ಚುರುಮುರಿ: ಖುಷಿ ಮೇಳ

ಕೃಷಿ ಕಲ್ಚರ್ ಪರಿಚಯಿಸಲು ಶಂಕ್ರಿ, ಸುಮಿ ಮಕ್ಕಳನ್ನು ಕೃಷಿಮೇಳಕ್ಕೆ ಕರೆತಂದಿದ್ದರು. ಶಾಲೆಯ ವೇಷಭೂಷಣ ಸ್ಪರ್ಧೆಯಲ್ಲಿ ಮಗಳು ‘ರೈತ ಮಹಿಳೆ’ ವೇಷದಲ್ಲಿ ಬಹುಮಾನ ವಂಚಿತಳಾಗಿದ್ದರಿಂದ ಸುಮಿಗೆ ಸಂಕಟವಾಗಿತ್ತು. ಕೃಷಿಮೇಳದಿಂದ ಮಗಳ ಭವಿಷ್ಯದ ಚಟುವಟಿಕೆಗೆ ಸಹಾಯವಾಗಬಹುದು ಎಂದುಕೊಂಡಳು.

. ಕೃಷಿಮೇಳ ಮಕ್ಕಳಿಗೆ ಹೊಸ ಲೋಕದಂತೆ ಕಂಡಿತ್ತು. ಮನೆಗೆ ತರುತ್ತಿದ್ದ ಕೇಜಿ, ಅರ್ಧ ಕೇಜಿ ದವಸಧಾನ್ಯ ನೋಡಿದ್ದ ಮಕ್ಕಳು ಧಾನ್ಯದ ರಾಶಿಗಳನ್ನು ಕಂಡು ಅಚ್ಚರಿಪಟ್ಟರು. ಅಲಂಕರಿಸಿದ್ದ ದನಗಳ ಮೈ ಸವರಿದರು.

. ‘ಡ್ಯಾಡಿ, ಹಸು ಹಾಲು ಕೊಡುತ್ತೆ, ಎತ್ತು ಏನು ಕೊಡುತ್ತೆ?’ ಮಗ ಕೇಳಿದ.

. ‘ಎತ್ತುಗಳು ಹೊಲ ಉಳುತ್ತವೆ. ಗಾಡಿ ಎಳೆಯುತ್ತವೆ. ರೈತರ ಕುಟುಂಬದ ಸದಸ್ಯರಂತೆ ದನಕರುಗಳು ದುಡಿಯುತ್ತವೆ. ಕುಟುಂಬ ಸದಸ್ಯರಾದರೂ ದನಕರುಗಳ ಹೆಸರು ರೇಷನ್ ಕಾರ್ಡಿನಲ್ಲಿ, ವೋಟರ್ ಲಿಸ್ಟಿನಲ್ಲಿ ಇರೊಲ್ಲ’ ಅಂದ ಶಂಕ್ರಿ.

. ‘ಮಮ್ಮೀ, ಅಲ್ಲಿ ದೊಡ್ಡ ಒನಕೆ!’ ಮಗಳು ಗುರುತಿಸಿದಳು.

. ‘ಒನಕೆಯ ಉಪಯೋಗ ಗೊತ್ತಾ?’ ಸುಮಿ ಕೇಳಿದಳು.

. ‘ಗೊತ್ತು, ಒನಕೆಯು ಓಬವ್ವನ ಆಯುಧ. ಹೈದರಾಲಿಯ ಸೈನಿಕರನ್ನು ಕೊಲ್ಲಲು ಬಳಸಿದ್ದು’.

. ‘ಅಲ್ಲ, ಭತ್ತ ಕುಟ್ಟಲು ಒನಕೆ ಬಳಸ್ತಾರೆ, ಚಕ್ರದಂತೆ ಅಲ್ಲಿದೆಯಲ್ಲ, ಅದು ಬೀಸುವ ಕಲ್ಲು. ಧಾನ್ಯವನ್ನು ಹಿಟ್ಟು ಮಾಡಲು ಉಪಯೋಗಿಸ್ತಾರೆ’ ಸುಮಿ ಪರಿಚಯಿಸಿದಳು.

. ‘ಟ್ರಯಾಂಗಲ್ ರೀತಿ ಇದೆಯಲ್ಲ ಅದು ಏನು ಡ್ಯಾಡಿ?’ ಮಗ ಕೇಳಿದ.

. ‘ಅದು ನೇಗಿಲು. ಮನೆಗೆ ಹೋದ ಮೇಲೆ ನೇಗಿಲಿನ ಚಿತ್ರ ಬರೆದು ಭಾಗಗಳನ್ನು ಗುರುತಿಸಿ ಅದರ ಉಪಯೋಗ ತಿಳಿಸುತ್ತೇನೆ’ ಅಂದ ಶಂಕ್ರಿ.

. ‘ಕೃಷಿಮೇಳವನ್ನು ಜನ ಎಂಜಾಯ್ ಮಾಡ್ತಿದ್ದಾರೆ ಕಣ್ರೀ...’ ಸುಮಿ ಸಂಭ್ರಮಿಸಿದಳು.

. ‘ಕೃಷಿ ಬದುಕು ವಸ್ತುಪ್ರದರ್ಶನವಾಗಿ ಜನರ ಮನರಂಜನೆ ಆಗ್ತಿದೆಯಲ್ಲ ಎಂದು ದುಃಖವಾಗ್ತಿದೆ...’ ಅಂದ ಶಂಕ್ರಿ.

. ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್ , ಎಕ್ಸ್ , ಫೇಸ್ಬುಕ್ ಮತ್ತು ಇನ್ಸ್ಟಾಗ್ರಾಂ ನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.

ಚುರುಮುರಿ: ಖುಷಿ ಮೇಳ

ಚಿನಕುರುಳಿ | ಬುಧವಾರ, ನವೆಂಬರ್ 20 2024