ಹಳೆಯ ಸಂಸತ್‌ ಕಟ್ಟಡ 100 ವರ್ಷಗಳಷ್ಟು ಪುರಾತನವಾದುದು. ಇದು ವಸಾಹತುಶಾಹಿ ಯುಗದ ಕಟ್ಟಡ. ಸಂಸತ್‌ ಸದಸ್ಯರು ಮತ್ತು ಸಿಬ್ಬಂದಿಗೆ ಸ್ಥಳಾವಕಾಶದ ಕೊರತೆ ಎದುರಾಗಿತ್ತು. ಅಲ್ಲದೆ, ಕಟ್ಟಡದ ಸ್ಥಿರತೆಯ ಬಗ್ಗೆ ಕೂಡ ಪ್ರಶ್ನೆ ಎದ್ದಿತ್ತು. ಸಾಕಷ್ಟು ಸಲ ದುರಸ್ತಿ, ಪುನರ್‌ ನಿರ್ಮಾಣ, ಸುಣ್ಣ–ಬಣ್ಣ ಎಲ್ಲವನ್ನೂ ಕಂಡಿತ್ತು. ಅದು ಭೂಕಂಪ–ನಿರೋಧಕವಲ್ಲದ ಕಟ್ಟಡವಾಗಿದ್ದು, ಅದರಲ್ಲಿ ಯಾವುದೇ ಮಾರ್ಪಾಡು ಮಾಡುವುದು ಅದರ ರಚನಾತ್ಮಕ ಸಮಗ್ರತೆಯೊಂದಿಗೆ ರಾಜಿ ಮಾಡಿಕೊಂಡಂತಾಗುತ್ತಿತ್ತು. ಆದ್ದರಿಂದ 2010ರ ಆರಂಭದಲ್ಲಿ ಹೊಸ ಕಟ್ಟಡ ನಿರ್ಮಾಣದ ವಿಷಯ ಪ್ರಸ್ತಾಪವಾಗಿತ್ತು. 2012ರಲ್ಲಿ ಅಂದಿನ ಸ್ಪೀಕರ್ ಮೀರಾ ಕುಮಾರ್‌ ಅವರು ಅಸ್ತಿತ್ವದಲ್ಲಿರುವ ಸಂಕೀರ್ಣವನ್ನು ಬದಲಿಸುವ ಪರ್ಯಾಯ ಆಯ್ಕೆಗಳ ಅನ್ವೇಷಣೆಗೆ ಸಮಿತಿಯೊಂದನ್ನು ರಚಿಸಿದರು. ಅದರ ಪರಿಣಾಮವಾಗಿ ಇಂದು ವ್ಯವಸ್ಥಿತ ಹಾಗೂ ವಿಶಾಲವಾದ ನೂತನ ಕಟ್ಟಡ ತಲೆಎತ್ತಿದೆ. ಇನ್ನೊಂದೆಡೆ, ಭಾರತದ ರಾಷ್ಟ್ರೀಯ ಪರಂಪರೆಯ ಸಂಕೇತವಾಗಿ ಹಳೆಯ ಕಟ್ಟಡವನ್ನು ಸಂರಕ್ಷಿಸಲು ಕೂಡ ಕ್ರಮಗಳನ್ನು ತೆಗೆದುಕೊಳ್ಳಲಾಗುತ್ತಿದೆ.

1927ರಲ್ಲಿ ನಿರ್ಮಾಣಗೊಂಡಿದ್ದ ಹಿಂದಿನ ಸಂಸತ್ತಿನ ಕಟ್ಟಡವು ಮಿಟಾವೊಲಿಯಲ್ಲಿರುವ ಹಿಂದೂ ಯೋಗಿನಿ ದೇವಾಲಯದಿಂದ ಹೆಚ್ಚು ಪ್ರಭಾವಿತವಾಗಿತ್ತು. ಇದನ್ನು 1912 ಮತ್ತು 1913ರ ನಡುವೆ ಬ್ರಿಟಿಷ್ ವಾಸ್ತುಶಿಲ್ಪಿಗಳಾದ ಸರ್ ಎಡ್ವಿನ್ ಲುಟ್ಯೆನ್ಸ್ ಮತ್ತು ಸರ್ ಹರ್ಬರ್ಟ್ ಬೇಕರ್ ವಿನ್ಯಾಸಗೊಳಿಸಿದ್ದರು. ಈ ಕಟ್ಟಡ 1927ರಲ್ಲಿ ಪೂರ್ಣಗೊಂಡಿತ್ತು.