ಗಾಂಧಿ ಕಂಪ್ಲೇಂಟು!

ಪೊಲೀಸ್ ಠಾಣೆಗೆ ತೀರಾ ವಯಸ್ಸಾದ ವೃದ್ಧರೊಬ್ಬರು ಕೋಲೂರಿಕೊಂಡು ಬಂದು ಠಾಣಾಧಿಕಾರಿಯ ಮುಂದೆ ನಿಂತರು.

. ‘ಸ್ವಾಮಿ, ನನ್ನದೊಂದು ಕಂಪ್ಲೇಂಟಿದೆ...’

. ‘ಏನು ನಿಮ್ಮ ಹೆಸರು?’ ಅಧಿಕಾರಿ ತಲೆ ಎತ್ತದೆ ಕೇಳಿದರು.

. ‘ಗಾಂಧಿ’

. ‘ಏನು? ಗಾಂಧಿನಾ? ಯಾವ ಗಾಂಧಿ? ಕಾಂಗ್ರೆಸ್ ಗಾಂಧಿನೋ ಬಿಜೆಪಿ ಗಾಂಧಿನೋ ಅಥ್ವ ಸಿನಿಮಾ ನಟಿ ಒಬ್ರಿದಾರಲ್ಲ ಅವರ ಕಡೆ ಗಾಂಧಿನೋ?’ ಅಧಿಕಾರಿ ವೃದ್ಧನನ್ನು ನೋಡಿ ನಕ್ಕರು.

. ‘ನಾನು ಎಂ.ಕೆ. ಗಾಂಧಿ’.

. ‘ಓ, ಹೊಸ ಹೆಸರು, ಕೇಳಿರ್ಲಿಲ್ಲ. ಇರ್ಲಿ, ಏನು ನಿಮ್ಮ ಕಂಪ್ಲೇಂಟು?’

. ‘ನಾನು ಸಂಪಾದಿಸಿದ ಎಲ್ಲವೂ ಕಳೆದುಹೋಗಿವೆ...’

. ‘ಎಲ್ಲವೂ ಅಂದ್ರೆ? ಏನವು? ಎಷ್ಟು ಬೆಲೆಯವು?’

. ‘ನಾನು ಸಂಪಾದಿಸಿದ ಸತ್ಯ, ಅಹಿಂಸೆ, ಪರಧರ್ಮ ಸಹಿಷ್ಣುತೆ ಎಲ್ಲ ಕಳೆದುಹೋಗಿವೆ, ಅವಕ್ಕೆ ಬೆಲೆ ಕಟ್ಟಲಾಗದು...’

. ‘ರೀ ಸ್ವಾಮಿ, ಇದು ಪೊಲೀಸ್ ಸ್ಟೇಶನ್ನು. ನಿಮ್ಮ ಸತ್ಯ, ಅಹಿಂಸೆ ಹುಡುಕಿ ಕೊಡೋಕೆ ನಾವಿಲ್ಲಿ ಕೂತಿಲ್ಲ. ಅಷ್ಟಕ್ಕೂ ನೀವು ಯಾವ ಕಾಲದಲ್ಲಿದೀರಿ?’

. ‘ನನಗೆ ಕೊಟ್ಟಿದ್ದ ‘ರಾಷ್ಟ್ರಪಿತ’ ಅನ್ನೋ ಬಿರುದನ್ನೂ ಯಾರೋ ಕಳವು ಮಾಡಿದ್ದಾರೆ’.

. ‘ಅಯ್ಯೋ... ಅದ್ಯಾವ ದೊಡ್ಡ ವಿಷ್ಯ ಬಿಡ್ರಿ, ಬಿರುದುಗಳಿಗೇನು ನೂರೆಂಟು ಸಿಗ್ತಾವೆ. ರಾಷ್ಟ್ರಪಿತ ಹೋದ್ರೇನಂತೆ, ‘ವಿಶ್ವಪಿತ’ ಅಂತ ಕೊಡಿಸ್ಲಾ?’

. ‘ನೀವು ಎಲ್ಲದಕ್ಕೂ ವಿರೋಧವಾಗಿ ಮಾತಾಡ್ತೀರಿ. ನನ್ನ ಭಾವನೆಗಳಿಗೆ ಬೆಲೆ ಇಲ್ವ? ನೀವು ಹೀಗೆಲ್ಲ ಮಾತಾಡಿದ್ರೆ ನಿಮ್ಮ ನಾಡ ದೊರೆಗೆ ದೂರು ಕೊಡಬೇಕಾಗುತ್ತೆ...’

. ‘ಯಾರು ಮುಖ್ಯಮಂತ್ರಿಗಳಿಗಾ? ಅಯ್ಯೋ, ಕೊಟ್ಕಾ ಹೋಗ್ರಿ. ಅವರೇ ತಂತಿ ಮೇಲೆ ನಡೀತಿದಾರೆ. ನಿಮ್ ಕಡೆ ನೋಡೋಕಾದ್ರೂ ಟೈಮೆಲ್ಲಿದೆ ಅವ್ರಿಗೆ...’ ಅಧಿಕಾರಿ ನಕ್ಕರು!

. ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್ , ಎಕ್ಸ್ , ಫೇಸ್ಬುಕ್ ಮತ್ತು ಇನ್ಸ್ಟಾಗ್ರಾಂ ನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.