ರಾಷ್ಟ್ರೀಯ ಸೀನಿಯರ್ ಈಜು ಕೂಟ: ಮತ್ತೆ 3 ಚಿನ್ನ ಗೆದ್ದು ಕರ್ನಾಟಕ ಪಾರಮ್ಯ

ಮಂಗಳೂರು: ಸಂಜೆಯ ಎಳೆಬಿಸಿಲಿನಲ್ಲಿ ಹೊಳೆಯುತ್ತಿದ್ದ ಎಮ್ಮೆಕೆರೆ ಈಜುಕೊಳದ ನಾಲ್ಕನೇ ಲೇನ್‌ ಮೇಲೆ ನೋಟವಿಟ್ಟು ಕುಳಿತಿದ್ದ ಪ್ರೇಕ್ಷಕರಿಗೆ ನಿರಾಸೆಯಾಗಲಿಲ್ಲ. ಸರ್ವಿಸಸ್‌ನ ಆನಂದ್ ಎಸ್. ಅವರ ಪ್ರಬಲ ಪೈಪೋಟಿಗೆ ಸೆಡ್ಡು ಹೊಡೆದು ಭರವಸೆಯಿಂದ ಮುನ್ನುಗ್ಗಿದ ಒಲಿಂಪಿಯನ್ ಶ್ರೀಹರಿ ನಟರಾಜ್ ಚಿನ್ನ ಗೆದ್ದು ನಗೆ ಬೀರಿದಾಗ ಈಜುಪ್ರಿಯರೂ ಸಂಭ್ರಮಿಸಿದರು.

ಪುರುಷರ 100 ಮೀ. ಫ್ರೀಸ್ಟೈಲ್‌ ಸ್ಪರ್ಧೆಯಲ್ಲಿ ಶ್ರೀಹರಿ ಗೆದ್ದ ಚಿನ್ನವೂ ಸೇರಿದಂತೆ ರಾಷ್ಟ್ರೀಯ ಸೀನಿಯರ್‌ ಈಜು ಚಾಂಪಿಯನ್‌ಷಿಪ್‌ನ ಎರಡನೇ ದಿನ ಕರ್ನಾಟಕ ಮೂರು ಚಿನ್ನ, ನಾಲ್ಕು ಬೆಳ್ಳಿ ಮತ್ತು ಒಂದು ಕಂಚಿನ ಪದಕ ಗಳಿಸಿತು. ಒಟ್ಟಾರೆ 17 ಪದಕಗಳೊಂದಿಗೆ ಚಾಂಪಿಯನ್‌ಷಿಪ್‌ ಪದಕ ಪಟ್ಟಿಯಲ್ಲಿ ಅಗ್ರ‌ಸ್ಥಾನ ಉಳಿಸಿಕೊಂಡಿತು. ಆತಿಥೇ ಯರ ಖಾತೆಯಲ್ಲಿ ಈಗ 9 ಚಿನ್ನ, 7 ಬೆಳ್ಳಿ ಮತ್ತು 1 ಕಂಚಿನ ಪದಕ ಸೇರಿದೆ.

ಮಹಿಳೆಯರ 1500 ಮೀಟರ್ ಫ್ರೀಸ್ಟೈಲ್‌ನೊಂದಿಗೆ ದಿನದ ಮೊದಲ ಫೈನಲ್‌ ರಂಗೇರಿತು. ಈ ಸ್ಪರ್ಧೆಯ ಚಿನ್ನದ ಪದಕ ತೆಲಂಗಾಣದ ವೃತ್ತಿ ಅಗರ ವಾಲ್‌ ಅವರ ಪಾಲಾಯಿತು. ಆರಂಭದಲ್ಲಿ ಭಾರಿ ಮುನ್ನಡೆ ಸಾಧಿಸಿದ್ದ ವೃತ್ತಿ ಸಾವಿರ ಮೀಟರ್‌ಗಳ ಮುಕ್ತಾಯದ ವೇಳೆ 50 ಮೀಟರ್‌ಗಳಷ್ಟು ಮುಂದಿದ್ದರು. ಕೊನೆಯ ಐದು ಲ್ಯಾಪ್‌ಗಳಲ್ಲಿ ಕರ್ನಾ ಟಕದ ಶಿರೀನ್‌ ಪೈಪೋಟಿ ಒಡ್ಡಿದರು. ಐದು ಸೆಕೆಂಡುಗಳ ಅಂತರದಲ್ಲಿ ಶಿರೀನ್‌ ಚಿನ್ನ ಕಳೆದುಕೊಂಡರು. 

ಕರ್ನಾಟಕಕ್ಕೆ ಚಿನ್ನ–ಬೆಳ್ಳಿ: ಪುರುಷರ 800 ಮೀ ಫ್ರೀಸ್ಟೈಲ್‌ ಮತ್ತು 50 ಮೀ ಬ್ರೆಸ್ಟ್ ಸ್ಟ್ರೋಕ್‌ನ ಚಿನ್ನ ಕರ್ನಾಟಕದ ಪಾಲಾಯಿತು. 800 ಮೀ ಫ್ರೀಸ್ಟೈಲ್‌ ನಲ್ಲಿ ಅನೀಶ್ ಎಸ್‌.ಗೌಡ ಮತ್ತು ದರ್ಶನ್ ನಡುವೆ ಅಗ್ರಸ್ಥಾನಕ್ಕೆ ಸ್ಪರ್ಧೆ ಏರ್ಪಟ್ಟಿತ್ತು. ಆರಂಭದ ಮುನ್ನಡೆಯನ್ನು ಉಳಿಸಿಕೊಂಡ ಅನೀಶ್ ಮೊದಲಿಗರಾದರು. 50 ಮೀ ಬ್ರೆಸ್ಟ್ ಸ್ಟ್ರೋಕ್‌ನಲ್ಲಿ ವಿದಿತ್ ಶಂಕರ್, ತಮಿಳುನಾಡಿನ ಯಾದೇಶ್ ಅವರ ಸವಾಲು ಮೀರಿ ಕರ್ನಾಟಕಕ್ಕೆ ಚಿನ್ನ ತಂದುಕೊಟ್ಟರು.

ಮೊದಲ ದಿನ 400 ಮೀ ಫ್ರೀಸ್ಟೈಲ್‌ನಲ್ಲಿ ದಾಖಲೆ ಬರೆದಿದ್ದ ಕರ್ನಾಟಕದ ಹಾಶಿಕಾ ರಾಮಚಂದ್ರ ಅವರಿದ್ದ ಮಹಿಳೆಯರ 200 ಮೀ ವೈಯಕ್ತಿಕ ಮೆಡ್ಲೆ ಸ್ಪರ್ಧೆ ಕುತೂಹಲಕ್ಕೆ ಕಾರಣವಾಗಿತ್ತು. ರಾಷ್ಟ್ರೀಯ ದಾಖಲೆ ಹೊಂದಿರುವ ಹಾಶಿಕಾ ಅವರನ್ನು ಹಿಂದಿಕ್ಕಿದ ತಮಿಳುನಾಡಿನ ಶ್ರೀನಿಧಿ ನಟೇಶನ್ ಚಿನ್ನ ತಮ್ಮದಾಗಿಸಿಕೊಂಡರು.

ಬಟರ್‌ಫ್ಲೈ, ಬ್ಯಾಕ್‌ಸ್ಟ್ರೋಕ್‌ ಮತ್ತು ಬ್ರೆಸ್ಟ್‌ ಸ್ಟೋಕ್‌ನಲ್ಲಿ ಮುನ್ನಡೆ ಸಾಧಿಸಿದ್ದ ಕರ್ನಾಟಕದ ಮಾನವಿ ವರ್ಮಾ ಫ್ರೀಸ್ಟೈಲ್‌ನಲ್ಲಿ ಮುಗ್ಗರಿಸಿ ಕಂಚಿಗೆ ಸಮಾಧಾನಪಟ್ಟುಕೊಂಡರು. ಮಹಿಳೆಯರ 50 ಮೀ ಬ್ರೆಸ್ಟ್‌ ಸ್ಟ್ರೋಕ್ ಸ್ಪರ್ಧೆ ಪಂಜಾಬ್‌ನ ಅವನಿ ಛಾಬ್ರ ಮತ್ತು ಚಾಹತ್ ಅರೋರ ನಡುವೆ ಪೈಪೋಟಿಗೆ ಸಾಕ್ಷಿಯಾಯಿತು. ರಾಷ್ಟ್ರೀಯ ದಾಖಲೆ ಹೊಂದಿರುವ ಚಾಹತ್ ಅರೋರ ಅವರನ್ನು ಮಿಲಿ ಸೆಕೆಂಡುಗಳ ಅಂತರದಲ್ಲಿ ಹಿಂದಿಕ್ಕಿ ಅವನಿ ನಗೆಸೂಸಿದರು.