ಪೆನ್ ಡ್ರೈವ್ ಸಂತ್ರಸ್ತೆಯರ ಸಂಕಟ: ದೀರ್ಘ ರಜೆ ಪಡೆಯಲು ಮಹಿಳಾ ಸಿಬ್ಬಂದಿ ಹಿಂಜರಿಕೆ

ಪೆನ್‌ ಡ್ರೈವ್ ಬಹಿರಂಗದೊಂದಿಗೆ ವರ್ಷಗಳಿಂದ ಮಡುಗಟ್ಟಿದ ಸಂತ್ರಸ್ತೆಯರ ನೋವು ಕಣ್ಣೀರ ಧಾರೆಯಾಗಿದೆ. ಅಜ್ಞಾತದ ಕತ್ತಲು ಅವರನ್ನು ಇನ್ನಷ್ಟು ಭಯಭೀತರನ್ನಾಗಿ ಮಾಡಿದೆ. ಕುಟುಂಬದವರಿಂದಲೂ ತಾತ್ಸಾರಕ್ಕೊಳಗಾಗಿರುವ ಹಲವಾರು ಸಂತ್ರಸ್ತೆಯರ ಪಾಲಿಗೆ ಮೊಬೈಲ್ ಫೋನ್ ಸಾಂತ್ವನದ ಸಂಗಾತಿಯಾಗಿತ್ತು. ಆದರೆ, ಕರೆ ಮಾಡುವವರ ಕಾಟ, ಉತ್ತರಿಸಲಾಗದ ಸಂಕಟ, ಎಸ್‌ಐಟಿಯಿಂದ ಕರೆ ಬರುವ ಭೀತಿ, ಅನಿವಾರ್ಯವಾಗಿ ಅವರು ಮೊಬೈಲ್ ಫೋನ್‌ಗಳನ್ನು ಸ್ವಿಚ್ಡ್‌ ಆಫ್ ಮಾಡಿ, ಯಾರ ಸಂಪರ್ಕದ ಗೋಜಿಲ್ಲದ ಸ್ಥಳಕ್ಕೆ ತಲುಪಿದ್ದಾರೆ ಎನ್ನುತ್ತಾರೆ ಕೌನ್ಸಿಲಿಂಗ್ ನಡೆಸುವ ವೈದ್ಯೆಯೊಬ್ಬರು.‌

ಮಳೆ ಬಂದು ಹಾಸನದ ಇಳೆ ತಣ್ಣಗಾಗಿದೆ. ಆದರೆ‌, ಇಲ್ಲಿನ ಜನರ ಅದರಲ್ಲೂ ವಿಶೇಷವಾಗಿ ಮಹಿಳೆಯರ ಎದೆಯಲ್ಲಿ ‘ಪೆನ್‌ಡ್ರೈವ್’ ಎಂಬ ಭಯದ ಎಸರು ಕುದಿಯುತ್ತಿದೆ.‌ ಹೊಳೆನರಸೀಪುರದಲ್ಲಿದ್ದ 20ಕ್ಕೂ ಹೆಚ್ಚು ಜನರು (ಕೆಲವರು ಕುಟುಂಬ ಸಮೇತರಾಗಿ) ಊರು ತೊರೆದಿದ್ದಾರೆ. ಮನೆ ಗೇಟ್‌ವೊಂದಕ್ಕೆ ‘ಮನೆ ಮಾರಾಟಕ್ಕಿದೆ’ ಎಂಬ ಫಲಕ ಹಾಕಲಾಗಿದೆ. ಯಾವುದೇ ಮಹಿಳೆಯ ಚಿತ್ರವನ್ನು ಮಸುಕು ಮಾಡದೆ ಅಶ್ಲೀಲವಾಗಿ ಪೆನ್‌ಡ್ರೈವ್‌ನಲ್ಲಿ ಹರಿಯಬಿಡಲಾಗಿದೆ. ಆಕೆಯ ಖಾಸಗಿತನಕ್ಕೆ ಧಕ್ಕೆಯಾಗಿದ್ದು, ಶ್ರೀಮಂತ ಕುಟುಂಬದ ಒಬ್ಬರು ಮಹಿಳೆ ವಿಷ ಸೇವಿಸಿ, ಚಿಕಿತ್ಸೆ ಪಡೆದು ಚೇತರಿಸಿಕೊಳ್ಳುತ್ತಿರುವ ಸಂಗತಿ ಈಗ ನಿಧಾನಕ್ಕೆ ಬಹಿರಂಗಗೊಳ್ಳುತ್ತಿದೆ.