ಮುಲ್ಲನಪುರ: ಸೂರ್ಯಕುಮಾರ್ ಯಾದವ್ ಅವರ ಮಿಂಚಿನ ಬ್ಯಾಟಿಂಗ್ ಮತ್ತು ಜಸ್ಪ್ರೀತ್ ಬೂಮ್ರಾ ಅವರ ಪರಿಣಾಮಕಾರಿ ಬೌಲಿಂಗ್ ದಾಳಿ ನೆರವಿನಿಂದ ಮುಂಬೈ ಇಂಡಿಯನ್ಸ್ ತಂಡವು ಐಪಿಎಲ್ನ ರೋಚಕ ಹಣಾಹಣಿಯಲ್ಲಿ 9 ರನ್ಗಳಿಂದ ಪಂಜಾಬ್ ಕಿಂಗ್ಸ್ ತಂಡವನ್ನು ಮಣಿಸಿತು.
ಮಹಾರಾಜ ಯಾದವೇಂದ್ರಸಿಂಗ್ ಅಂತರರಾಷ್ಟ್ರೀಯ ಕ್ರೀಡಾಂಗಣದಲ್ಲಿ ನಡೆದ ಪಂದ್ಯದಲ್ಲಿ ಟಾಸ್ ಗೆದ್ದ ಆತಿಥೇಯ ತಂಡವು ಫೀಲ್ಡಿಂಗ್ ಆಯ್ಕೆ ಮಾಡಿಕೊಂಡಿತು. ಸೂರ್ಯಕುಮಾರ್ ಅವರ ಆಟದ ಬಲದಿಂದ ಮುಂಬೈ ತಂಡವು 20 ಓವರ್ಗಳಲ್ಲಿ 7 ವಿಕೆಟ್ಗಳಿಗೆ 192 ರನ್ ಕಲೆ ಹಾಕಿತು. ಈ ಗುರಿಯನ್ನು ಬೆನ್ನತ್ತಿದ ಪಂಜಾಬ್ ತಂಡ 9 ರನ್ಗಳಿಂದ ಸೋಲು ಕಂಡಿತು.
ಪಂದ್ಯದ ಹೈಲೈಟ್ಸ್...
ಸೂರ್ಯ ಕುಮಾರ್ ಯಾದವ್ ಮಿಂಚಿನ ಅರ್ಧಶತಕ ಗಳಿಸಿದರು. ಅವರು 53 ಎಸೆತಗಳಲ್ಲಿ 78 ರನ್ ಹೊಡೆದರು.
ರೋಹಿತ್ ಮೂರು ಸಿಕ್ಸರ್, ಎರಡು ಬೌಂಡರಿಗಳಿದ್ದ 36 ರನ್ ಗಳಿಸಿದರು.
ಪಂಜಾಬ್ ಕೇವಲ 14 ರನ್ ಗಳಿಸುವಷ್ಟರಲ್ಲಿ ಪ್ರಮುಖ ನಾಲ್ಕು ವಿಕೆಟ್ ಕಳೆದುಕೊಂಡು ಸಂಕಷ್ಟಕ್ಕೆ ಸಿಲುಕಿತು.
ನಾಯಕ ಸ್ಯಾಮ್ ಕರನ್ (6), ಪ್ರಭಸಿಮ್ರನ್ ಸಿಂಗ್ (0), ರಿಲಿ ರುಸೊ (1) ಮತ್ತು ಲಿಯಾಮ್ ಲಿವಿಂಗ್ಸ್ಟೋನ್ (1) ನಿರಾಸೆ ಮೂಡಿಸಿದರು. ನಂತರ ಬಂದ ಹರಪ್ರೀತ್ ಸಿಂಗ್ (13) ಮತ್ತು ಜಿತೇಶ್ ಶರ್ಮಾ (9) ಕೂಡ ಹೆಚ್ಚು ಹೊತ್ತು ಕ್ರೀಸ್ನಲ್ಲಿ ನಿಲ್ಲಲಿಲ್ಲ.
ಪಂಜಾಬ್ ಸಂಕಷ್ಟದಲ್ಲಿದ್ದಾಗ ಶಶಾಂಕ್ ಸಿಂಗ್, ಅಶುತೋಷ್ ಶರ್ಮಾ ಮತ್ತೊಮ್ಮೆ ಪಂಜಾಬ್ನ ಹೋರಾಟಕ್ಕೆ ನೆರವಾದರೂ ತಂಡ ಕೊನೆಯ ಹಂತದಲ್ಲಿ ಸೋಲು ಕಂಡಿತು.
ಪಂಜಾಬ್ ಪರವಾಗಿ ಶಶಾಂಕ್ ಸಿಂಗ್ 41 ರನ್, ಅಶುತೋಷ್ ಶರ್ಮಾ 61 ಗಳಿಸಿದರು.
ಮುಂಬೈ ಪರ ಜೆರಾಲ್ಡ್ ಮತ್ತು ಬೂಮ್ರಾ ತಲಾ ಮೂರು ವಿಕೆಟ್ ಪಡೆದರು. ಇವರೊಂದಿಗೆ ಹಾರ್ದಿಕ್ ಪಾಂಡ್ಯ, ಶ್ರೇಯಸ್ ಗೋಪಾಲ್ ಮತ್ತು ಆಕಾಶ್ ಮಧ್ವಲ್ ತಲಾ ಒಂದು ವಿಕೆಟ್ ಗಳಿಸಿದರು.
ಪಂಜಾಬ್ ಪರ ಹರ್ಷಲ್ ಪಟೇಲ್ 3, ಸ್ಯಾಮ್ ಕರನ್ 2, ಕಗಿಸೊ ರಬಾಡ 1 ವಿಕೆಟ್ ಪಡೆದರು.