು ಸುರಕ್ಷಿತ ‘ಮಾನ್ಸುನ್ ಟೂರಿಸಂ’

ಕೊಡಗು ಜಿಲ್ಲೆಯಲ್ಲಿ ಸರಿಸಮಾರು 6 ತಿಂಗಳ ಕಾಲ ಪ್ರವಾಸೋದ್ಯಮ ವಲಯ ಮಂಕಾಗಿರುತ್ತದೆ. ಇದನ್ನೇ ಪ್ರತ್ಯಕ್ಷವಾಗಿ ಮತ್ತು ಪರೋಕ್ಷವಾಗಿ ನಂಬಿಕೊಂಡು ಜಿಲ್ಲೆಯಲ್ಲಿ ಒಂದರಿಂದ ಒಂದೂವರೆ ಲಕ್ಷ ಮಂದಿ ಇದ್ದಾರೆ. ಸರ್ಕಾರ ಇನ್ನಾದರೂ ಸುರಕ್ಷಿತ ಹಾಗೂ ಪರಿಸರ ಸ್ನೇಹಿ ಪ್ರವಾಸೋದ್ಯಮಕ್ಕೆ ಇಂಬು ನೀಡಬೇಕಿದೆ

ಕೊಡಗು ಜಿಲ್ಲೆಯಲ್ಲಿ ಮಾನ್ಸೂನ್ ಟೂರಿಸಂಗೆ ಹೆಚ್ಚಿನ ಆದ್ಯತೆ ನೀಡಬೇಕು. ಇದಕ್ಕೂ ಮೊದಲು ಎಲ್ಲ ಬಗೆಯ ಪ್ರವಾಸಿ ಸ್ಥಳಗಳಲ್ಲಿ ಪೊಲೀಸ್ ಭದ್ರತೆ ಒದಗಿಸಬೇಕು. ಗರಿಷ್ಠ ಮುನ್ನಚ್ಚರಿಕೆ ವಹಿಸಬೇಕು. ಜಿಲ್ಲಾಡಳಿತ ಮತ್ತು ಜಿಲ್ಲಾ ಪೊಲೀಸರು ಈ ಬಗೆಯ ಕ್ರಮಗಳನ್ನು ಕೈಗೊಂಡರೆ ನಿಜಕ್ಕೂ ಕೊಡಗಿನ ಪ್ರವಾಸೋದ್ಯಮ ವಲಯಕ್ಕೆ ಹೆಚ್ಚಿನ ಶಕ್ತಿ ಒದಗುತ್ತದೆ.

ಅತಿಯಾದ ಮಳೆ ಗಾಳಿಯಿಂದಾಗಿ ರೆಡ್ ಅಲರ್ಟ್ ಘೋಷಣೆಯಾದರೆ ರೆಸಾರ್ಟ್ ಮತ್ತು ಹೋಂಸ್ಟೇನವರು ಯಾವುದೇ ಬುಕಿಂಗ್ ಮಾಡಿಕೊಳ್ಳುವಂತೆ ಇಲ್ಲ. ಜತೆಗೆ ಮಳೆಗಾಲದಲ್ಲಿ ವಿದ್ಯುತ್ ಕೂಡ ಇರುವುದಿಲ್ಲ. ಆದರೆ ನಮ್ಮೊಳಗಿನ ಖರ್ಚು ಮಾತ್ರ ಎಂದಿನಂತೆ ಇರುತ್ತದೆ. ಕೆಲಸದವರಿಗೆ ವೇತನ ಕೂಡಲೇಬೇಕು. ಹೀಗಾಗಿ ಮಳೆಗಾಲದಲ್ಲಿ ನಮ್ಮ ಬವಣೆ ಹೇಳತೀರದಾಗಿದೆ.

ಮಳೆಗಾಲಕ್ಕೆ ರಸ್ತೆ ಎಷ್ಟೇ ಉತ್ತಮವಾಗಿದ್ದರೂ ನಿಲ್ಲುವುದಿಲ್ಲ. ಸಿಮೆಂಟ್‌ ರಸ್ತೆ ಆದರೂ ಬದಿ ಕುಸಿದು ವಾಹನ ಸಂಚಾರಕ್ಕೆ ತೊಂದರೆಯಾಗುತ್ತಿದೆ. ಮಳೆ ನಿಂತ ಮೇಲೆ ಇದರ ದುರಸ್ತಿಗೆ ಹಣ ವ್ಯಯವಾಗುತ್ತದೆ. ಬೇಸಿಗೆಯಲ್ಲಿ ಗಳಿಸಿದ್ದೆಲ್ಲ ಮಳೆಗಾಲದಲ್ಲಿ ಕರಗಿ ಹೋಗುತ್ತದೆ. ಶಾಶ್ವತವಾದ ರಸ್ತೆಗಳನ್ನು ನಿರ್ಮಿಸಬೇಕಿದೆ.